مدرسة ليدرز لغات

مدرسة ليدرز

العنوان: المندره

التليفون:

المصاريف:

·          

·         الباص:

·         الزي:

 أراء أولياء الأمور فى المدرسه :

هوبة

ليدرز ابنى فيها وممتازة
ناس محترمين بجد واى حاجة بيهتمو بيها
بياخدوا كتاب ماك ميلان
وليهم كتب يتاعت المدرسة كراسات يعنى
وكل تعليمهم بنظام الاغانى انجايزى وفرنساوى وقران وكلةبيدرسوا القران بالتجويد وبيعلموهم الوضوء والصلاة واذكار قبل الاكل وبعدة واحاديث كتير وادعية
الصراحة المدرسة كويسة ومديرة المدرسة ميس عزة ممتازة وفعلا مهتمين جدا
انا ابنى فى كجى تو
فية مناهج وكراسات تانية تبع المدرسة
وبياخد فرنساوى اورال بس لو كتاب عاملة المدرسة بس من جونيور هيبقى الفرنساوى رايتن وبيدوهم المناهج على شكل اغانى وكل يوم الاغانى بتتقال فى الاين يعنى الطابور بيدخلو الكجى الساعة 9 وبيطلعوا 12 ونصف بسسبب ظروف الانفلونزا بس بيروحوا كل يوم ماعدا الجمعة والسبت 
الفصل ميزدش عن 20 والباص كذلك
الولد بينزل برنة الموبايل ترن اول رنة عشان يلبس الكوتشى والجاكت ورنة تانية عشان ينزل
مشرفات الباص محترمين جدا وتحسى انهم متنقيين على الفرازة وبعد الضهر بتسلمك الطفل برضو برنة الموبايل مبتسبش الطفل الا لما تستلمية

كنت فى المدرسة اول السنة وجت ولية امر تستكى ان الباص ساب ابنها تحت العمارة وهى لسة منزلتش تستلمة
المديرة كان تعليقها كلمة واحدة احنا اسفين مشرفة الباص دى مش هتشوفيها تانى وفعلا مشت
واول يوم دراسة جالى باص مش مكتوب علية اسم المدرسة لما كلمتهم قالولى بكرة هيكون مكتوب علية لان الباص لسة جاى من المرور فبل الدراسة بيوم
وفعلا الباصات جديدة ونظيفة
وتعاملهم مع اولياء الامور ذوق جدا لاقصى مدى

وبالنسبة للكلاس المشرفة بتوصلالاولاد الكلاس
كل دور فية حمام للاولاد وحمام للبنات
والحمام من جوة مقسم لثلاث او اربع حمامات مش فاكرة
والدادات موجودين على طول
لانى بسال ابنى بيقولى الدادة بتنضف الحمام على طول وبيقولى الحمام بيلمع يا ماما
الفصول واسعة ونضيفة والصراحة الشمس بتدخلها بالرغم ان فصل ابنى فى الارضى
والى منكم راح المدرسة اكيد شاف فصول الكجى
الجدول الدراسى بيمشوا علية بدقة شديدة
بياخدوا حصتين تجويد فى الاسبوع وبيدخلهم فى حصة التجويد مدرستين والترم الجاى هياخدوا الحصة فى المسجد
بياخدوا قران وقصص الانبياء واناشيد دينية وخدو نشيد عن الوضوء
والله ابنى بيصمم الصبح يتوضى قبل ما ينزل المدرسة ويقولى لازم اصلى عشان ربنا يحبنى وبيغنى النشيد الى حافظ بية حركات الوضوء
بدايتة بتقول لما اتوضى اغسل ايدى ثلاث مرات وكدة ويكمل ويتابع الوضوء
وبياخدوا اذكار زى اذكار الطعام والنوم والوضوء وبعد الاذان واحاديث

التعامل فى الكلاس بالانجليش
وبياخدوا ساينس وفونيكس
وموسيقى ورسم
وكل المنهج بالاغانى فى اغنية للالوان واغنية لاجزاء الجسم وهكذا اغانى كتير اوى
انجليزى وفرنساوى واناشيد دينية
وفية بيرنت ميتنج كل شهر عشان تتابعى مع المدرسات
وبيبعتولك سى دى للسونجس عشان تبقى متابعة وسى دى للقران
واى حد عايز يستفسر عن اى حاجة يسال وانا هجوبة

نيجى لعيوب المدرسة
لسة الملاعب مكماتش وعشان كدة مفيش نشاط رياضى اضافى وفية وعد ان الملاعب هتكمل على الترم التانى
وفعلا هما خلصوا ملعب كرة القدم انا شفتة فى البيرنت ميتنج الاخير بس بياخدو حصص الالعاب العادية
من العيوب ان اول شهر فى الدراسة كانو نايمين فى الشغل خالص معرفش اية وحهة نظرهم
بس الصراحة اى شكوى بتتعدل بسرعة رهيبة
يعنى انا اشتكيت من مدرسة القران ان الولاد مش فاهمين وكانت الشكوى محل اهتمام رهيب وتم تغير المدرسة على طول

lovely_habeba

انا رحت ليدرز وقعدت مع المديرة وحسيتها محترمة جدا وعايزة تعمل حاجة فعلا
بس كان عندى شوية تحفظات
الملاعب فعلا مكملتش خالص
الاولاد مكانوش بيتكلموا انجلش فى الفصول مع المدرسات
خفت ان الاطفال يتلخبطو بين الفرنساوى والانجلش لانهم بيبتدوها من بلاى 

هوبة

الهوم ورك  مش بيبقى كتير ومش كل يوم
بس بالنسبة ان المنهج تقيل لالا خالص بالعكس انا بيتهيالى انهم المفروض يشدوا عن كدة
بنت خالتى مدرسة كجى بتقولى ان المنهج دة حلو وخفيف وبتشكر فى كتاب يو اند مى اوى
لان عندهم فى سيدى جابر المنهج تقيل اوى والولاد ايدهم بتتقطع من كتر الكتابة
اما بالنسبة للفرنساوى اورال بس وبيبقى على شكل اغانى
يعنى اغنية للارقام واغنية لبعض الحروف
وشوية كلمات بسيطة زى كبير صغير
فوق تحت
قطة قلم كتاب
بعض الفواكة والخضر
وهكذا

والاتجاة دلوقتى لتدريس الفرنساوى بقى فى كل المدارس مش فى اليدرز بس
والمديرة كانت قالت ان كل المدرسات راحوا دورات تدريبية وعملولهم امتحانات جامدة عشان يابلوهم
حتى لما كنا خايفين على الاولاد من موضوع الانفلونزا كانت بتقول فى البيرنت ميتنج
حرام تقعدوا ولادكم فى البيت وتضيعوا مجهودنا الى عملناة طول الصيف عشان نستقبل اولادكم
وفعلا المدرسة قمة فى النضافة
موضوع التعامل فى الفصل بالانجلايش
مش عارفة ان كان بيتطبق ولا لا بس ابنى بيتعامل معانا فى البيت بالانجلش
ودة ناتج على ان التعامل هناك كدة
بيبعتوا طبعا ويكلى شيت كل اسبوع يوم الخميس فية الى تم دراستة طول الاسبوع
وفية كراسة للملاحظات بيتكتب فيها اى حاجة خلال الاسبوع

bosy84

ليدرز انا روحتها معجبتنيش اطلاقا محستش انها كويسة غير ان الملاعب فيها تكاد تكون معدومة ومفيهاش قسم امريكن 

رأى و لى أمر

النهارده بالصدفه لقيت مدرسه اسمها ليدرز الصراحه انا انبهرت بيها جدا من حيث المستوى والتنظيم والمقابله وتحس ان الناس دي عايزه فعلا تعمل مدرسه محترمه بس هي لسه جديده وماسمعتش. الحلو فيها انها بتدرس منهج ماكميلان وهو اقوي منهج على الاطلاق وانا شايفه ان المدرسه دي كويسه من مستوي مديره المدرسه ولو مش مصدقيني روحوا وشوفوا بنفسكم ده بالاضافه ان مصروفاتها معقوله جدا بالنسيه لمستواها هي حوالي 6400 شامله كل شئ ده بالنسبه للكي جي ده بالاضافه ان مافيهاش شير ولا registration

يعني لو ابنك داخل بلاي سكول مش راح تخسري حاجه لو جربتيها
واخيرا ابتعدي عن اي مدرسه فيها شير لانك حتى لو ماعجبتكيش بعد كده وفكرت تنقلي حيكون خسرت الفلوس
ولكن لو عايزييين رايي انا شخصيا المدرسه المصريه الانجليزيه ممتازه وانا عندي احساس ان ليدرز دي حاتبقى احسن منها في المستقبل 

moonlight27_8

المدرسة حلوي اوي بجد و نضيفة و المنهج اللي بيستخدموة تحفة

Merotta

ورحت مدرسة ليدرز هو المبنى من بره حلو جدا والمدرسة شكلها حلو ونظيف بس الملعب عبارة عن صحراء جرداء ما فيهاش ملعب خالص الا زحليقة صغيرة على جنب فى الجزء الوحيد الى فى ضل فى الملعب وكلام المديرة مدام عزة مبشر لكن حسيت انه لا يمت للواقع بصلة مش عارفة ليه

فى ليدرز بحس ان المديرة هى كل شىء هناك بدونها المدرسة تنهار على طول مفيهاش سياسة واضحة كله كلام رهن التنفيذ
الملاعب صحراء جرداء
المدرسة حاسة انها فاضية خالص 

بودى

انا ابنى مبسوط فيها اوى

الدولفين    مايو 2010

انا اولادى فيه ممتازة وفعلا هى كل حاجه فى ايد المديرة بس اى مدرسه ادارة مش اكتر

وليد مدنى    أكتوبر 2010

انا اولادى فى مدرسة ليدرز بصراحة مدرسة فوق الممتازة والمديرة مدام /عزه مديرة ادارة والمدرسة نظيفة جدا جدا والمدرسين والمدرسات غاية فى الاحترام ومشرفات الباص والسائقين ممتازين واى شكوى لها الاهتمام من ناحية الادارة ومنهجها جميل وليس تقيل كما يقول البعض والملحوظة الوحيد الهوم ورك كتير مش على الاولاد ولكن على اولياء الامور لانى انا عندى اثنان من الاولاد وليس لدى وقت للمذاكرة بعد قضاء الهوم ورك فأنا نفسى تقل شوية ولاتعتمدون ان J 3  كبار لكى يذاكر فى البيت لوحده لان ابنى عشان يحفظ القران لوحدة بدون المدرسة دى مشكلة ولكن المدرسة والادارة والمدرسون جميعا والمشرفين والمشرفات والسائقيين وكل العاملين على حفاظ تلك الهيكل مشكرو جدا جدا وشكر خاص لمستر / اكرم ( mathe وميس / بسمة eng والاستاذ اشرف سردينة الرجل المحترم لاحترامه لاولياء الامور وشكرا 


إدخل تعليقك ورأيك فى المدرسه