Нормы ацэнкі пры выкананні пісьмовых класных и дамашних работ:
8 памылак і больш - 1 бал
7 памылак - 2 балы
6 памылак - 3 балы
5 памылак - 4 балы
4 памылкі - 5 балаў
3 памылкі - 6 балаў
2 памылкі - 7 балаў
1 памылка - 8 балаў
1/2 памылкі - 9 балаў
няма памылак - 10 балаў
Нормы ацэнкі слоўнікавага дыктанта:
10 балаў - 0 памылак, без выпраўленняў
9 балаў - 0 памылак, 1 выпраўленне на месцы нягрубай памылкі
8 балаў - 1 выпраўленне на месцы грубай памылкі ці 2 выпраўленні на месцы нягрубай памылкі
7 балаў - 1 памылка
6 балаў - 2 памылкі
5 балаў - 3 памылкі
4 балы - 4 памылкі
3 балы - 5 памылак
2 балы - 6 памылак
1 бал - 7 і больш памылак
Класіфікацыя ПАМЫЛАК:
Грубымі лічацца:
арфаграфічныя памылкі на вывучаныя правілы, прадугледжаныя вучэбнай праграмай: атрэзаў замест адрэзаў; траука замест траўка; збожа замест збожжа; сямя замест сям’я; пашталён замест паштальён і іншыя;
пропуск слова з вывучанай арфаграмай;
пропуск знака прыпынку ў канцы сказа;
пропуск коскі паміж аднароднымі членамі сказа.
Кожная памылка ў слоўнікавым слове лічыцца за асобную памылку (копілюш замест капялюш - 2 памылкі!).
Нягрубымі лічацца наступныя памылкі:
пры пераносе слоў (пра-ўда, надвор-’е), а таксама наўмыснае пазбяганне пераносу слоў;
у напісанні ненаціскных склонавых канчаткаў назоўнікаў, прыметнікаў, ненаціскных асабовых канчаткаў дзеясловаў (у IV класе). У II і III класах памылкі на пералічаныя правілы выпраўляюцца, але не ўлічваюцца;
графічныя памылкі і апіскі (замена адной літары другой – спуп замест слуп; перастаноўка літар – шсытак замест сшытак; паўтор адной і той жа літары ў слове – маалы замест малы; паўтор аднаго і таго ж склада ў слове – прыгогожы замест прыгожы; пропуск літары ў слове – рабта замест работа);
адлюстраванне на пісьме замест літар е, ё, ю, я, і іх гукавога значэння (йаблык замест яблык);
пропуск слова без вывучанай арфаграмы;
адсутнасць чырвонага радка;
пастаноўка кропкі ў загалоўку тэксту;
парушэнне сінтаксічных норм спалучальнасці слоў (хварэць грыпам замест хварэць на грып);
няправільнае ўтварэнне і ўжыванне склонавых форм іменных часцін мовы, асабовых форм дзеясловаў (у кніге замест у кнізе; бярэць замест бярэ);
памылкі ў словаўтварэнні (куст ружы змерзнуў замест змерз);
парушэнне меж сказа (У двары дзеці гулялі ў снежкі. І каталіся на санках).
Памылкамі, якія паўтараюцца, лічацца памылкі ў адным і тым жа слове ці формах аднаго і таго ж слова (бероза, берозы, берозай замест бяроза, бярозы, бярозай). Незалежна ад іх колькасці, яны лічацца за адну памылку.
Памылкі на адно вывучанае правіла, дапушчаныя ў розных словах (аднатыпныя памылкі), лічацца ў кожным слове асобнай памылкай (рыпка, каска, лышка замест рыбка, казка, лыжка – правапіс парных па звонкасці/глухасці зычных у сярэдзіне слова).
Напісанні, што з’яўляюцца пад уплывам графікі рускай мовы (і – и), выпраўляюцца, але за памылку не лічацца.
Дзве нягрубыя пунктуацыйныя памылкі прыраўноўваюцца да адной грубай.
У навучальных работах два выпраўленні на месцы грубых памылак лічацца за адну нягрубую памылку.
У выпадку, калі вучань спісаў практыкаванне, але не прыступіў да выканання задання (заданняў), аб’ём выкананай работы складае 50 %, што адпавядае 4 дапушчаным памылкам.