JINGHPAW  LAIKA


Jinghpaw Wunpawng Sha ni a matu manu dan dik ai Shanhpyi Laika
 

Ga shagawp Laika 23 : 15

Ngai sha e, na a myit masin hta hpaji rawng yang. Ngye a hkum hkrang hte myit masin kabu gara na ra ai.

 
 
 
 
 
 
     Sawk Tam Gawk

JINGHPAW WEBSAIK:

AKSYU

Alen Zup

FKBC L.A

Gindai Pan

JLH Japan

Kachin

Kachin Association of Australia

Kachin Blog

Kachin Golf

KachinMedia

Kachin Today Radio

Kachin Wun jat

KAONA

KBC

KNO

KNUS Japan

Metta

Mungga Shanan

New Zealand Kachin

N. Seng Hkum

Padang Dawng Hkawn

Prince Of Sharon

TKBC Japan

The Kachin Net

The Kachin News

The Kachin Post 

The Kachin State

WunpawngKalang

Jinghpaw ngu ai mying hpe Kaning Di na

Moi Gaw Jinghpaw ngu ai mying daju hta, Jinghpaw, Lhaova, Lachid, Zaiwa, Lisu, hte Rawang ni yawng rau rum nna nga pra Lai wa saga ai. No. (1) Munkkan Majan hta pyi, bawsang ni a kaji kawa share shagan ni gaw, Jinghpaw ngu ai mying hte Mesopotamia Mungdan pyi she du hkra, shang lawm gasat lai wa yu sai. No. (2) Mungkan Majan hta gaw, Jainghpaw Hpyendap ngu ai hku labau shang magrau grang lai wa sai re.

Jinghpaw ngu ai mying hku nna, “ Jinghpaw Mungdaw” ngu ai hpe mung lu la saga ai. Dai lam ni gaw amyu bawsang yawng “ Jinghpaw” ngu ai mying ningpawt langai mi hta jawm kahkyin gumgin nna lu la ai padang ninglaw ni rai nga mali ai. “ Jinghpaw” ngu ai mying gaw gaja wa nan padang dip la lu ai mying rai nga ai gaw teng nga sai. Raitim mung “ Jinghpaw Mungdaw” ngu ai hpe lu la ai 1948 ning January (10) ya a hpang e, mungmasa party hpaw ninghtan na shani kaw nna, bawsang du salang ni, kasa ni ga shaga wa masai.

“Pawng Yawng Ram Rawt” ngu ai mungmasa party hpe hpaw tawn sai rai tim, Jinghpaw ni a kaji daju Pawng Yawng wa a mying lawm ai majaw, bawsang ni yawng shang lawm manu ai mying hpe she shalat ga, nga nna htap htuk ai mying hpe tam ma yang, “ Jinghpaw Wungpawng Hpung; kachin National Congress (K.N.C)” ngu ai mying hpe shalat la lu masai. Ndai mungmasa Party a mying hpe 10-1-1949 ya shani galaw ai Jinghpaw Mungdaw Nhtoi Masat Manau Poi Kaba hta yawng myit hkrum let Jawm sharing da lu sai re lam chye lu ai. Raiti mung Jinghpaw Wunpawng ngu ai mying kata kaw, amyu sha ni yawng zim sha myit hkrum nga ma ai n rai; Jinghpaw Shanglawt Rawt Malan Hpung hpaw dat ai hpang kade ning wa nna yang, Jinghpaw ngu ai mying hta n hkrum wa ma ai majaw, “Jinghpaw Wunpawng” ngu tawn sai mying kaw na “ Jinghpaw” ngu ai hpe di kau n htawm “Wunpawng” ngu ai shangteng amying nnan hpe shalat dat masai.

Ya daini na aten hta gaw, “Wunpawng “ ngu ai mying mung amyu sha yawng hte seng ai mying bai n rai wa sai da. 2001 ning December shata hta galaw lai wa sai Ninggawn Hkumra Manau Poi Kaba a Wunpawng Htunghking Bawngban Hpawng kaba kaw, bawsang manga de na kasa ni gaw. “Jinghpaw” “Jinghpaw Wunpawng” “ Wunpawng” ngu ai mying ni hpe kaga mi n lang chyai nga ai sha, mungkan e hkap la masat da ya nga sai “KACHIN” ngu ai mying hpe mahtang she jawm lang saga, nga nna bawngban tang madun ma ai.

Dai shani na bawngban hpawng hta, bawsang kasa ni mahkra kaw na grau laklai ai hku bawngban tang madun ai gaw, Yangon kasa wa rai nga ai. Shi tang madun ai lam ni gaw, Anhte Yangon buga de na kasa ni yawng “ Jinghpaw” ngu ai hpe ra saga ai. “ Jinghpaw Wunpawng” ngu ai mying hpe hkap la ga ai. Rai ti mung myit n hkrum ai bawsang ni nga ma ai. Mahtai hpe tam yu yang, “Jinghpaw Wunpawng” ngu ai mying daju kaw jinghpaw bawsang a mying lawm taw nga ai. Jinghpaw Wunpawng ngu ai mying daju a kata na bawsang mying jahpan hta mung “ Jinghpaw” ngu ai bawsang mying naw lawm taw nga ai.

Jinghpaw ni gaw shat makai langai mi shajan ai hte bung ai, nga nna tsun shaleng wa masai. Daini na prat gaw, rapra ai lam hpe sha ra sharawng ai prat rai nga ai. Bawsang ni yawng gaw ahkaw ahkang maren sha rai ra ai. Jinghpaw ni mung shat makai langai sha sha mu ga. “Jinghpaw” ngu ai mying hpe mahtang bawsang ni yawng a amyu sha mying daju hku hkap la ga. Jinghpaw bawsang ni mahtang, bawsang hpe galai kau mu. Uma dap ni nanhte a kaji daju Shapawng Yawng wa a mying hpe la nna, “SHAPAWNG YAWNG SHA NI” ngu mu. Grai madat pyaw nna grai tsawm ai mying hpe lu tawn manit dai,” ngu ai ra sharawng myit lu ai lam (Opinion) hpe madun lai wa masai.

Laika ka ai wa gaw, nye a chyinghkai kawa, nye a labau sara wa asak naw hkrung nga ai aten hta, “ Moi na Jiwoi Jiwa ni, Lhaovo, Lachik, Zaiwa, Lisu, Rawang amyu lakung ni yawng hpe Jinghpaw amyu ni re, ngu nna hpa rai tsun shamying masat hkap la tawn ai rai kun? Ndai ten hta gaw, Jinghpaw ngu ai hpe n kam tsun lang wa ai majaw, “Jinghpaw Wunpawng, ‘ ‘Wunpawng' ngu ai mying ni pru wa sai,” ngu san yu ni ai. Nye a dai ga san hpe chyingkai wa bai htai hparan dan ai lam mung asan sha rai nga ai.

(1) Anhte Jinghpaw ni gaw, kahpu kanau, mayu dama, kashu kahkri nga nna, shada tsawra makyit mahkai mahkri shawn nga ai amyu ni rai ga ai. Bawsang ni hta mung anhte hte bung ai kun?, n bung ai kun? San yu mu!

(2) Jinghpaw ni gaw, lamu ntsa na Mu Sinlap Nat ni hpe jaw jau hkrat wa ai amyu ni rai ga ai. Bawsang ni kaw mung nga ai kun? San yu mu!

(3) Jinghpaw ni gaw ma shangai ai hte rau, jahtawng htu ai baw amyu ni rai ga ai. Bawsang ni mung galaw ma ai kun? San yu mu!

(4) Jinghpaw ni gaw Ji Nat Mahtum Mahta ni e sharung shakau jaw dat ai Shawa Nang Kachyi hpe jahpu sharing nna, mayu shayi lam hta jai lang ai amyu rai ga ai. Bawsang ni mung lang ma ai kun? San yu mu!

(5) Jinghpaw ni the htunghking makam masham bung ai amyu ni rai yang gaw, labau rum ai amyu sha ni rai na re. Makam masham hte htunghking lailen ni n bung jang chyawm gaw,labau n rum ai amyu she rai na ma ai re.

Hpunau Sam ni hte shaning aprat law law rau kanawn mazum nga pra laiwa saga ai, raitim jinat makam jaw jau ai lam hkan sa ai htunghking lailen lam ni hta n bung hkat nga ai majaw an hte hte labau n rum, amyu n rum ai ni she rai ma ai. Ning ngu nna chyinghkai wa tsun sanglang dan ai mahtai ni gaw, bawsang shagu hpe labau rum n rum, amyu rum nrum, jep sawk dinglik yu lu na matu lam matsun ni she rai nga ai.

Ya ten na bawsang myitsu du salang, ramma nkau mi gaw , "Jinghpaw" ngu ai mying hpe amyu sha yawng a gumhpawn ai shingteng amying kaba hku myit hkrum masat la nhtawm, Jinghpaw bawsang ni mahtang, bawsang mying kaga alak mi galai kau yang mai kaja na re ngu ai myit masa rawng ai lam ni nga wa ai lam, soi sam na lu ai shaloi, nye a myit hta grai na kabu nngai. Amyu sha ni yawng myit hkrum kahkyin gumdin lu na matu, myit mada shara kaba nan rai sai, ngu nna mung kam nga nngai.

Amyu sha kahkying gumdin lam hte seng nna, ngai Jinghpaw la wa langai mi a chye na hkap la hkam sha ai lam gaw, bawsang ni ayai aya n re ai sha, Jinghpaw ngu ai amying shangteng hta kahkyin gumdin ai lam teng teng lu la na she rai yang gaw, anhte Jinghpaw bawsang Uma dap ni mung, hpushawng hpuba ni a ra shawrawng byin shangun mayu ai lam hpe kabu gara hkap la lu na ga ai re.

Anhte Jinghpaw bawsang ni a shingteng amying ningpawt gaw, “Shapawng Yawng” ngu ai rai mali ai. Ya she mying nnan bai tam gyin shalat la ra ai amyu ni n rai ga ai. Moi moi kaw nna “ Pawng Yawng Sha Ni” nga nna nga pra taw chyalu ni she rai ga ai. India de na Jinghpaw ni mung, “Shapawng Yawng Singpho” ngu ai mying hte nga ai da.

Jinghpaw Wunpawng bawsang ni yawng, Jinghpaw ngu ai amying shingteng hta gaja wa nan kahkyin gumdin nga na she teng ai rai yang gaw, Jinghpaw bawsang ni mying galai na hte seng nna, manghkang kaba hpa n nga na re, ngu kam nngai. Dai re magaw, Jinghpaw bawsang ni n dai aten kaw nna, sung sung myit yu bawngban jahkrup magang wa lu na matu, kraw dung salum kata kaw nna saw lajin dai nngai law.

 

Dingyau Zau Ing - Myitkyina

Matsing: N'dai laika ngau hpe Kachin Net kaw nna la bang da ai.