A - Testament Vej‎ > ‎Sofonia‎ > ‎

Sofonia 1

1

1Sossì a l'é 'l messagi profétich ch' ël Signor a l'ha fidà[1] a Sofònia, fieul ëd Cushi, fieul ëd Gadalìa, fieul ëd Amarìa, fieul ëd Ezechìa. Sofònia a l'ha trasmëttù së messagi antant ch'a regnava Giosìa, fieul ëd Amon, Ré 'd Giuda.

Ël Dì dël Giudissi as avzin-a

2"I distruvrai[2] tut sur la facia dla tèra", a dis ël Signor. 3"I distruvrai la gent e le bestie; i distruvrai j'osej dël cel e ij pess dël mar. (Le mistà idolàtriche 'd coste creature a saran distruvie ansema a la gent grama). I gavrai l'umanità da la facia dla tèra", a dis ël Signor.

4"I andrai a l'atach[3] contra la gent ëd Giuda e contra tùit coj ch'a vivo an Gerusalem. I gravrai da stò pòst minca trassa dla divossion[4] a Baal e la memòria midema che ambelelà i j'ero ëd sacerdòt pagan.

5I gavrai d'ansima le cà coj ch'a rendo l'adorassion a le stèile, coj ch'a giuro fedeltà a Nosgnor Dé ma ant l'istess temp a fan vòt d'ubidiensa a Malcam, 6coj ch'a arnego Nosgnor e ch'a veulo nen sò agiut o soa guida.

7Sta ciuto dëdnans a Nosgnor! Ël Dì ëd Nosgnor, ël Dì dël Giudissi, a l'é davzin. Nosgnor a l'ha prontà la tàula dël sacrifissi, coj ch'as ansetran a cola tàula a l'han già lavasse le man[5]8Ant ël Dì dël Sacrifissi, ël Dì ëd Nosgnor, i castigrai ij prinsi e ij fieuj dël ré, ansema tùit coj ch'a seguito ij costum dij pagan. 9An col dì là i castigrai tùit coj ch'a fan ëd rituaj superstissios, coj ch'a 'mpinìsso la cà 'd sò padron[6] con le richesse vanià con la violensa e l'angann.

10An col dì là", a dis Nosgnor, "da la Pòrta dël Pess as sentirà crijé fòrt, as sentiran ëd lament ch'a ven-o sù dai quarté dij sgnor dla sità, e da le colin-e 'n grand armor.

11Fé 'd lamentassion, vojàutri ch'i vive ant ël quarté dël mercà, përchè dij mërcant a na sarà pì nen, e coj ch'a conto ij sòld a na saran gavà.

12An col temp-là i andrai an gir për la sità con la lampia për dëstanene coj ch'a chërdo 'd podèj fé lòn ch'a veulo sens' esse ciapà e ch'a diso: "A-i é gnun Signor a dé 'd premi o 'd castighé". 14Soe richesse a saran robà e soe ca a saran distruvìe! A vivran pì nen ant le ca ch'a l'han fabricà, né a beivran ël vin dle vigne ch'a l'han piantà.

14Ël gran' Dì del Giudissi, ël Dì ël Nosgnor a l'é davzin, a l'é 'n camin ch'a riva lest. Un grand' armor as sentirà ant ël Dì dël Giudissi, ël Dì ëd Nosgnor, tanme dij crij ëd n'armada ch'a fà la guèra. 15Col dì là a sarà 'l dì 'd l'ira 'd Nosgnor, un dì d'aflission e d'angossa, un dì 'd devastassion e 'd ruina, un dì 'd top e dë scurità, un dì 'd nivole e 'd cel fosch, 16un dì d'arson ëd trombe e 'd crij 'd bataja. Tut ël pèis dël giudissi 'd Nosgnor a drocherà an su le sità fortificà e an sle àute tor d'àngol.17I farai che tuta la gent a sìa ciapà da na granda tribolassion e tùit as antrapran coma 'd bòrgno, perchè a l'han pecà contra Nosgnor. I spantiarai sò sangh tanme 'd póer, soa carn a sarà spatarà coma 'd drugia. 18Né sò òr né sò argent a-j podran salvé ant ël Dì dl'ira, ël Dì dël Giudissi. A-i é gnun dubi che mi i provochrai na spaventosa distrussion an su tùit j'abitant dla tèra".

Nòte

  1. O "dàit".
  2. O "ramasserai".
  3. O "I dëstenderai mè man".
  4. O "cult".
  5. O "a l'han già fàit soa purificassion ritual".
  6. Ij dé fàuss.
Comments