La (des)ordenación d'Asturies
 

N’Asturies tamos sofriendo dende fai ya 30 años la ordenación económica del territoriu, consencuencia d’una voluntá politica nidia. Sometíos a un discursu ensin esperanza nel que’l mieu, la precariedá y les desigualdaes son l’exe central, dalgo normal ya inevitable, y la xente que mos arrodia una amenaza pa nos. Esti discursu necesita pa perpetuase la represión ya’l control social sobro’l conxuntu la población.

Esta dinámica echa mano d’estremaes estratexes pa  criminalizar y afogar la protesta social. ( Caxastur, Naval Xixón, PGOUs, fuelga la sanidá...). En dalgunos casos la represión direuta o l’encarcelamientu costituyen les ferramientes coles que conxelar y encalzar los conflictos sociales. Les multes, penes de cárcele, cargues policiales, pinchazos telefónicos, infiltración nos movimientos sociales, despidos... tan al orde del díi pa la xente más revolvino.  

La meyor arma del opresor ye la mente’l oprimíu

Otres vegaes pue facese d’un mou más sele, la precariedá y la esclusión que carecemos nun produz rebeldia, sinon sumisión; La esclusión vivese de mou individual, polo que faense invisibles los mecanismos que la xeneren. La impotencia, la resignación... apaecen como una torga personal y non de resultes d’una sociedá inxusta.

Más alló les estadistiques alcuentrase la inestabilida y’l mieu que tan presentes de contino na vida de muncha xente n’Asturies y que ye entovía más preocupante no que cinca a la mocedá.

Mocedá peligrosa o mocedá en peligru

Despolitizar la realidá social, cooptar nes redes clientelares, antroxar la probeza cola la caridá institucional... pero’l volumen de población sobrante nun apara d’aumentar.

La situación de la xente mozo ye de más riesgu pola so condición precaria, la cual aprofiten istituciones y empresarios pa esplotalos. Convidase-yos a dexar Asturies p’amosar que tienen la lleición bien aprendío: dinamismu, movilidá xeografica, cultura emprendeora, etc

Si te quedes ye porque nun tienes el dinamismu necesariu, tas apegau al pasau o quies vivir de los subsidios ( nun como los empresarios ). Y si con esto nun val, siempre tendrás un policía al lláu pa desplicate meyor toes eses coses que nun seyas entender por ti mesmu.

Represión de baxa intensidá

Les consecuencies de reordenar el territoriu, a costa desordenar les nueses vides tan ehí: tases de suicidiu’l doble que la del estáu, problemes d’alcoholismu y consumu d’antidepresivos, aumentu les enfermedaes mentales, autoregulación demografico con un indice natalidá bien ruin, perdida de población, envieyamientu social, país enllenu xubilaes y prexubilaos demientres la xente mozo vese forciada a emigrar, desapaición del campu asturianu pol abandonu les ales, más de 70.000 viviendes vacies, demientres se construyen por miles pa segunda residencia y campos de golf pa turistes, tasa d’actividá 10 puntos por debaxo la media, altes cifres de paru, precariedá y temporalidá qu’aumenten la siniestralidá especialmente ente la mocedá...

Tamos a tiempu facer un cambéu radical

Si nun hai un cambeú radical la represión siguira ensin tener consecuencies pa instituciones que ta xuegando un papel cimeru na continuidá de too esto. Y los 4 años que mos asperen n’Asturies van ser un infiernu pa quienes nun sabemos, nin tenemos, onde atechamos.

Pero tamos a tiempu de facer un cambéu radical

-          Organizar rempuestes más alló casos concretos, facer un calendariu movilizaciones que recueya y axunte les problemátiques d’estremaos seutores.

-          Construyir una imaxen publica coleutiva, curiar y axilizar la toma determinos, ensin multiplicar espacios de llucha ensin xaciu.

-          Alcontrar formules de solidaridá económica, que nun seyan de calter coyunturales.

-          Recuperar movilizaciones desdexaes por mor de la “xunidá”. Hai que marcar oxetivos políticos nidios ( plenos municipales, delegación del gobiernu n’Uviéu, mitines de partíos políticos...), evitar esquizofrenies nes que quien mos reprime per un llau sofita per otru.

-          Rescatar la política del ámbitu penal, camudando los términos de la criminalización

-          Aprofitar la campaña eleutoral, espaciu pensao pa torgar la participación, pa pasa-yos factura a los responsables de la represión.