A - Testament Vej‎ > ‎Salm‎ > ‎

Salm 79

79

Costa-sì a l’é la plenta ‘d n’Israelita ch’a l’é stàit testimoni d’invasion ëd potense forestere ant la tera promëttùa e ch’a l’han dëstruvù la sità ‘d Gerusalem e ‘l templ ëd Nosgnor. A ciama a Nosgnor ch’a përdon-a sò pòpol e ch’a arvërsa soa arvangia ans coj ch’a l’han maltrataje.

79:1 Un Salm d’Asaf. Nosgnor! A l’é vnùa n’invasion ëd gent pagan-a e a son pijasse la tèra ch’it j’ere arservate për ti1. A l’han dëssacrà2 tò templ e a l’han fàit ëd Gerusalem un camp ëd ruin-e. 79:2 A l’han massà ij tò sërvent e a l’han lassane ij còrp spatarà da sì e dlà përchè a-j mangèisso j’osej. La carn ëd coj ch’at j’ero fedej a l’é dventà ‘l nutriment dle bestie sarvaje. 79:3 Tut d’antorn a Gerusalem ël sangh a scor tanme d’eva; a-i é pì gnun ch’a peussa sotré ij nòst mòrt. 79:4 Nòstri vzin an fan le svergne; i soma dventà la sbefia e la burla dij pais ch’an stan dantorn,

79:5 Nosgnor! Fin-a a quand saras-to anrabià con nojàutri? Për sèmper? Fin-a quand toa gelosìa a brusarà tanme ‘d feu?

79:6 Arvërsa toa zara contra le nassion ch’a s’arfuso d’arconòss-te - ans ëd regn ch’at prego nen3 79:7 përchè a l’han angorgionasse tò pòpol Israel e a l’han fàit dventé nòstra tèra tanme ‘n desert. 79:8 Arciamte pì nen a la ment ij pecà dij nòstri antich! Tarda pa a d’avèj compassion ëd nojàutri, ch’i soma rivà a la dësperassion! 79:9 Giutne, ò Signor ëd nòstra salvëssa! Salvane e përdon-a ij nòstri pëccà për la glòria ‘d tò nòm.

79:10 Përchè j’àutre nassion a l’avrìo da dì: “Andoa ch’a l’é sò Dé ‘d lor?”. Dà sfògh a toa arvangia contra le nassion, përchè ch’a l’han vërsà ‘l sangh dij tò sërvent. 79:11 Scota le plente dij përzoné. Fane vëdde tò gran’ podèj ant la salvëssa ‘d coj ch’a son condanà a mòrt.

79:12 Nosgnor! Fé spurghé ij nòstri vzin set vire për le svergne ch’a l’han adressate. 79:13 Antlora nojàutri, le feje dle strop ch’it pasture, at ringrassieroma për sèmper e laudroma toa grandëssa da generassion a generassion.

Nòte

1 Let. “ch’a l’é toa ardità”.

2 O “profanà”

3 O “ch’a invòco nen tò Nòm”.



À à È è É é Ì ì Ò ò Ó ó Ù ù Ë ë
Comments