Storie di vita vissuta: Vespa GS 150

Post date: Feb 12, 2017 9:14:27 AM

Nel 1960 me zio se ga compra’ na vespa 150 gs nova de stecca, beissima. Sicome el lavorava so un stabimento a porto marghera, el ghe gaveva messo un portapacchi pa mettarghe sora na cassea de legno de nogara fatta co e so man. Serto che sta cassea so na vespa nova e cossi’ sportiva ea stonava ma ea ghe serviva pa mettare dentro tutto queo che ghe occoreva in caso de piova, vento, tempesta, neve, giasso, brosema... El ghe gaveva messo anca el parabriss (parabrezza) pa difenderse dae intemperie invernai ma de ista’ eo cavava. Eo no ghe badava al look parche’ chea vespa ghe serviva soo pa n’dare a lavorare e basta! Ea cassea de legno invesse ea stava sempre taca’ sora el portapacchi anca de ista’ parche’ dentro el ghe meteva na coverta de lana a scacchi bianchi e rossi (plaid) che forse ea ghe serviva pa n’dare fare i picnic coe morose.

Sta de fatto che na notte, dentro sta bea cassea, ea gatta ga fatto i gattini! Sinque cuccioetti uno piu’ beo de staltro. Me zio, preocupa’ pa ste creature, el decide de assarli la’ co ea mamma gatta e, pa un mese, el ze anda’ a lavorare in bicicletta pa permettare aea gatta de allattarli tranquiamente ( pa fortuna gerimo in aprie!). So sta bea cuccia, in mezzo aea coverta de lana, i gatttini i ze cressui in fretta uno piu’ beo de staltro. Dopo un mese, come che sa fare ea mamma gatta, i ga ciapa’ uno aea volta pal copin e spostai so un posto piu’ sicuro: dentro in armaron dea camara. I gatei, zogando i gaveva sgranfa’ tutta ea cassea de legno ma a me zio no ghe interessva proprio gnente. Dopo tanti anni el se ga compra’ na macchina e, visto che mi gavevo fatto i disdoto anni, el me ga regaa’ ea so bea vespa. Desso ea ga un vaore inestimabie: libretto originae, targa originae, tinta originae e.. Cassea originae! Si, parche’ mi no a go mai cavada parche’ ea contien i ricordi de me zio: el so lavoro (tanto) ea piova (tanta) e freddo (tanto) chel ga ciapa’ e anca el ricordo dea meravigliosa nascita dei gattini!

Desso, co partecipo ai raduni dei vespisti, tutti i me domanda parche’ ea ga sta cassea de legno oltretuto tutta sgranfada! Mi ghe spiego che, anca sea ze voda, ea ze piena de ricordi tutti beissimi da proteggere e rispettare. Anca se i zovani i me dize chea storia no a serve parche’ ea vita “e’ adesso”. Si d’accordo ma se no capimo da dove che semo partii…

Adriano Scantamburlo