A - Testament Vej‎ > ‎Sofonia‎ > ‎

Sofonia 3

3

Gerusalem a l'é corompusse

1La sità, piena 'd saloparìe e 'd mnis a l'é bon-a tanme 'd mòrt; la sità pien-a 'd craseur e 'd prepotent a l'é finìa. 2A l'é dzubidienta, a 'rfuda la coression. A l'ha nen fiusa an Nosgnor, a scota nen ij consèj 'd sò Dé. 3Ij sò prinsi a son tanme 'd leon feros ch'a breugio, coj ch'i-i comandan a son afamà tanme 'd luv ant ël desert che, për la matin, a divoro tuta sò piàita. 4Ij sò profeta a son pien ëd superbia, a fan gnent' d'àut ch' ambrojé. Ij sò sacerdòt a son specialisà ant la profanassion dle còse sante; a rispeto nen la lej ëd Nosgnor.

5Nosgnor a sta 'd cà ambelelà, an mes a chila. Tut lòn che chiel a fà a l'é giust. Minca matin chiel a 'rvela Soa giustissia; a lo fà sensa falì fin-a a la sèira. Tutun, cola gent a l'ha gnun-a vergògna e a mepriso la giustissia.

Ël giudissi 'd purificassion

6I l'hai distruvì 'd nassion; soe fortificassion a son an ruin-a; i l'hai dësblà soe stra; a-i é pì gnun ch'a-j passa. Soe sità a son ant la desolassion; a-i é pì gnun ch'a-i viv. 7I l'hai pensà: 'A l'é sicur che adess i l'avras ëd rispet për mi, adess i acetras mia coression!". Se chila a l'avèissa falo, soa ca a sarìa nen stàita distruvìa da tùit ij castigh ch'i l'avìa mnassà. Lor, nopà, as dësvijavo già la matin con l'anvìa 'd fé lòn ch'a l'é nen giust[1]8A l'é për lòn che adess it l'has mach da speteme, ch'i rivo. I son pront a taché e buté a sach. I l'hai decidù 'd ciamé ansema 'd nassion, ëd raduné dij regn, paréj ch'i peussa dëscarié an su lor tuta mia rabia, tuta mia ira afrosa, përché tuta la tèra a sarà butà a fer e feu da mia ira. 9Sie mach sicur ch'i farai an manera che tute le nassion am rendran ëd làude agradìe. Quand ch'a pregheran a invocheran ël Nòm ëd Nosgnor e a-j rendran onor e glòria tute ansema.

10Coj ch'am pòrto ij sò tribut a vniran da pì dë dlà che l'Etiòpia. 11 An col dì-là ti 't l'avras pì nen da vnì rossa a càusa 'd tuta toa ribellion contra 'd mi, përchè antlora i l'avrai gavà da 'n mes a ti tùit coj ch'a son arogant, e ti 't saras pì nen orgoliosa an su mìa santa colin-a. 12I lassera an mes a ti un pòpol ùmil e pasì: a saran lor a trové 'd sicuressa an presensa 'd Nosgnor. 13La rimanensa dj'israelita a vivran pì nen për angané. A diran pì nen ëd busiarderie, na lenga busiarda as troverà pì nen an soa boca. Sensa dubi lor a pastureran pacìfich tanme 'd feje e as cogieran për arposé sensa pì avèj 'd tëmma.

14Manda 'd crij ëd gòj, ò fija Sìon! Sàuta 'd gòj, ò Israel! Sie alègher e canta 'd trionf con tut ël cheur, ò Fija Gerusalem! 15Nosgnor a l'ha gavate 'l giudissi ch'a l'era contra 'd ti, a l'ha mandà 'ndarera ij tò nemis. Ël Rè d'Israel, ël Signor, a l'é 'n mes a ti. It l'has pì nen da manca d'avèj tëmma d'un disastr. 16An col dì-là it diras a Gerusalem: "Avèj nen tëmma, ò Sion! Toe man a deuvo pì nen esse paralisà da lë sparm! 17Ël Signor tò Dé a l'é 'n mes a ti, Chiel a l'é 'n guerié ch'a peul liberete. Chiel a l'ha 'n gran piasì an tì. Chiel at arneuva con Sò amor. Chiel a canta për la gòj dëdnans a ti.

18Rësguard a coj ch'a pieuro përché a peudo nen pijé part a le feste, i l'hai gavatje da 'n mes a ti. At sarìo stàit un pèis për ti e na vërgògna. 19Varda, an col temp-là, a coj ch'a l'han fate dël mal i-j darai lòn ch'a merito. I andrai a 'rcuperé le feje sòpe e i archeujera ansema tute le feje. I gaveraj vòstra umiliassion e i farai an manera che tuta la tèra av rispeto e a v'amiro. 20An col temp-là iv sarai vòstra guida e av archeujerai ansema. Sté sicur ëd sòn: i farai an manera che tute le nassion dla tèra av dago 'd rispet e d'amirassion.

Nòte

  1. O "A l'han slongà 'l pass për andé a fé lòn ch'a l'é nen giust", "a l'han përvertì tute soe assion"
Comments