2 Samuel 11

David e Betsabea

11:1 Quand ch'a l'é rivà la bela stagion. a l'época ch'ij rè a j'ero sòlit seurte a fé 'd guère, David a l'ha mandà Joab e ij sò ufisiaj con tuta l'armada d'Israel a fé 'd ravagi ant ël teritòri dj'Amonita e a bute l'assedi a Rabà, la capital. David a l'era restà a Gerusalem. 11:2 Na vòlta [1], David, ch'a l'era aussasse da sò arpòs dël dòp-disné, a l'era andàit a fé doi pass an sla belavista 'd sò palass. Da là a l'ha vëddù da leugn na fomna ch'a fasìa 'l bagn. A l'era pròpi bela. 11:3 Parèj, David a l'ha mandà quajdun a informesse a propòsit ëd cola fomna e a l'han dije ch'a l'era Betsabea, fija d'Eliam, la mojé d'Uria, l'Hitita. 

11:4 Antlora David a l'ha mandà 'd mëssagé për fela ven-e a palass e quand ch'a l'é rivà, a l'é cogiasse con chila. Betsabea a l'avìa pen-a terminà ij sò rit ëd purificassion dòp soe ròbe [2], peuj a l'é tornass-ne a ca. 11:5 Pì anans, quand che Betsabea a l'ha capì d'esse restà ampedìa, a l'ha falo savèj a David.

11:6 David a l'ha ordinà a Joab ch'a-j mandèissa Urìa, l'Hitita. 11:7 Quand che Urìa a l'é rivà a palass, David a l'ha ciamaje coma ch'a stasìo Joab e l'armada, e coma ch'andasìa la guèra. 11:8 Peuj a l'ha dije a Urìa: "Va pura a ca toa e pijete un pò d'arpòs" [3]. David a l'ha fin-a mandaje 'n cadò, a Urìa, sùbit ch'a l'é artirasse. 11:9 Contut, a l'é rivà che Urìa, cola neuit, a l'é nen andàit a soa ca, ma a l'é restà a deurme a l'intrada dël palass con le guardie dël rè. 

11:10 Quand ch'a l'é stàit informà che Urìa a l'era nen andass-ne a soa ca, David a l'ha dije: "Coma ch'a l'é ch'it ses nen tornà a toa ca la neuit passà, dòp ess-ne stàit da leugn për tant temp?". 11:11 Urìa a l'ha rësponduje: "L'Èrca, e tuta l'armada d'Israel e 'd Giuda, a vivo an tenda, e Joab, mè comandant, e j'àutri ufissiai a son acampà al duèrt. Coma podria mai mi andemne a ca për mangé e bèive e cogeme con mia fomna? I giuro ch'i podrìa mai fé na ròba parèj!". 11:12 Antlora David a l'ha dije a Urìa: "Bin, pr' ancheuj resta sì e doman ti't podras artorné a l'armada". Parèj Urìa a l'é restà a Gerusalem për col dì-lì e 'l dì dòp. 11:13 Peuj David a l'ha anvitalo a sin-a e a l'ha faje pijé na cioca. Fin-a parèj David a l'ha nen podù felo andé a soa ca e Urìa a l'é ancora andàit a deurme a l'intrada dël palass con le guardie dël rè.

11:14 A l'indoman David a l'ha scrivù na litra a Joab e a l'ha dajla a Urìa përchè a-j la consegnèissa. 11:15 La litra a disìa: "Fà buté Urìa an prima linia, ant ël setor andoa che la bataja a l'é pì fòrta. Peuj artireve da chiel parèj ch'a sìa sicur ch'a lo masso". 11:16 Parèj Joab, ch'a dirigìa l'assedi dla sità, a l'ha destinà Urìa al setor ch'a savìa ch'a-i lotavo ij mej gueriè nemis. 11:17 E quand che ij soldà nemis a son surtì da la sità për combate, Urìa l'Hitita a l'é stàit massà ansema a vàire d'àutri soldà israelita.

11:18 Antlora Joab a l'ha mandà d'informassion a David rësguard a tut lòn ch'a l'era capità ant la bataja. 11:19 Al mëssagé a l'ha daje cost òrdin: "Fà savèj al rè tut lòn ch'a l'é capità ant la bataja. 11:20 Contut, ël rè a podrìa anrabiesse e ciamete: 'Përchè son-ne le trupe avzinasse parèj a la sità? Savìo-ne pa che da la muraja a l'avrìo tiraje adòss ëd còlp? 11:21 Chi ch'a l'avìa massà Abimelech, fieul ëd Jerubaal? A l'era fòrsi nen na fomna che, da l'àut ëd la muraja 'd Tebes, a l'avìa tiraje adòss na pera da mulin, e a l'ha massalo? Përchè seve-ne avzinasse a la muraja?'". Se chiel a parla parèj, ti dije: 'Tò servitor Urìa, l'Hitita, a l'é 'dcò mòrt".

11:22 Antlora 'l mëssagé a l'é andasne, a l'ha presentasse a David, e a l'ha contaje tut lòn che Joab a l' avìa comissionalo 'd dije. 11:23 Ël mëssagé a l'ha dije a David: "Ij nemis, pì fòrt che nojàutri, a l'han fàit na surtìa a camp duvert. Nojàutri i soma passà al contratach fin-a a l'intrada dla pòrta dla sità. 11:24 Antlora j'arcé a l'han comensà a tiré contra ij tò òm da l'àut ëd la muraja. e diversi dj'òm dël rè a son mòrt, comprèis Urìa l'Hitita". 11:25 David a l'ha dije al mëssagé: "Dìs a Joab ch'as dëscoragia nen për lòn ch'a l'é capitaje. Lë spa 'd guèra a divora ora l'un ora l'àutr. La vòlta ch'a ven combat con pì granda fòrsa e conquista la sità!".

11:26 Quand che la fomna d'Urìa a l'ha savù che sò marì a l'era mòrt, a l'ha fàit deul për chiel. 11:27 Passà ch'a j'era 'l deul, David a l'ha fala ven-e a palass e Betsabea a l'é dventà un-a 'd soe mojé. Peuj chila a l'ha daje 'n fieul. Contut, lòn che David a l'avìa fàit a l'é dëspiasuje tant a Nosgnor.

Nòte
  • [1] O "Na sèira".
  • [2] Mestruassion
  • [3] Let. "e lavte ij pé".

À à È è É é Ì ì Ò ò Ó ó Ù ù Ë ë
Comments