ధనుర్మాసం ( Dec 16th - Jan 15th )

సాధారణంగా మనిషి ఎంత వీలైతే అంత తన పనిని తప్పించుకొని, సులువైన మార్గం కోసం ప్రయత్నిస్తూ ఉంటాడు. తన సుఖానికి అడ్డు వచ్చిన దాన్ని అణిచివేసి తన ఆధిపత్యం చెలాయిస్తూ బ్రతుకుతాడు. మిగతా జీవరాశులు వాటి పని అవి చేసుకుంటూ వాటి మానాన అవి బ్రతుకుతాయి, లభించినవాటితో సంతృప్తిగా ఉంటాయి. మనిషికి ఉన్న దానితో తృప్తి లేదు, ప్రక్కవాన్ని చూసి సహించలేడు. ఇంకితాన్ని పూర్తిగా వదిలి మానవుడు దుష్ప్రవృత్తికిలోనవుతున్నాడు అనేది మనం గమనిస్తున్నాం. మానవ జన్మ విలక్షణమైనది. మనిషి తనకున్న జ్ఞానం ద్వారా కర్మను సవ్యంగా ఆచరిస్తూ బ్రతక గలడు. మనం ఎట్లా బ్రతకాలో, మన లక్ష్యం ఏమిటో తెలిస్తే జీవితాన్ని సవరించుకొని బ్రతకవచ్చు.

మరి ఆ జ్ఞానం లభించేది ఎలా ? మనకున్న ఇంద్రియాల ద్వారానో, ఊహతోనో నిర్ణయించి చెప్పలేం. మనం ఈనాడు అనుకొనే ఆధునిక విజ్ఞానం కేవలం కనిపించిన దాన్నే నమ్ముతుంది. కానీ ఇంత విశ్వాన్ని గుర్తించడానికి మన ఇంద్రియాలకున్న శక్తి సంకుచితం, మన ఊహ అల్పం. దీన్ని గుర్తించిన మన పూర్వులు కనిపించని లోపటి ప్రపంచం వైపు దృష్టి సాగిస్తూ ఎంతో కాలంగా సాగించిన తపస్సమాధి దశలో వారు ఒక శబ్దాన్ని గుర్తించారు. మన మనుగడకు కారణమైనది ఆ శబ్దం. మనం కోరిన ఫలాన్ని ఇవ్వగలదు కనుక దాన్ని వేదం అని అంటారు. అది మనల్ని శాసించగలదు కనుక శాస్త్రం అని అన్నారు. వేదం అనేది అలౌకికమైనది. సహజమైనది. ఎవరో తయారుచేసినది కాదు. అందుకే దాన్ని అపౌరుషేయము అని అంటారు. ఎదో ఒక ఫలానా భాషలో వ్రాసినవి కావు. బాషలన్నీ మనం ఏర్పాటు చేసుకున్నవే, భాషలేవీ లేని నాడు ఉన్నది వేద శబ్దం. అసలు భాషలన్నీ ఏర్పడ్డవి వేద శబ్దంలోంచే అనేది భాషా ప్రావిణ్యం ఉన్న వారు చెప్పే మాట. ఏలాంటి స్వార్థంలేక కేవలం మన బాగు కోసం చెప్పే ఆప్తుల ద్వారా అందినది కనుక దానికి ఆప్తవాక్యం అని పేరు. దాన్ని కేవలం ఒకరి నుండి మరొకరు నేర్చేది ఉచ్చారణ-అనుచ్చారణ ద్వారానే కనుక దానికి శృతి అని పేరు. అట్లా ఎన్నో లక్షల సంవత్సరాల నుండి మన జాతి వేదాన్ని తన సంపదగా కాపాడుకుంటూ వస్తుంది.

వేదం అనేది ఈ జగత్తుకు కారణమైన పరమాత్మ గురించి చెబుతుంది, జీవ పరమాత్మల సంబంధం గురించి, మనం చేరాల్సిన లక్ష్యం గురించి చెబుతుంది, ఇలా మన ఊహకు అందని ఎన్నో విషయాలను తెలుపుతుంది. మొత్తానికి వేదం చెప్పదలుచుకున్నది ధర్మాన్ని, అంటే మన ఆచరణని, మనకున్న నియమాలని, కట్టుబాట్లని. ఒక రైతు తన పంటకు గట్లు వేసి ఒక క్రమ పద్దతిలో నీటిని ప్రసరింపజేస్తాడు. అట్లానే మనిషి యొక్క జ్ఞానం విశృంఖలంగా ప్రవర్తించకూడదు. అట్లా వేసిన గట్లే మన శాస్త్రాలు. మనిషి తన సుఖం కోసం ప్రకృతి నియమాలను విస్మరిస్తాడు కనుకనే మనిషికి శాస్త్రం అవసరమైంది.

అయితే వేదం నుండి నేరుగా విషయాలను గుర్తించడం అంత సులభం కాదు. మన బాగు కోసం భగవంతుడు ఉపదేశం చేసిన భగవద్గీత, ఏదో తనకు తోచి చెప్పినది కాదు. వేదంలో అక్కడక్కడా చెదిరి ఉన్న విషయాలను ఒక చోటకు చేర్చి పాటవలె పాడి వినిపించాడు. వేదాన్ని మరింత వివరంగా తెలుపడానికి బయలుదేరినవే స్మృతులు, ఇతిహాసాలు, పురాణాలు , ఆగమాలు మరియూ ప్రబంధాలు. ఇవన్ని జీవ నిర్మితాలు. అందుకే వాటిని స్వీకరించే ముందు వేదానికి అనుగుణంగా ఉన్న వాటిని చూసి స్వీకరించాలి. అట్లా వేద వాఙ్మయాలలోని విలువలను గుర్తించి బ్రతికితేనే అది ప్రామాణికమైన జీవనం అవుతుంది. మానవ జన్మకు సార్థకత ఏర్పడుతుంది.

గీతా జయంతి- 18th Dec

పరమపావనమైన మార్గశీర్ష శుక్ల ఏకాదశి, ఈ రోజు భగవద్గీత లోకానికి అందిన రోజు. భగవద్గీత శ్రీకృష్ణ భగవానుడు అర్జునుడికి కర్తవ్య నిర్వహన ఎట్లా చేయాలో తెలియక తపన చెందే హృదయానికి ఉపశమనంగా అనుగ్రహించినటువంటి మహోపదేశం. అర్జునుడికే కాదు, కర్తవ్య నిర్వహణలో ఎదురయ్యే సమస్యలకి సందిగ్దతకి సమాధానంగా భగవద్గీత ఈ నాటికీ ప్రమాణంగా నిలుస్తుంది, ఏ నాటికీ ప్రమాణంగా నిలుస్తుంది. ఏ పని ఎట్లా చేయాలి, ఎంత వరకు చేయాలి అనే సంశయం కలిగిన వ్యక్తికి ఒక శ్రేయ సాధనంగా భగవద్గీత ఉపయోగపడుతుంది. నాకు కర్తవ్యం ఏమితే తెలియట్లేదు కానీ, "ఏ శ్రేయస్యం నిశ్చితం భూహితన్మే" నేను శ్రేయస్సుని కోరుకుంటున్నాను, నాకేది శ్రేయస్సో అది చెప్పు అని అర్జునుడు అడిగినది. శ్రేయస్సుని పొందాలి అనుకున్నవాడికే ఏమైనా చెప్పడం అవసరం, ఆ శ్రేయస్సు కోరే వ్యక్తి ఏ స్తాయిలో ఉన్నా అందరికి అందేలా శ్రీకృష్ణ భగవానుడు అందించిన ఉపదేశమే భగవద్గీత.  అది వ్యక్తి గతంగా చిన్న స్థాయిలో కావచ్చు, యువ స్థాయిలో కావచ్చు, ఒక గృహస్తుగా జీవించే వ్యక్తి స్థాయిలో కావచ్చు, లేక వ్యాపారమో, వాణిజ్యమో, ఔద్యోగికమో ఏదో రకమైన శ్రేయస్సుని పొందాలి, అది అత్మోజ్జీవనకరమై ఉండాలి అనే వ్యక్తికి భగవంతుడు చేసిన అతి శక్తి వంతమైన ఉపదేశమే శ్రీమద్భగవద్గీత. (read more)

---

వైకుంఠ ఏకాదశి - 18th Dec

ఎలాంటి వారైనా సరే, పుణ్యాత్ములా పాపాత్ములా అనే ప్రశ్న లేదు. ఎవడైతే ఈనాడు స్నానమాడి స్వామి నామాన్ని తలుస్తాడో వాడికి మోక్షం ఇస్తాడట. అందుకే ఈనాడు కాకి కూడా స్నానం చేస్తుందట. సామాన్యంగా ఈ నాడు, ఎవరిపైన కోపం వచ్చి ఉపవాసం చేసినా మోక్షమేనట. అంత పవిత్రమైన రోజు ఈ రోజు. ఎందుకైంది అంత పవిత్రం ఈ రోజు? (read more)

శ్రీ పెద్ద జీయర్ స్వామి పరమపదమహోత్సవం -  

 

భోగి-సంక్రాంతి  -13th Jan

సంక్రాంతి మన దక్షిన దేశం వారికి ముఖ్యమైన పండగ. మన వాళ్ళంతా ఆనందంతో ఉత్సాహంతో ఒక పెద్ద పండగ చేసుకుంటారు. ప్రకృతిలో వసంత ఋతువు ఆహ్లాదాన్ని ఇచ్చినా, ఈ కాలం మనకు పంటలతో ఒక నిండు తనాన్ని కల్గించే కాలంగా మనం అనుభవిస్తుంటాం. నెలరోజులు ధనుర్మాస వ్రతం ఆచరించిన గోదాదేవి, తనను ఒక గోపికగా భావించి శ్రీరంగంలో వేంచేసి ఉన్న శ్రీరంగనాథుణ్ణి వివాహమాడాలని అనుకుంది. తత్ ఫలితంగా శ్రీవెల్లిపుత్తూర్ నుండి గోదాదేవిని రప్పించుకొని శ్రీరంగనాథుడు విగ్రహస్వరూపంతోనే వివాహమాడాడు. గోదాదేవి వ్రతం ఆచరించి రంగనాథుణ్ణి పోందిన రోజుని భోగి అంటారు. రంగనాథుణ్ణి భోగరంగడు అని అంటారు. భగవంతుణ్ణి వివాహమాడి వైభోగ్యాన్ని పొందింది కనుక ఆ రోజుకి భోగి అని పేరు. భోగి దాటిన మరునాడే సంక్రాంతి. తరువాత రోజు కనుమ. ఈ మూడు రోజులు కలిపితే ఒక అందమైన పండగ. (read more: సంక్రాంతి )