Hpaji Manau


Jinghpaw Wunpawng Chyum Hkawlik 75 ning hpring Lungseng Jubili hpaji manau

1. KARAI KASANG KAW NA HPAJI HPYI LA AI MANAU

1.1 Hpa majaw hpaji manau dum ra ai lam

Hkawhkam Labau Laika Lahkawng, daw kaba langai daw kaji 10 hta, Shawlamun Hkawhkam gaw, law la ai Israela amyu masha ni hpe jeyang uphkang, daw dan, hparan lu na matu Karai Kasang kaw, 'Hpaji byen-ya hte chye chyang ai myit nga ai hpe jaw e law' nga nna hpyi atet la ai hpe mu lu ai.

Jinghpaw Wunpawng amyu sha ni gaw Manau dum ai amyu ni rai ga ai. Manau hpan law law nga ai hta sutgan ra jang sut manau dum nna, Karai Kasang hpe sutgan hpyi atet la ga ai. Nta masha shada da tsan gang ai aten ni na mat nna bai hhrum mayu jang hkrumra manau dum nna, bai hkrum zup ga ai. Padang ninglaw lu ai aten hta padang manau dum ga ai.

Ndai padang manau gaw Karai Kasang hpe shagrau sha-a ai lam re nga nna, chyum laika hta nan ka da ai. 2 Korinhtu 2:14 'Anhtehpe Hkristu hta tut nawng e Padang Manau hta nlaw shangun nna, shi a chye chyang ai manam pyaw bat anhte a lata hte shara shagu hkan e shapraw shadan ai Karai Kasang gaw a nga u ga law' nga ai.

Manau dum jang Karai Kasang a chye chyang ai manam pyaw bat anhte Jinghpaw Wunpawng amyu sha ni a lata hte shara shagu hkan e Karai Kasang gaw shapraw shadan dan na rai nga ai. Dai majaw Jinghpaw Wunpawng Chyum Hkawlik a 75 ning hpring Lung Seng Jubili aten hta gaw, Karai Kasang kaw na 'Hpaji byeng-ya hte chye chyang ai myit hpyi la ai shaning nan rai nga ai'.

Law la wa sai Jinghpaw Wunpawng amyu masha ni hpe, jeyang, uphkang, dawdan, hparan hpareng kangka, dingman, dinghpring, pai hkra nyit, kung kyang, chyoi chye nna Jinghpaw Wunpawng amyu sha ni a ningbaw ningla tai na masha ra kadawn nga ai aten gaw ya aten nan rai nga ai. Dai majaw, Shawlamun Hkawhkam gaw hpaji byeng-ya hte chye chyang ai myit hpyi ai zawn hpawtni na aten hta ningbaw ningla tai wa na ramma ni, hpaji byengya hte chye chyang ai myit lu na matu 'Ramma Hpaji Manau' dum ai rai nga ga ai.

1.2 Manau hte chyum masa

 

Chyum Laika kaw na Karai Kasang hte Jinghpaw Wunpawng sha ni a ginfu ginsa prat kaw nna, kam hkrat wa ai Karai Kasang (sh) Lamu Madu Ga Madu gaw marai langai mi sha re ai lam, Manau hpe chyum laika hku yu yang mu lu nga ai.

Jinghpaw Wunpawng amyu sha ni ginru ginsa prat hta gumgun gumhpai ni hpe jaw jau nna, nat matse ni hpe gaw tinang hpe dingbai dingna n jaw na matu toi garan gwi htau, wa htau jaw ai lam galaw lai wa sai. Rai tim gumgun gumhpai ni hte nat matse ni hpa n galaw lu mat ai aten hta, masha asak hte seng wa ai shaloi marawn jahtau nna, shaga ga di ai wa nga nga malu ai. Dai wa hpe gaw shanhte hpa mung jaw jau ai ngu ai lam n nga ai. Ka ning n di kadai gumgun gumhpai wa mung n garum lu mat jang shaga ai rai nga ai. Dai wa gaw Lamu madu Ga Madu (sh) Ngarawng Ngarai (sh) Karai Kasang ngu ai wa rai nga ai. Lamu e chye ya rit law, Ga e chye ya rit law, Ngarawng Ngarai e na u law, Karai Kasang e hkye rit law nga nna, marawn chye nga ma ai (Sara Dumhpawu Naw tsun dan ai).

Jinghpaw Wunpawng sha ni gaw dai lamu madu hpe n jaw jau ma ai. Shi a lam hpe agri agrai n chye ma ai. Rai tim Lamu Madu nga ai lam hpe gaw hkrak sha chye ma ai. Lamu Madu gaw gumgun gumhpai ni hte nat matse ni e n galaw lu ai hpe galaw lu ai wa re ngu kam sham ma ai. Nat ni hpe myi hte n mu lu ai rai tim, nat nga ai lam Jinghpaw ni hkrak sha chye ai. Dai majaw Lamu Madu hpe myi hte n mu lu ai gaw Jinghpaw ni a matu hpa mi n lak lai nga ai. Lamu Madu Ga Madu hpe gaw kadai gumgun gunhpai wa e mung nat matse wa e mung n lu hkye mat ai shaloi sha she marawn jahtau garum hpyi chye nga ma ai.

1.3 Lamu Madu Ga Madu

Jinghpaw Wnpawng sha ni gaw sumsing lamu hte kinding ga hpe madu ai wa nga ai ngu ai hpe chye ma ai. Rai tim Lamu Madu Ga Madu gaw shi a mying shingteng hte shi a lamhpe galoi n tsun dan nga ai. Jinghpaw ni gaw shi gaw mungkan hpe hpan tawn nna madu nga ai wa re ngu kam ai majaw shi a mying n tsun dan tim shi hpe lamu madu ga madu ngu nna, mying jaw da sai.

1.4 Manau

Manau ngu ai ga si gaw 'Muq Nau' ngu ai kaw na byin wa sai. 'Muq' ngu ai gaw lamu hpe gadun ai hku tsun lang ai. 'Nau' ngu ai gaw jaw, jau ai (Matsaw nau ningtsa jau nga ma ai). Dai majaw Manau a lachyum madung gaw 'Lamu hpe jaw jau ai' ngu ai re. Karai Kasang hpe jaw jau ai rai nga ai. 

1.5 Madai wa hte Jan wa

Madai wa hte Jan wa gaw manau poi hta ahkyak dik lamu madu wa a kasa yan rai ma ai. Lamu madu wa a dat kasa marai 6 nga ai kaw na shinggyim masha ni a manau poi hpe matsing ningting galaw na matu lamu madu gaw shi a kasa Madai wa hte Jan wa hpe sha dat dat nga ai.

1.6 Manau poi

Manau poi gaw Lamu Madu Ga Madu wa e shangun dat ai Lamu Madu a dat kasa yan Madai wa hte Jan wa gaw Manau poi hta sa du yu nna, matsing ningting galaw ai poi rai nga ai. Manau poi hta Madai wa gaw lamu kaw na yu wa nhtawm ma nau madu a nta htingnu madai dap kaw shara wa la ai, bai Jan wa mung naura pa ka-ang manau shadung makau e jun da ai jan hkungri kaw shara la nu ai. Dai hpang shan gaw, Manau poi ting a kaja ai lam mung n kaja ai lam mung (galaw shut ai lam ni hte jaw ai lam ni) yawng hpe matsing ningting galaw da masai. Manau poi ngut ai hpang shan gaw lamu de bai lung wa nna, shan matsing ningting da ai lam yawng Lamu Madu hpe wa tsun tang dan ma ai. Ndai zawn Jan wa hte Madai wa gaw Lamu Madu chye lu na matu matsing ningting galaw nna, tang dan ai poi gaw Manau poi byin wa sai. Shinggyim masha ni gaw Karai Kasang a mungga, Karai Kasang galaw shagun ai hku hkrak hkan n hkan jep maram ai poi rai nga ai.

1.7 Manau poi a mahtai

Manau poi ngut ai hte Lamu madu a dat kasa Jan wa hte Madai wa gaw lamu de bai lung mat wa nna, shan matsing da ai lam ma hkra hpe Lamu Madu kaw wa tang madun ma ai. Lamu Madu a daw dan ai lam gaw shan tang madun ai kaw sha madung nga ai. Jan wa hte Madai wa a tang madun ai lam hta hkungga nga hta ra rawng ai ngu laika tang jang hkunnga nga shaw ai hta madu ni hpe ari jaw ai. Hkunnga nga gaw ra n rawng ai, yawng hkrak ai ngu jang nta madu ni hpyi ai sut gan lu wa ai. Dai hte maren Manau Jaiwa ai wa mung shawng tsun na hpang tsun rai jang gaw, Manau Jaiwa wa ari hkrum nga ai. Manau Jaiwa wa mung jaiwa wa ai shaloi n shut n shai tsun ai rai yang shi a dinghku hta shaman chyeju hte hpring nga ai. Bai Naushawng ni kaw mung nau shawng shawng shut ai lam nga jang ari hkrum ma ai. Kalaw ra ai hpe hkrak n shut n shai kalaw jang shaman chyeju lu nga ai.

1.8 Lamu Madu

Jinghpaw ni lamu madu ngu nna shamying ai gaw, shi a mying n chye ai majaw, Lamu Madu ngu shamying manau ai. Hpa majaw nga yang shi gaw lamu ningtsa kaw nga ai wa re ngu kam nga ai. Shi gaw shi a mying hpe tsun nan n tsun dan nga ai. Dai majaw dai lamu madu ngu ai wa gaw Chyum Laika Pru Mat Wa ai Laika 3:14 kaw na 'Ngai wa rai nga n-ngai' nga nna Mawshe hpe mying n tsun dan ai wa, Kasa Laika 17:23 kaw, Ahten masha ni gaw mying n chye nna 'n chye gaw ai Karai Wa a matu' nga nna, hkungri langai mi san da ya ai Karai Wa nan rai nga ai. Byin ai lam gaw Mawshe hpe mying n tsun dan ai wa hte Ahten masha ni e mying n chye ai wa gaw Jinghpaw ni mung mying n chye ai majaw Lamu Madu ngu nna shaga ai wa hte akyang lailen, sat lawat yawng chyaw raw rai nga ma ai.

 

2. HPAJI MANAU SHADUNG NSAM NI

2.1 Lamu tsit nsam

Lamu tsit nsam gaw Asia dan a hpaji nsam rai nga ai.

2.2 Shaba pu nsam

Shaba pu nsam gaw Du magam nsam, Jinghpaw Wunpawng amyu ni a bawbam nsam, ningawt nsam rai nga ai.

2.3 Ahkyeng nsam

Magrau grang ai nsam re. Yesu anhte a matu hkaw kau ai sai nsam rai nga ai.

2.4 Atsit nsam

Jinghpaw Buga tsit lali tsawm htap ai nsam hte shabung da ai.

2.5 Ahpraw nsam

Ahpraw nsam gaw Jinghpaw Wunpawng amyu sha ni a myit masin san tsawm ai nsam. Yesu Hkristu anhte shinggyim masha ni hpe yubak kaw na kashin la ai majaw hkyen zawn hpraw san wa ai.

2.6 Ja nsam

Sara Kaba Yudatan Myen Hkawhkam hpe Ja hte gayawp ai Chyum Laika kumhpa jaw ai. Chyum Laika hpe Ja chyum ga ngu tsun lang ai.

 

3. HPAJI MANAU SHADUNG HTE KAGA NI

3.1

Shadung mying                      - Dungla Dunglat

Shadung maka mying           - Kayan

Lachyum                                - Ginding ga nai e nga ai shinggyim masha nig aw lamu ntsa na

                                                  Karai Kasang hte tut nawng matut nga ai la chyum re.

3.2

Sadung mying                        - Dung-yi Dunglat

Shadung maka mying           - Numru Hkawhkam

Lachyum                                 - Shinggyim masha ni a nsoi nsa yawng gaw sumsing lamu ntsa na Karai Kasang

                                                   hte matut nga ai. Asak sumri sumdan gaw Karai Kasang jum tek da ai lachyum re.

3.3

Shadung mying                        - Dungla Dungnoi

Shadung maka mying             - Nhtik Hpayu Htik

Lachyum                                 - Shinggyim masha gaw si ai hpang war a ai shara 2 sha nga ai, dai gaw sumsing lamu

                                                   mungdan hte ngarai mung rai nga ai.

3.4

Shadung mying                      - Dungla Dungnoi

Shadung maka mying            - Shingjep maka

Lachyum                                 - Shinggyim masha gaw Karai Kasang hpe tut nawng chyeju shakawn, daw jau ra ai l

                                                   achyum re.

3.5

Shadung mying                      - Dungyi Dungnoi

Shadung maka mying           - Kayan Kaji

Lachyum                                 - Sumsing lamu hte kinding aga, yawng gaw Karai Kasang a rai nga ai.

3.6

Shadung mying                      - Dungla Dungnoi

Shadung maka mying            - Kazu maka

Lachyum                                 - Jinghpaw Wunpawng amyu sha nig aw Karai Kasang hte mung mayu, dama, hpu nau

                                                   shada da mung tut nawng e matut mahkai nga ai ni re (Htani htana a lachyum re).

3.7

Shadung mying                      - Udang ginchyai (Ngadang)

Shadung maka mying            - Jaw Masat maka

Lachyum                                 - Ndai ngadang shading ginchyai maka 2 gaw 1977 hta galaw ai KBC sasana 100 ning Jaw Masat poi aten hta jun ai manau shading maka rai nga ai. Dai majaw ndai manau shading maka mying 2 hpe jaw masat maka ngu amying shingteng jaw sai. Lachyum gaw Jinghpaw Wunpawng htunghking manau hpe Yesus hta hkalup hkam la nna Hkristan shatai la sai ngu ai lachyum re.

4. HPAJI MANAU SHADUNG HKRISTAN KUMLA NI

Matsing: Sawk ka hkrang shapraw tang madun ai wa gaw Sara Marip Bawk San (Chyum Hkawlik-KTC) re.