JINGHPAW  LAIKA


Jinghpaw Wunpawng Sha ni a matu manu dan dik ai Shanhpyi Laika

MADUNG  NPAWT

Laika Kanu

Ga Htai Laika

Sumrai Laika

Njang Kawng

Sinlum Bum

Putao

Pangwa

Lagwi Sawlaw

Myitkyina

Yangung

Myen Mung

Miwa Mung

Gala Mung

Yodaya Mung

Manau

J.W Hking

Nawku Jawng

Sumtsan nga Jinghpaw ni

Shanglawt

Hpaji Jarik

Ja Hta Pinra

Manam Gawk

Matut Mahkai

 

Jahta Pinra

 

Sawk  Tam  Gawk

 Google 

Num Amyu Kru

Anhte a htung tara hte maren nga yang Num a myu kru nga nga ai. Dai ni gaw Yu sa num , (mayu kasha) Mung num, Hting Ram num, Gawn num, Hkrawp num, Ning Ang num ni rai ma ai.

1. Yu sa num (mayu kasha )
Ndai num gaw tinang a kanu a Chyurum kahpu kayung ni a kasha hpe nan la ai num rai nga ai. Ndai jan a mying hpe masha shinggan de na ni gaw, kanu a kanam, karat sawng nan rai lu ai, kanu karat maili, kanu a kanam majing, Kanam makyin, ngu shamying ya ma ai . Ndai num hpe la ai shaloi shawng de na hpu ja ngam n nga yang gaw, galoi garai n hku n hkau yu ai tsasam num la ai daram n yak ai.

Hpu ja lam mung nnan shani mungga matut ja ngu ai hpe masha a man e, loi grak re ai mi-bang jang gaw, htawm hpang de tinang ngut jin ai shagu gumrawng gumra malap mali n re ai sha, aten ladaw lamang n hprai hkra, gun jaw gun ya let shatup jaw lu nga ai. Dai majaw mayu shayi, dami dama lahkawng maga shada myitsu ai hkrai rai jang, satap gaw grai loi ai hte pyaw htum ai num la lam re ai.

Wa sa ai num jan mung, nye kamoi kana jan a hkang hta shang nna, sutgan mungban dagraw ai jan, kadai tsasam a sali wunli ja katsing mi wa dagraw sha ai n rai, nga nna myit mu myit sim, myit pyaw ai hte kun dinghku hpe galai madu ai. Sutlu nga mai lam hta rai timung, shawng de na kamoi kana ni hta jan hkra shakut ai.

Malet nhprang manam ni hpe mung, grau nna jaw lu jaw sha hkra magan lam ni hta shakut ai. Kalang numrang shut shai ai lam nga wa hkra rai tim, n matsing chye ai. Mara raw loi ai. Tinang a madu wa hte kagu karat ni hpe mung, kamoi a kasha ni re ai ngu nna ngaw n-wai myit grau rawng ai rai.

2. Mung Num

Moi shawng de galoi garai n hku n hkau yu ai, nga ai buga mung tsan hkat ai Ja hpaga hkawm sa tim hpyen nat tsang na lam nga ai, shing re ai yan shada da hkau chyap na matu wawn la ai num hpe Mung Num nga ma ai. Ning re ai tsasam lahkawng hpe makyit mahkai nna matut ya ai num re ai majaw, n hpu n ru roi n ra shanawng shagyeng n mai di n galaw mai ai. Tsaw ra nja nhpra myit hte lanu lahku ra ai. Shut shai jang htawm hpang de na matu, ju shinga ru hka tai chye ai.

3.Hting Ram Num

Ya num Jaw ai ni hte num la na ni gaw, moi shawng de myit nngwi n pyaw ai lam, majan nhpan byin ai hte du, baw taw hkra byin yu sai rai nna, shat n sha, ntsin n lu, htinglup htingshang n rai hkra, koi gam nga ma ai. Shing re ai yan lahkawng gaw shawng de na dai atsu atsam n ngwi n ngawn na lam ni mahkra hpe shaprai shatsai malap mali kau nhtawm, shada da n-gaw nwai ai tsaw ra myit hte makai hkat let, hku hkau kanawn mazum lu hkra jaw ya ai, la ai, wa ai, num rai nga ai.

Dai rai nna shi a ntsa e mung la ai ni gaw, n shut n hpyit hkra,tsaw ra nja nhpra myit madun let, lanu lahku up bau sin na lit nga nga ai. Wa ai num jan mung, kaga yu maya num ni hta grau nna sadi sahka hkam sharang ai galu kaba myit rawng nna, n mai dumhprut ai, n mai malap ai. Hpa rai nga yang shada da shut shai wa jang, moi shawng de na, shada shada myit machyi ai lam ni, majan nhpan lam ni, bai galu byin pru wa chye nga ai.
Dai majaw shada da grai sadi sahka let hkungga hkat, ku hkat ra ai rai.

4. Gawn Num

Ndai num gaw tinang a chyurum kahpu kawa, shing nrai, kaga lam langai ngai hku nna, kahpu kanau daw ai wa si mat ai hpang ngam nga ai num gaida hpe, hta shinggyin gawn lajang lanu lahku la ai num rai nga ai. Anhte Wunpawng Jinghpaw sha ni num la ai shaloi, hpu ja bang ga ai.
Dai majaw num ni mung tinang a madu wa si mat wa hkra mi raitim, tinang a myit shadang nna, shanglawt hkawm na a hkang n lu ma ai. Si mat sai wa a kahpu kanau ni hte kawa daw ai ni mung kahpu kawa a si shat ngam shakre ai htung nga nga ai.

5. Hkrawp Num

Hkrawp Num ngu ai gaw, shawng de tinang a kaji kawa ni hte chyurum kahpu kanau daw ai wa langai ngai gaw, Buga ninghtawn kaga htawt nhtawn de nga mat sai. Raitim dai lakung lama ni hta shadang la sha ni, si htum mat nna shante lu tam tawn ai Dusat, Yam nga, lamu ga, madu jan kasha ni hte jinghku jingyu ni hpe, galai madu la na matu si ma mat sai ni a moi mang yawng hpe lup makoi nhtawm aprat asak ram nga ai Gaidawng Gaida ni hpe, hta shinggyin gawn lajang la ai num ni hpe ngu ai rai nga ai.

6. Ning Ang Num.

Ndai gaw n-gyi kanu hpe la nawng ai num hpe ngu ai. Makyin jinghku myitsu salang ni yawng chye hkra rai nna n hkungran ai sha, kanawn manang tai ai jan hta, shing nrai Bu hkawm sa ai lam hte poi shingra hkan shut hpyit ai kaw nna Na-um nasin hkum tai nhtawm kasha shangai ai jan hpe ngu ai rai nga ai.

Anhte a htung hta Mayu maga de na ni lama, myi man n nga ai, shingkang shingwang n rawng ai, kata re ai rai yai yang, ndai n-gyi kanu hpe la nawng ai ning ang num gaw manu ndan dik re ai zawn nawn kau chye nga ai. Shi kaw na shangai chyinghkai ai kashu kasha ni hpe raitim nau wa nyeng n nawn ai hte manu ni hte manu n jahpu chyoi nga ai.

Dau re ai majaw madu wa mung shi ngut jin ai ten hta num dung num ngu ai hkungran num bai la jat kahtap chye ai. Mung shawa a man e manu n hpu ai lam hpe kashu kasha, ma ni chye jang, myit n pyaw nna n ding n man ai hku galaw chye ai. Dai majaw moi na anhte a ji wa ni gaw, gara kanang buga de me hkawm sa tim amyu shayi ni hte n-gup aga shangwi shapyaw hkat ai hta lai nna, hkum shan du ai, shut hpyit amu ni hpe myitsu ni kadai mung n galaw ma ai. Shara n kau mi hta, N-gyi ma hpe tinang a ru a sai n matut, na matu tsasam mung de pyi dut kau chye ma ai rai.

Ya lahta de madun lai wa sai num amyu ni hta, Ning Ang Num gaw myi man n nga dik, manu n hpu htum ngu saga ai. Shing ngu hkra raitim,htinggaw langai ngai hta manu grau rawng nna reng ai kaga num ni a kashu kasha matu mara ni, si htum prai ma mat wa ai hpang, dai ning-ang num jan a matu mara ni sha ngam nga masai rai nna, shanhte gaw dai htum mat sai kahpu kanau ni a Sali wunli sut hkringhtawng ni hte rau ahkaw ahkang ni hpe shang dagraw la lu nga ai.

Dai daram re ai hpunda tsang de du shang madu wa ai ten hta pyi n dawng nyawt ai ni hte kaga tsasam masha nkau mi gaw, Hka hkyet ai hpang na hpunghkaw dawng, re ai ngu nna mung, lama ma galaw shut shai wa ai shaloi mung, Hkataw hkyi, Ru hkyi mutu ni rai nna rai nga ma ai ngu nna mung, jahpoi a sawng chye nga ai .Raitim shing re ai ten hta, “Wula lai yang gwi wau” nga ai mi ngu, bai htan chye ai rai.

Sara Hkyeng Nang

Matsing: N'dai laika ngau hpe Kachin Net kaw nna la bang da ai.