JINGHPAW  LAIKA


Jinghpaw Wunpawng Sha ni a matu manu dan dik ai Shanhpyi Laika

MADUNG  NPAWT

Laika Kanu

Ga Htai Laika

Sumrai Laika

Njang Kawng

Sinlum Bum

Putao

Pangwa

Lagwi Sawlaw

Myitkyina

Yangung

Myen Mung

Miwa Mung

Gala Mung

Yodaya Mung

Manau

J.W Hking

Nawku Jawng

Sumtsan nga Jinghpaw ni

Shanglawt

Hpaji Jarik

Ja Hta Pinra

Manam Gawk

Matut Mahkai

 

Jahta Pinra

 

Sawk  Tam  Gawk

 Google 

Jinghpaw Ngu ai Kadai Rai ta?

Ga Hpaw

Moi chyai nma pri npra, kaju kajat, chyaloi nhkoi, prat kaw nna tinang dai Jinghpaw ngu shamying daidaw gindai la, India maga na masha ni Singhpo, Miwa ni Yeh-jin-Shan Htu, Hpunau Sam ni Hkang, Myen ni Kachin ngu shamying da ai, Myen Mung Dingdung, Miwa Mung Dingda, Gala Mung Sinpraw hte Yudaya Mung a Sinna lapran bumlang shagawng masha amyu ni kadai rai ta? Ndai ga san hpe amyu sai rawng ai masha hkum shagu krawdung kaw bang, sawn sumru, jen sawk sagawn, mahtai tam shaw, manat jum shangang, tsun shamying, kajai gumhkawng, shagrin da ra ga ai.

Ndai labau gindai hpe amyu asai, htunghking, arawng alai, nga sat nga sa sat lawat, nchyan shaw kyang lailen hku madun nga dingyang rai nga ga ai. Rai ti mung dinghta mungkan prat maka, mabyin masa shingra hta hkan nan galai jashai, shingnip ka up kau hkrum ra ai lam mung nga nga ai. Myen Mung shanglawt lu, Munghpawm mungdan de wa ai shaloi, masha amyu bawsang manga nga ai hku masat da ai kaw ya latsa sumshi manga rai nga ai hku jep sagawn hkap la da sai. Ndai mungkan a mabyin shingra maka hku nna mung, bai anhte amyu asai ni kahkyin gumdin shabawn nga na hpe myit yaw shada nna “Wunpawng” ngu ai ga shalawm shamying da ga ai. Ya dai kaw nna “Jinghpaw” n shalawm “Wunpawng” ngu sha tsun lang ai madang hta rai nga ga ai. Dai majaw “Jinghpaw” ngu ai kadai, “Wunpawng” ngu ai lachyum hpa rai nga ai lam sawk sagawn dinglun la shara nga nga ai.

Jinghpaw amyu sha ni laika n lu, masat masa tawk ka da ai n nga, n-gup hkai maumwi ginlen hkrat wa ai hkringhtawng sha lu ga ai. Dai n-gup hkai maumwi prat ban, nga pra buga, mazing jahting ai ji wa langa ni hta hkan nna kahprai shai chye ai. Dai majaw Karai shangun kasa anhte a chyeju madu Sasana Sara kaba ni, maigan hpaji ninghkring ni sawk sagawn ka mazing jahting da ya ai gaw amyu sha sai labau a jahtum chyalai rai nga ai. Ndai “Jinghpaw Ngu ai kadai rai ta?” ga ngau hpe sagawn ka na mung dai laika ni kaw ningpawt shatai ka ai rai nngai.


Jinghpaw

Jinghpaw ngu ai amying shingteng a ningpawt ninghpang mawmwi lahkawng nga ai. Hpan Wa Ningsang Chye Wa Ningchyang Ninggawn Wa Magam Karai Kasang gaw dinghta mungkan nga yawng nga pra sak hkrung mahkrung hpe hpan da sai. Dai hpan Majoi sha-u Ing wa sai. Hpan Wa a Ningsang gaw shinggyim sha Ja Nyi (Shinggyim Num) yan Ja la (Shinggyim La) hpe Awang Chying Tawt (manau dum chying tawt kaba zawn) kaw bang shawaw shalawt la ai. Sha-u Ing mat ai shaloi Ja Nyi yan Ja La gaw dai Awang Chying Tawt hpaw la nna lawt pru wa lu sai. Dai Chying hpaw pru lawt wa, shinggyim masha tai sa wa ai hpe la nna “Chying hpaw” “Jinghpaw” ngu ai amying shingteng byin pru wa ai nga hkai ga ai.

Bai Jinghpaw ngu ai shinggyim amyu sha ni dai ni du hkra kanang gara shara re nchye “htaw de” ngu sha tsun ai Majoi Shingra Bum kaw nna nga pra yu hkrat wa ai. Majoi Shingra Bum kaw nna Chyai Hku Majoi, Hkrang Hku Majoi, Mali Hku Majoi tsang hte tsang nga pra hkrat wa ai. Dai hpang Hka Hku Majoi, Hogawng Majoi, Sinpraw (Sadon Sama Manmaw) Majoi, Sinli Majoi ngu shamying la mai nga ai.

Dai ni na hku rai yang Putao, Sumpra Bum Majoi, Myitkyina, Manmaw, Katha, Namhkam, Nampaka, Kutkai, Lashio, Kentung Majoi, matut nna May Myo, Taunggyi, Mandalay, Yanggung Majoi, dai kaw na Chiangmai, Kualalumpar, Singapore, Japan, Australia, America Majoi ngu mai shamying la nga ai.

Ndai Majoi Shingra Bum kaw nna nga pra hkrat wa ai shinggyim amyu ni gaw masha madang hta garai n nga, dusat zawn naw zai ai ni rai ma ai. Dai zawn tsang hte tsang nga pra sa wa yang, Chyai Hku Majoi du ai shaloi, dai lamu ga kaw hkai, galaw sha chye wa, u wa yam nga rem sha rai sai. Ndai Majoi kaw shada hpawm de, chying ring myi hpaw, gan-ga, galaw lu galaw sha nga lu sai majaw, “Chying saga ai;’ ring saga ai, chying saga ai, hpaw saga ai” “myi hpaw gan-ga masha tai saga ai” ngu dai daw shamying la ai kaw na “Chyinghpaw’, Jinghpaw” ngu ai amying shingteng lu wa sai.

Ndai hpu nau Jinghpaw sha ni nga pra kanawt hkat wa yang, anhte amyu asai htung hking nga ai hte maren, kanau hpungdim wa gaw nta dinghku madu, nta sin let shadung shanu nga nga ai. Kahpu ni gaw shawng lam shawn amu de nchyan shaw kanawt hkawm abram sa wa ai. Kahpu ni jan du tim nta n du wa, nhtoi hti nna na mat wa re majaw kanau kahpu ni hpe hkan tam sa wa ai. Kahpu ni hpe nhkrum nmu, lagaw hkang, hpun kawa nam hkyen kahtam da ai hkang sha mu ai. Langu langa hpun yau kahtam di matsun prut pru wa ai hpe mu mada ai. Grai marit makun let hkan tam tim nmu nna “Oh hkang hkang nga ai”, hpu nau Hkang amyu byin wa, bai “ Hpa n ra, ngai hpu wa bai ‘Kayin’ wa na ra ai” ngu ai kaw na “Kayin” amyu tai wa ai ngu hkai nga ga ai. Sam Myen ( grau nna Sam Myen, Shan Bama) hte sai matut hkai da ai maumwi ni nga nga ai.

Pawng Yawng

Lahta na ningpawt ninghpang chyurum labau gindai hku yu yang “Jinghpaw” ngu ai gaw, shinggyim danghta, hpraw chyang htoi hkyeng nsam kap ai masha yawng rai nga ai. Miwa Gala Myen Sam amyu a lapran e nga ai amyu baw hpan langai mi rai nga ai hte maren, tup hkrak ru sai gawn, daidaw shamying da ai lam nga ra ai. Awang Chyingtawt hpaw nna pru wa ai Jinghpaw, bai Chyai Hku Majoi kaw chying ring hpaw wa ai Jinghpaw kadai re ai lakung lama amyu asai hku gawn madi madun ka da ai lam n nga ai.

Anhte a ban prat e Wa Hkyet Wa Magam hta ginju nna gawn hkai hkrat wa ai hpe gaw yawng madat hkam la da nga ga ai. Kasha ni La N-gam Marip Wa Kum Ja, La Nnaw Lahtaw Wa Naw Lawn, La Nla Lahpai Wa Daini La, La Ntu Tsit Wa Tu Hkum, La Ntang Maran Wa Ningshang, La N-yawng Yawng Hkum Wa Yawng Den, La Nhka Hka Sh u Hka Sha Udi Chyang Maja ngu gawn hkai ai na hta rawng nga ai. Ndai hpu nau ni gaw Shapawng Yawng amyu matu ni rai nna, yawng hpe gumhpawn nna Pawng Yawng sha ni ngu tsun shamying la sai re. Jinghpaw ngu chyalai alak mi shamying lang ai n nga ai sha, Pawng Yawng ngu mahtang shamying lang lai wa saga ai.

Kachin

Anhte a Sinna Sara kaba ni sawk sagawn da ai hku rai yang, ndai amying shingteng gaw Miwa ga Yei-jin (Yeh-jen) kaw na byin wa ai hku ka da ma ai. Miwa Yunna pa ga kaw nna Jinghpaw bum ga lai di lawu pa ga Manmaw, Katha, Mandalay du, dai kaw na Myen hte kaga amyu hpu nau masha ni hte shaga yang Yei-jin amying tsun shalawm, madat la ai ni a na hta hpang e Kachin byin wa ai hku gawn da ma ai. Miwa masha ni anhte hpe zai ai, gasat agrawp dang sha ai bum masha Shanhtu; htaw bum shagawng hka lwi pru wa ai hka hpawk masha, hka hpawk yang masha hku shamying da ma ai. Ndai bum pungding, hka hpawk hka ntsin lwi hkrat wa ai hte shabung ginrun shamying hkrum ai mung Karai majai shingteng amying ngu hkam la shara nga nga ai.

Bai lawu pa ga Myen ni kaw Sasana galaw ai Sara Kaba Kincaid gaw lahta Myen Mung amyu sha ni hpe mung grai myit lawm ai hte wa sagawn ai. Mogaung du yang gat seng makau kaw Jinghpaw La langai mi hpe mu yang kaga ni hte loi shai nga ai mu nna chye mayu ai hte “nang kadai rai ta?” ngu san dat ai da. Dai la wa gaw Jinghpaw htung lai nga ai hte maren, mying, amyu ntsun ai sha buga shara hta ningpawt nna, “Ga Hkyeng la wa rai nngai” ngu htan dat ai da. Ndai Ga Hkyeng ga gaw Mogaung a Sinpraw maga bum, Maran ga re nga ma ai. Ndai la wa tsun htan dat ai ga hpe la nna, Mogaung de gat sa gat wa re ni hpe “Ka Hkyen” nga tsun shamying hpang wa sai. Moi shawng de ka da ai Sasana laika ni hta “Kahkyen” nga she ka ai. Dai kaw na hpang e “Kachin” tai wa ai nga mung hkai ma ai.

Dai ni anhte grau myit hkawn hkam la ai Kachin gaw alak mi san rai nga ai. Jinghpaw bum masha ni pa ga Manmaw, katha hkan jum, ngaru banau, hpun nba mari sa yang, htingga ka kaba, shingnoi gun nna sa ai. Dai kaw tsapa, jahkrat chyaru (Hpye gang), mahkri, mahkri jahkraw, naw hpu ni bang gun sa ai. Pa gat de du, dung kawam nga yang,”ndai hpa rai ta?”nga san jang, kaga hpa nchye tsun “ka ka” ngu sha tsun dat ai da. Masha ni dai ka hpe mada yu, makau hku lai wa yang, ahkri nga manam, bai dai masha wa a hkum salat mung nnga manam re kaw na, dai bum masha hpe mu jang, “Ka-Chin ngu mying jaw shamying ai kaw na Kachin byin wa ai hku hkai nga nga ai.

Bai Jinghpaw bum masha wa gaw pa ga hkan hkawm yang shachyut shachyat katsawt garawt gat manau ai zawn hkawm ai hpe pa ga masha lawa ga Myen Sam ni mu ma ai. Dai sha n ga Jinghpaw poi shingra shagu ka manawt nga ma ai. Grau nna Myen hkawhkam prat, Inglik prat hta du magam ni lai wa sa wa rai yang ka manau hkalum la nga ai. Dai hpe yu nna “Ka ai ni” ‘Ka mayu ai ni’ (Kachin) ngu mying jaw shamying ai kaw na Kachin byin wa ai hku hkai nga nga ai.

Lahta na ‘Ka Chyahkri’ Ka, masha chyahkri’, shing n rai, ‘Ka mayu’ kaw na byin wa ai Kachin rai yang, ndai gaw amyu shada roi rip jahpyak hkat ai ga kaw na byin wa ai ga rai nna n mai hkap la ai mying rai nga ai. Kaja wa ndai lachyum hpe chye na hkam sha ai hku hkau ai Myen Sam kaga hpu nau ni gaw anhte hpe ‘Jinghpo’ nga she shaga ma ai.

Bai anhte mung san yang moi gaw shanhte a man e ‘Jinghpaw’ she ngu la ga ai. Ndai prat hta she shawng hpang ndum, n myit n sawn, lachyum n chye ai sha “Kachin” ngu aloi sha tsun shamying la nga ma ai. Maga mi de n sawn n htang ai sha mauhpa matsaw ntsa chyalai shingkang gaw naw madun dan da nga ai. Dai gaw Munghpawm Myen Mungdan masha amyu bawsang ni hta ntsa jahtum nambat langai shara, Myen laika hkum shawng na lahkawng (ka gyi hkagwi) yan nan madu la da nga ai. Maga mi hku yu yang, Miwa ni jaw ai ‘Bum Pungding Hka Hpawk Masha’ ngu ai shingteng amying hpe madi shadaw shangang ya nga ai. Ndai lachyum hku nna anhte Jinghpaw amyu sha ni, ndaw nsa, hka hpawk, kridung daju tai nga na hkam la da ra ga ai.

Jinghpaw Amyu ni

Lahta e gawn ai anhte a ginru gindai labau hku rai yang, Jinghpaw ngu ai gaw chying ring myi hpaw gan-ga sai shinggyim masha yawng hpe shamying ai amying re ai. Dai majaw Jinghpaw ngu ai gaw amyu asai, ga baw hpan langai ngai hpe ginhka shamying da ai n rai, dinghta shinggyim masha yawng hpe tsun ai rai nga ai. Dai kraw dung myit masin hte nan kadai Myen, Sam, Gala, Miwa hpe raitim mung, grau nna myit hta ai n nawn jang ‘Jinghpaw mung’ ‘Jinghpaw nang yaw’ngu abun tsun ai hpe dai ni grau nna asak 50,60 kaba sai myitsu salang ni naw dum shajang nga ga ai.

Myen, Sam, Gala, Miwa mungkan de kaprau gale du wa, grau nna Shanglawt prat hta she shanhte shamying ginhta da ai hta ningpawt nan ‘Jinghpaw’ ‘Kachin’ngu la ga ai. Jinghpaw, Nung, Rawang, Lisu, Maru, Lashi, Zi ngu ai gaw kaga amyu ni nchye, anhte amyu kata tsun shamying masat la hkat ai amying she rai nga ai. Dai hku shamying masat hkat ai mung amyu asai, baw hpan, aga hta madung ntawn ai sha, buga nga gin ra hpe madung tawn shamying hkat ga ai.

Dai ni na myu sha baw hpan amying shingteng ni garai n chye hkat, garai n masat yang, Hka Hku Mum Rawng, Nbawn Pisa, Hogawng, Htingnai, Sinpraw, Sinli masha ngu she tsun shamying ginhka hkat ga ai. Dai kaw nna Putao, Sumprabum, Sadon Sama, Gauri Krung, Loi Je, Nbaw Nam Hkyek zawn re ginwang shingwang hku bai ginhka shamying hkat nga ai. Dai kaw na kalang mi bai kahtawng nhtawn daw hpai hku bai shamying ginhka hkat ga ai. Maru ga hku Jinghpaw hpe bum wora maga mayan kaw nga ai masha phokvo ngu shamying ai gaw sakse rai nga ai.

Ndai zawn buga nhtawn amyu asai hku ginhka shamying hkat ai hta Jinghpaw sha ni gaw Du Gumshem Magam sai rawng shagrau la, kaga wa hpe yu kaji shagrit,japoi jahpyak ai lachyum shapraw ai kyang galoi mung byin chye nga ai. Ga shadawn, Gauri masha ni hpe kaga ni e galoi mung Jinghpaw hku nsawn, masha jahpan hta pyi nkam shalawm ai madang hta rai chye ai. Dai hte maren Gauri masha ni mung tinang dai Jinghpaw masha ni ngu galoi nhkam la ai.

Hkalung hka wora hkran Nhkum Krung Alawbum masha ni hpe she ‘Jinghpaw mana gaw Nhkum, U mana gaw Ugam’ ngu atsun noi nga ai. Dai hte maren Jinghpaw Nhkum ni a n-gup hta mung Gauri masha ni Jinghpaw nsen n lu shapraw, Jinghpaw shadang hta n dep nga ai majaw ‘Gauri letba ni’ nga bai tsun hkya jahpyak da nga ai.

Gairi krung dingdung pai de nga ai Maru masha ni hpe rai yang ‘Maru Gwi ju ni’ nga bai jahpyak shamying da nga ai. Ndai zawn buga nhtawn hku sha n ga, kahtawng langai mi kaw mung daw hpai, htinggaw, amyu lakung hku shamying jahpyak hkat ai lam nga nga ai.

Lahta na labau gindai atsawm yu yu yang Jinghpaw ngu ai amying lakung kaga san n nga ai. Maru, Lashi, Azi, Lisu, Nung, Rawang ngu amyu asai hku ginhka hkat ai lam n nga ai. Yawng Jinghpaw re ai. Tinang ginru gindai labau hku ‘Chying Hpaw’ ‘Jinghpaw’ ngu gawn shamying hkam la, Hka Hku, Nbawn Pisa, Hogawng, Htingnai, Sinpraw, Sinli ngu tsun karan hkat ai sha nga ai. Kaga maigan amyu ni e ‘Kachin’ ngu tsun shamying da ai hpe hkam la ai lam sha nga ai. Bai Sinna hpaji ninghkring, grau nna Sara kaba Ola Hanson nan Jinghpaw ngu ai ni hpe ga nbung shai hkat ai hte sha n mai karan ginhka lu ai, amyu sai, htung hking, kyang lailen langai she re ai lam ka da ai.

Ndai Jinghpaw ngu ai ni hpe maju nna Myen, Miwa, Gala, Ingalik Mung Up Hkring Mang ni matut mahkai pru shang lai wa masai. Sasana hpung ni mung du shang wa sai. Sara Kaba Hanson gaw masha baw sai hpaji hkringmang ( linguist ) re ai hte maren, akri akrai ginlen sawk sagawn nna Jinghpaw amyu sha ting mai shabawn hkrum ai dai ni na ndai Jinghpaw laika ga woi shajup lang sai.

Dai ni na mabyin hku tsun ga nga yang, ndai Jinghpaw ga san n re ai. Maru, Lashi, Zi, Lisu, Nung, Rawang ga hte sha n ga, Hka Hku Hogawng Gauri Lahtaw ga hte shai ai Lana ga she rai nga ai. Lana ga gaw Gauri Krung, Nba Pa Lahtaw ga hte Kai Htik lapran Manmaw Manje Pa lahta maga bum rai nga ai. Dai aten na Sasana ningpawt daju shara amyu sha hku yu nna shawng du nga ai Sara Kaba Roberts gaw Gauri ga hpe npawt shatai galaw na aja awa myit makun ra sharawng shakut ai hpe gawn chye lu sai.

Sara Kaba Roberts hpe kahpu kawa ningpawt shatai nna Jinghpaw karum sara nkau mi hpe woi nna Jinghpaw ga hkan sawk jep sagawn hkawm ma ai da. Bum hkyet langai mi kaw du yang jawm hkring sa la nga yang, Sara Kaba Roberts gaw, ‘Ndai shet i?’ ‘Hkyet i?’ ngu san ai da. Dai hpe Sara Damau Naw gaw ‘Hkyet’ ngu htai ya ai da. Dai shaloi Sara Kaba Roberts gaw ‘Lasa mung nang ngai fang de n lawm i ?’ ngu htai lai hkat ai lam moi lawm sara usa ni jahta dinglun chyai hkat ai ga na yu ga ai.

Dai ni Jinghpaw jahpan hta shalawm da ai Hka Hku, Hogawng, Nbawn Pisa, Htingnai, Gauri, Sinpraw, Sinli ga ni shada nbung hkat ai. Htingbu Jinghpaw Nhkum ni gaw ‘mam’ hpe ‘ma’ nga tsun ai. Gauri ni rai yang ‘hmam’ nga ai. Maran Lana ga hku dai ni na laika ga ‘re’ hpe htingbu Lahtaw ni hrree nga jang, sumwum sumwaw shagu hrre hrre nga ai nga tsun ahkya da nga ai. Ma nbat hpe Zi hte Gauri ni gaw ‘boi chyi’ nga shamying bung ai. Ndai zawn Jinghpaw amyu kata e buga ginra hta hkan nna bung ai shai ai aga, kyang lailen htung hking ni nga chyalu rai nga ai.

Ndai zawn shai hkat ai hpe ndai laika ga (maran lana ga) hte jahkrum la, jahkrum ya, Jinghpaw amyu nga sai. Daw gaw kalang mi bai anhte amyu hpe Karai Kasang a Mungga hta lamik kumla hku chyalai michying shangun, hpaw shangun dat ai lam rai nga ai. Jinghpaw, shing n rai, dai ni na shamying ga hku Jinghpaw Wunpawng ngu ai kadai re ai hpe adan aleng hkrak masat madun da sai re. Ndai laika, ndai ga hte Jinghpaw majing byin wa sa ga ai. Hka Hku Duleng, Nbawn Pisa, Gauri langa, Lisu, Maru Lashi, Zi myit shanang nan “Jinghpaw” “Jinghpaw Laika” ngu alak mi sawn ya, sawn la, yu la shara n nga ai.

Wunpawng n'rai

Wunpawng ngu ai ga gaw Jinghpaw ga nan rai ti mung amyu asai labau hku ‘Chying Hpaw’ Jinghpaw hte n shabung la lu ga ai. De lachyum gaw, kahkyin gumdin, myit mang hkrum shabawn, shingkang shingwang byin nga ai hpe tsun ai rai nga ai. Wan gaw, Wunli wun-gau, shingkang shingwang rai nna, pawng gaw kridung, pawng shabawn, hpun nu a kri pawng hte shabung la ai lachyum rai nga ai.

Ndai ga gaw Shanglawt Prat 1946-48 ning hkan nan lang hpang wa ai ga kanu rai nga ai. Jinghpaw amyu sha ni ‘Jinghpaw’ ngu ai mying n lang ai sha ‘Pawng Yawng’ ngu ai mying mahtang lang ai. Inglik Prat, Japan Prat, Shanglawt Prat ni hta Pawng Yawng Ram Rawt nga ai Hpung ngu ai mung masa hpung mung hpaw da sai.

Ndai Pawng Yawng gaw Wa Hkyet Wa a matu sha Pawng Yawng kaw nna shamying la ai. Dai kaw Nung Rawang, Lisu, Maru, Lashi, Azi nlawm ai ngu ding lun htai lai hkat ai lam nga wa ai. Dai majaw Jinghpaw amyu sai ting hpe zinlum kahkyin la ai hku Myitkyina Manhkrin kaw 1948 ning hta Inglik hpe malan ai India Gala mung masa Hpung INC (Indian National Congress ) hpe kasi la nna KNC ngu ai mung masa hpung kaga alak mi woi hpaw da sai. Ndai gaw ‘Wunpawng’ ngu ai Jinghpaw ga Kajai gara lang hpang wa ai npawt nhpang rai nga ai.

Dai majaw ‘Wunpawng’ gaw Jinghpaw’ a malai amying shingteng n re ai. Jinghpaw ngu ai amying shingteng hpe shapu jahtoi, shangang shakang, jahkum shatsup, wundan shapraw shagrau dat ai ga she rai nga ai. Jinghpaw amyu lakung ni yawng hkrum, kahkyin gumdin, wunli lu wundan pru, hpawm de shingkang shapraw madun nga ai hpe lachyum shapraw madun shaleng dat ai ga rai nga ai. Dai majaw shinggyim amyu sha ni myit hkrum kahkyin gum din nga ai lachyum hku kanang mung mai lang ai ga rai nga ai. United National ( UN ) hpe Mungkan Wunpawng Hpung ngu lang nga ga ai.

Ndai krawdung shingra lachyum hte maren ‘Wunpawng’gaw amying shingteng rai nga ai ‘Jinghpaw’nre ai. Jinghpaw a malai Wunpawg san lang na lam n nga ai. Hpamajaw nga yang ‘Wunpawng’ gaw shakup shatsup shapu shapan ai ga ‘adjective’, amying shingteng “Jinghgpaw” “nounce” nre ai. Chye chyang kunghpan, mungkan prat madang dep nga sai jinghpaw amyu sha ni rai nga sa ga ai hte maren, atsawm jep sawk sagawn, shangang shagrin sa wa ra ga ai.

Ning rai chye chyang, mungkan prat madang hta rai nga sa ga ai hte maren, shawa na ra nsen machyu, moi na bum maling hkaraw, yi hku hkan majoi shangawn, jahtau marawn hkawm, moi na anhte a loi daw shingra hte ka-up kahprwi shamat kau ai n byin u ga sadi ap nawng nga ga law.


Rev Maran Yaw

Matsing: N'dai laika ngau hpe Kachin Net kaw nna la bang da ai.