गणतन्त्रको मृत्युदिवस

उपसंहार -
चीरहरण भइछाड़्यो
यो युगमा
अल्पसङ्ख्यक आदिवासी द्रौपदीको
बेलतलाको खुल्ला सडकमा।

कृष्णले उपस्थित भई
चीरहरण रोक्ने कथाको पृष्ठ
धेरै अघि नै कसैले च्यातेर
थुङ्गा बनाई सत्ताभोगको झालमुरी खाइसकेछन्।

द्रौपदीको नाङ्गो शरीरलाई
डिजीटल र मोबाइल क्यामेराले खिचेर
लेमिनेशन गर्नमा मस्त थिए
छेउछाउका नपुंसक भीम, अर्जुन, नकुलहरू।

मेरो देशले
ब्वॉंसोहरूका सुरक्षार्थ
निर्दयतापूर्वक लाठीचार्ज गरिरहेछ
सोझो कस्तुरी मृगहरूमाथि
दार्जिलिङ मोड़हरूमा।

कबीरको कपास कोमलता
दल्सिङ ढुङ्गाको पर्याय बनेको छ
र गान्धीको गणतन्त्र गहना
खिया परेर धनुङ्कारको साम्राज्य फैलाउने
साधनमात्र बनिरहेछ।

निरङ्कुशताका खस्रा धोतीसरा धारहरूले
स्व
तन्त्र कोमल जिब्राहरू पाछिएपछि
अमानवीयताका अविश्‍वसनीय भूस्खलनहरूले
स्वाभिमानी छातीहरू तारेभीर झैं ताछिएपछि
सडकमा उत्रिएका छन् बुद्धहरू
गेरूवा कम्ब्याटमा गोरिल्ला युद्धका निम्ति
युद्धम् शरणम् गच्छामी
बुद्धत्वमा शान्त सुसाएको यो देश
क्लान्त बनेको छ मोदीत्वमा।

मोतीबिन्दु
र रतन्धोग्रस्त छन्
गणतन्त्रका गेलुक्पाहरू।



Comments