A - Testament Vej‎ > ‎Salm‎ > ‎

Salm 84

84. Coma ch'a l'é bel ël leugh andova ch'it vives

Lë scritor a manifesta sò desideri d'esse a la presensa 'd Dé ant ël Tempi 'd Gerusalem, përchè Nosgnor a l'é col ch'a guerna Sò pòpol.

84:1 Pr' ël diretor dla mùsica, scond la melodìa dita "Haguitit", scrivù dai Coraìta. Salm. Coma ch'a l'é bel ël leugh andova ch'it vives, ò Signor dl'univers! 84:2 Coma ch'i l'hai anvìa d'intré ant le cort dla ca 'd Nosgnor! Con ël cheur e con tut mè còrp i crijo 'd gòj anvers al Dé ch'a viv.

84:3 Fin-a j'usej a-i trovo na ca, la róndola a-i fà sò nì andova guermé soa fijolansa, aranda ij tò autar, Signor dl'univers, mè rè e mè Dé. 84:4 A son beà coj ch'a vivo an toa ca e ch'a-i canto 'd làude tùit ij dì! [Pàusa]

84:5 A son beà coj ch'a trovo an ti la fòrsa ch'a-j manca e ch'a l'han anvìa 'd përcore le stra ch'a porto a tò tempi. 84:6 Quand ch'a passo për la val ëd Baca1 Nosgnor a-j forniss na sorgiss. La pieuva d'otogn l'arvestiss ëd benedission. 84:7 A seguitran a chërse fòrt e minca un ëd lor a comparirà dëdnans a Dé a Gerusalem.

84:8 Nosgnor, Dé dl'univers, scota mia sùplica; sent lòn ch'i diso, ò Dé 'd Giacòb! [Pàusa] 84:9 Nosgnor! Varda con favor ël rè, nòst scu! Fissa tò sguard an sla facia 'd col ch'it l'has consacrà2.

84:10 Un dì sol passà ant le cort dël tempi, a val da pì che sent dì passà da n'àutra part. I vorìa pitòst sté mach sol dëdnans a la pòrta dla cà 'd mè Dé che sté 'd ca ansema a 'd gent ch'a l'ha gnun-a tëmma 'd Dé.

84:11 Ël Signor Dé es tanme 'l sol ch'a 'nlumina e në scu ch'a dà 'd protession. A l'é Nosgnor ch'a dà la grassia e la glòria. A l'é sèmper dispòst a fé 'd bin a coj ch'a fan lòn ch'a l'é giust. 84:12 Signor dl'univers, a son beà coj ch'a l'han fiusa an ti.

Nòte

1O "la val dij sagrin", "la val dij lerme".

2O "onzù".

Comments