مدرسة بريليانس لغات



مدرسة بريليانس لغات

 

العنوان: فى اخر شارع45بعد مدرسة رويالتى

التليفون: 9585068

www.brilliance-languge school.com

المصاريف:

   4950  + 200 كتب   + 300 يونيفورم

   الباص: 1000

   الزي:


أراء أولياء الأمور فى المدرسه : 

 

رأى و لى أمر

أبنى فى مدرسة بريليانس وهى مدرسة ممتازة حقا أخلاقيا ودينيا وتعليميا ومهما كتبت عنها فلن اوفيهم حقهم لان الادارة ممتازة وكل من يعمل فى هذة المدرسة يستحق التقدير واذا احببتم أن أكتب عنها المزيد فانا موجودة

 

رأى و لى أمر

المدرسة ما شاء الله كويسه جدا وبيعملوا أنشطة رائعة مع الاولاد عندهم يومين فى الاسبوع يذهبون الى مكان فى المدرسه مخصص للالعاب الذهنية واليدوية كالطين الاسوانى والخيش وغيرها وكثير من العاب الذكاء كما انهم يدرسون القرآن بالتجويد وعليهم حفظ متن تحفة الاطفال الخاص بالتجويد وبعدين مش بيتأخروا قوى بنت خالى ساكنة فى محرم بك واولادها معانا فى المدرسة وبيوصلو تقريبا فى نصف ساعة أو ساعة الا ثلث بالكتير وبعدين انت بتنتقى بيئه صالحة لاولادك هتأثر فيهم جدا بعد كدة دايما بيعلموا الاولاد يحبوا بعض وكل يوم بيشوفوا مين أطيب ولد فى الفصل بيلبسوه تاج kind boy فتلاقى الاولاد بيحالوا يحصلوا على هذا التاج

مصاريف المدرسه5000 الا50 البلاى سكول ب2450 الباص ب 900 الكتب ب200

وللأمانه فى

العام الماضى كانوا 17 طفل وهذا العام22 طفل والفصول كبيرة والله بأمانة مدرسة ممتازة وأن شاء الله ابنى التانى داخل هذا العام بلاى سكوول

 

هما بيخدوا ألمانى من جنيور2 وتقريبا الفرنساوى من جنيور 4

هما بيخدوا متن تحفة الاطفال فقط لانهم يدرسون الطريقة النورنية لتعليم القراءة والكتابة وهى طريقة ممتازة وبعدين الاولاد حفظ المتن ظهر عن قلب ما شاء الله لا قوة الا بالله

 

المدرسة عودت الاولاد مثلا على عيادة المريض احنا لما ولد بيتعب بيبعتوا مع الاولاد رقم تليفونه ويتصل بة أصحابة ويقولون شفاك الله وعفاك دة ابسط مثال ممكن اقوله

ده حتى الباص بتاع المدرسة لهم منهج فى الادعية أبنى حفظ أذكار الصباح والمساء منهم

 

بالنسبة للغه أبنى بقالوا سنتين فى المدرسة كجى 1 وكجى 2 أنا شايفة الاولاد كويسين وفية شيتات كتير خالص ومراجعه مستمرة وهو الان ما شاء الله لا قوة الا بالله بقرا أجليزى وعربى كويس جدا ونطقة جميل والله بدون مبالغه لما بيتصل بأحد من اصحابة بالمدرسة نصف المكالمة بتبقى أنجليزى

 

وللأمانة انا ما جربتش مدارس اخرى لكن بالمقارنة مع صديقاتى اللى اولادهم فى مدارس أخرى زى أسكندرية مثلا مستوى بريليانس حلو مع ان المدرسه جديدة

 

سلمى 

أنا فى اخر سنة فى الجامعة و انشاء حكون مدرسة لغة انجليزية مع العلم أنى كنت بحضر نفسى جيدا لهذة الوظيفة و قدمت فى مدارس كتير و الحمد الله كنت بتقبل مع انى لسة بدرس و اشتغلت فى الاكاديمة مدرسة إنجلش فى المدرسة الصيفية هناك. عندى فكرة عن معظم المدارس و المناهج. حبيت أشاركم فى الموضوع : . مدرسة Brilliance المستوى اللغوى بتعها واقع و المدرسين هناك مش شاطرين و اللغة بتاعتهم ضايعة

انا عايزة أوضح حاجة انا مليش اى مصلحة فى ترشيح مدارس معينة انا بتكلم و ربنا شاهد على كلامى من باب النصيحة و أسفة جدا لو حيرت حد. فى كورس للمدرسين بيتاخد فى الصيف كل مدرسة بتيعت كام مدٌرسة من عندها عشان يستفيدو بطرق التدريس الحديثة بس كان فى مدرسين من بريللينس نطقهم كان وحش أوى و مكانوش متجاوبين أوى كان الفرق واضح بينهم و بين بقيت المدرسين كمان مش كلهم خريجين لغة انجليزية

 

رأى و لى أمر

أنا بارشح البريليانس ,

انا روحت النهارده الصبح و قابلت مديرة الجونيور السيده حنان و الصراحة ريحتني جدا و حتى زوجي اللي كان قلقان و مش عايز ينقلهم اطمن و ان شاء الله حننقلهم من السنة الجاية ,

 

و على فكرة المديرة استغربت جدا لما قلتلها الناس بتقول ان المستوى التعليمي و اللغوي ضعيف . و هي كانت قبل كده في القدس و في ALS يعني لها خبرة و عارفة كويس المستوى اللي حواليها شكله ايه

 

رأى و لى أمر

المدرسة يا جماعة ممتازة دينيا وتعليميا انا شوفت الاولاد وهما بيتكلموا وبيغنوا وهما نازلين الجاردن بيغنوا اغانى اسلامية للرسول محمد صلى الله عليه وسلم

بالانجليزى وكمان اغانى عادية ...

وكمان شفت اطفال ال KG وهما بيصوروهم صور التخرج والله حاجة تطمنك وتفرحك

والمدرسات كويسين جدا وبيتكلموا مع بعض بالانجليزى

 

رأى و لى أمر

شفت تقريبا معظم مدرسات الكيجى......والله نطقهم مع الاولاد مش اد كدة .يعنى مش مدرسات خريجى مدارس لغات ..لا..كلية عادية وواخدة كورس e وكمان شفت بنات الkg2 بيغنوا اغنية i love u فى الجاردن بيتهتهوا فيا والنطق مش سليم والله بنت جارتى لسه فى ال.p.l حفظاها احسن منهم بكتير.........انا شكاكة جدا وفضلت قاعدة مدة اتفرج المستوى مثلا مش زى المصرية او بايونيرز حاسة انة اقل وكمان فصول البلاى ضيقة جدا ومسمعتش اى فصل بيحفظ اى حاجة ولما دخلت لقيت اما تلوين اولعب المهم حتى الكيجى فى كلامهم في الكلاس النص عربى والنص eعادى

 

رأى و لى أمر

الحقت ابنى بمدرسة بريليانس kg1 العام الدراسي 2008-2009 المدرسة جميلة وجديدة وكنت سعيدة جدا بالاهتمام بالقرأن و تحفيظ الاطفال الاذكار و الحرص على ترديدها كل صباح بمساعدة مشرفه الباص.كل هذا كان جميل جدا ولكنى عانيت من بعض الاهمال بعد ذلك ....اولا كان هناك مقررا على الاطفال لأن يحفظوا تقريبا نصف جزء عم ...ابنى عمره 4 سنوات لا اكذب عليكم عانيت معاه لكن كنت احاول اساعده بالرغم من السرعه الشديده من قبل مدرسة القرأن دون ان تهتم حفظ الاطفال ام لا و كانت تعتمد على ان هناك بعض الاطفال ممن جايين المدرسة حافظين اصلا اما الباقى ربنا يتولاه مع اهله . ايضا تحفة الاطفال التى لم تهتم المعلمة بالصاقها او كتابتها فى كراسته ماهذا؟!

يعطون اغانى و انشطه لكن ولكن مش مهم الولد حفظ معاهم ولا كأنه مقرر بيخلصوه وخلاص

 

لكن الحسنه التى لن انكرها ولابد ان اعطيها حقها هى مدرسة اللغة العربية كم هى ممتازة ماشاء الله وانعكس ذلك على ابنى ... لكن اين اللغة الانجليزيه التى ادخلت ابنى المدرسة اللغات ليتعلمها ابنى لا يحفظ اغنية واحدة

لم اجد تعليم و اتقان ونطق لغة انجليزية مشرف يتناسب مع ما سمعته عن المدرسه

ناهيكم عن المصاريف دخلت اقدم لأبنى و انا اعلم ان المصاربف 4000 جنيه دون معرفه الباص و اليونيفورم و الكتب قالو لسه شهر 8 تعرفى....و علمت انه 900 جنيه.و الباقى كلف حوالى 450 جنيه. .فلت مش مهم كله يهون و ربنا يسهل ...جينا نصف السنة الثانى طلعت زيادة الوزاره المقررة اللى هندفعها احنا اولياء الامور 900 جنية تقريبا... عرفت بعد ذلك ان السنه دى فى زياده كمان تراكمية على ال 4950 و لا يعلمها الا الله و اللى هتبان اخر السنه الدراسية ان شاء الله..طيب ماهو كده مش معقول لو كل سنه المصاريف زادت 1000 جنيه غير طبعا ما هيزيد الباص و باقى الاشياء!!! و الله حرام

 

رأى و لى أمر

بريليانس ( عيبها الوحيد ان مشوارها صعب جدا- مش شايفة فيها ملاعب وانشطة كتير)

مميزات بريليانس (فيها قرآن في KG1الطفل يبآخد نصف جزء عم-كل يوم ساعة قرآن-متن تحفة الاطفال

اهم شيء البنيين منفصليين عن البنات -الطفل حيتخرج منها ان شاء الله وهو معاه 3 لغات انجليزي والماني

وفرنسي-حافظ القرآن لانة مادة اساسية تضاف الي المجموع)

 

رأى و لى أمر

مدرسه بريلينس بيعتمدوا فيها انه الطالب لازم يكون متفوق من غير دروس وبعدين هى رائعه والرياضه فيها ممتازه والتعليم جميل وعندهم اهتمام غير طبيعى بالدين وعلى طول بيعملوا فطار جماعى للطلبه علشان روح الجماعه وبيهتموا بتنميه مهارات الطفل

 

رأى و لى أمر

بتفصل بين البنات والبنين وكمان 4 سنين هتنقل الولاد الى مدرسة منفصلة تماما والمدرسة من دلوقتى مش بتخلط بينهم بتفصل من كجى 1 وميعاد الفسحة بتاعت البنات غير ميعاد البنين يعنى مش بيتقبلو خالص وبتحفظ قران واحاديث والازكار وليهم ميعاد الصلاة لازم الكل يقوم يصلى والدراسة تقف نصف ساعة والمصاريف كلة شامل الباص والزى والكتب 8000 يارب اكون افدتك

 


رأى و لى أمر     يناير 2010


بصراحة أنا بحب المدرسة بالرغم أن فيها شوية عيوب كده أكيد موجوده فى كل مدرسة 

لكن صراحة الاخلاق وتعاملهم مع الأولاد جميل جدا جدا 

نطق الانجليزى وأتقان الكلمات والجمل ممتاز 

مستوى اللغة العربية رائع

القرآن و الطريقة النورانية جيد جدا مع أنى نفسى يبقى كم القرآن أكثر من ذلك

الماث فى الأول كان كويس جدا وبعد ضعف أبنى شويه فى الماث وبفضل الله ثم المراجعات المستمرة فى المدرسة تحسن مستواه كثيرا

الشيتات بتوصلنى دائما ممكن كل يوم أو يومين 

النوت بوك يوميا تصلنى بكل ما أخذوه خلال اليوم الدراسى 

عندما أرسل أى أستفسار لأى مدرس يجيبنى دائما وفى نفس اليوم

طبعا ماشيين على منهج ماكميلان

من تانية أبتدائى بندرس ألمانى


العيوب من وجهة نظرى


أولا الباص أول العام كان العدد فية كبير نسبيا مش كل واحد قاعد على كرسى بالرغم من أن مصاريف الباص1050

والحمد لله هذة المشكلة أتحلت الى حد ما بعد عدة شكاوى


ثانيا صعوبة مقابلة المدرسين هذا العام وتحديد ميعاد سابق وما ينفعش تكلمى مدرس فى التليفون فتفاديت هذه المشكله بذهابى وقت البريك لأن كل المدرسين بيكونوا مع الأولاد فى الجاردن


ثالثا زيادة المصاريف أول سنه المدرسة كانت ب4 ألالاف والعام الماضى كانت ب5 ألالاف واليوم عرفت أن المصاريف هذا العام 6 ألالاف ؟؟؟؟؟؟؟؟؟؟؟؟

طبعا زياده غير طبيعية وكنت أشتريت كتب الكجى لأبنى أول عام ب 168 جنية هذا العام كجى 1 الكتب ب 450 جنية وحتى الزى المدرسى زاد 

بصراحة برغم حبى للمدرسة وأعتزازى بها الا إن المصاريف هتبقى كتير يعنى ممكن تدخل للولدين فى حدود 15 أو 16 ألف وده كتير علي زوجى 

وأتمنى من الله أن يرزقنا برزقهم ولا نحولهم من المدرسة 


المدرسة بتأخذ ألمانى من الصف الثانى الأبتدائى فقط والفرنسى مش موجود تقريبا غير فى أعدادى والله أعلم ممكن أبقى أتأكد لك من المدرسة


الأنشطة كتير منها برنامج bmc برنامج تنمية المهارات العقليه والتفكير والأولاد بيستمتعوا بة جدا من كجى1 الى جنيور6 

والانشطة الرياضية ودائما مباريات كرة قدم وسلة 




رأى و لى أمر     يوليو 2010

السلام عليكم انا ولى امر ونحن نحب المدرسه (بريليانس) والمدرسه بها ايجابيات ولكن لا نجد احد يسمع لاراءنا فلا يوجد مجلس ءاباء ونحن نطالب عقد اجتماعات شهريه لسماع شكوانا وبصدر رحب ومحاولة حلها ونطالب بارسال تقييم لمستوى الطالب كل شهر وسهولة مقابلة المدرسين وتحسين خامات الزى و تقوية 


مستوى المادة الانجليزيه ونرجوا عدم الاختلاط فى الطابور والفسحه والخروج ونرجوا من المدرسين الذين ليس لديهم علم شرعى ان لا يفتون فى المسائل الشرعيه ونطالب من الكافيتريا التقليل من الوجبات الغير صحيه والغالية الثمن ونرجوا من المدرسه النهوض بالمستوى الاخلاقى والدينى




 مظلوم  فبراير 2011

السلام عليكم انا عندى كلمتين وانتم تحكموا على المدرسه لما  يكون كل شئ فيها مزيف وكل شئ له وجهيين من اول اهداف المدرسه ومبادئها وانها اسلاميه الى بعض العاملين بها واقول البعض لان هناك اناس كثيريين محترمينالى اهم شخصيه فى المدرسه وهى ناظره المدرسه المربيه الفاضله اللى زوجها ب ياكل اموال

الناس وياخذ حقهم ويقبل على بيته واولاده مال حرام وهى صاحبه المثل والشعارات تقبل ادخال مال غير مالها على بيتها واولادها الكلام ده مش كلام وافتراءات لا هناك اوراق وادله وقضايا ضد زوجها  والجميع يعرف ذلك  وعندما سمعت هذا الكلام لم اتخيل ماذا يحدث لابنائنا فى هذه المدرسه التى تراسها هذه الناظره فيا

ترى كيف نترك ابنائنا تحت ادارتها ماذا ستعلمهم السرقه ام اخذ حق الناس ام الظهور بمظهر والواقع شئ اخر او التستر وراء الدين والترح الطويله والعباءات ام ماذا؟ ناظره هذه الدرسه تعمل فى مدرسه بريليانس للغات ولكن انشاء الله حيجى يوم وينكشف سترها واتمنى ان تقرا هى هذه الرساله واحب ان اقول لها الله

يعينك على عقاب ربنا وياريت لا تنسى ان عندك اولاد وان المال الحرام اخره النار اللى بتحرق كل حاجه .

 



إدخل تعليقك ورأيك فى المدرسه