Hardiman XXIII (p. 62)
ISE ni foillsigheas in sgribhean so go bfuil Domhnall Mac Doncha Mac Domnaill
o Bel in Cuille, acus Seaan O Maeil Conaire on Ardcoill ag denamh conartha acus
ceangall re ceaile a timcel ceatrama mir Macaire in Cloigin acus leathcheathrama
mir Macaire Beail na Aba, itir coill acus corach acus cruadtan .i. Domhnall Mac
Donncha Mac Domhnail ag tabairt na tri leat ceathraman mir sin uadh fein, acus
ona eaighribh na dhiaigh, do Seaan O Maoil Conaire acus da eaighribh na gill re seacht
mbuaibh fichit innlaogh: acus mas idir bealltoine acus feail san Seaain fuaisceoltar
in ferann sin, iad sin do bheith na mbuaibh sheasca, acus a mbeaith innlaogh a fheail san
Seain amach; acus a barr saor slan ag Sean an bliadain fuaisceoltar i; acus
dfiachaib ar Domhnall acus ar eaigribh an ferann do chonnmhail saor do Seaan acus da
eaighribh o cion tire; acus gan ar neart an fearann sin do fhuasclad acht deigrib dilis
Domhnail Mic Doncha mar geall ar a arneis dilis fein. Agus misi Muirceartach
Mac Concubar oig Meg flanchada do sgribh do thoil in da rann, a Rosmuincar, aois
in Tigearna .m. b. acus cuig .c. acus ocht mbliadna acus da fhichit. Isiat a fiagoin
laithreach so, Doncha Mic Seaain Mac Mathghamhna o Rosmuincar, Domnall .r. Mac
Concubhar uaitne, Seaan Mac Donncha Mac Domnaill, Flaithri Mac Domhnaill Meg
Flannchada, Lochlann O Cearmoda, Lochlann riabhach Mac Isog; an naobad la do mi Iun
do sgriobad.
Flaithri Mac Clannchai lamh Dhomhnaill Mic Doncha
Sean Mac Doncha
Doncha Mac Seaain
Domnall ruadh Mac Concubar uaithne