A - Testament Vej‎ > ‎Salm‎ > ‎

Salm 77

77

Ant ij dì ch’i son sagrinà i serco Nosgnor

L’autor a arciama a soa ment coma che chiel a patìa durant ël temp dël dubi, ma a dis coma ch’a l’ha trovà ‘d confòrt e dë speransa an pensand a la manera che Nosgnor a l’ha liberà Israel al Mar Ross.

77:1 Për ël diretor dël còro, second ël ton “Jedutun”: un salm d’Asaf. Mia vos as leva fòrta, anvers a l’àut, Nosgnor, fin-a a ti: ò se mach ti më sentèisse! 77:2 Quand ch’i j’ero fòrt sagrinà i l’hai sercà la presensa ‘d Nosgnor. I l’hai pregà tuta la neuit; mie man a l’ero levà anvers al cél, ma mia ànima a podìa nen trové ‘d sosta. 77:3 Quand ch’i penso a Nosgnor, i tiro ‘d sospir; im sento stravirà da la përfonda anvìa ch’i l’hai ëd ti. Pàusa.

77:4 Ti’m fase nen deurme: tanta ch’a l’é la tension ch’i sento an mi ch’i peudo gnanca pì preghé! 77:5 I m’arcòrdo dij bèj dì passà, che da tant temp a-i son pì nen, 77:6 quand mie neuit a l’ero pien-e ‘d canson alégre. Contut adess i peudo nen comprende lòn ch’a l’é capitame: che diferensa ch’a-i é da ‘ntlora! 77:7 Podrìa-lo desse che Nosgnor a l’abia bandoname për sèmper? É-lo che chiel am sara ancora bin dispòst anvers a mi? 77:8 Sò amor, ch’i savìa ch’a l’avrìa mai mancame é-lo ch’a l’é andass-ne për torné pì nen? 77:9 Podrìa-lo desse che Nosgnor a l’ha dësmentiasse ‘d soa misericòrdia? Podrìa-lo desse che chiel as na sia andass-ne vìa da mi sensa pì’ ‘d compassion e ch’a l’abia sbatù la pòrta darera ‘d chiel? Pàusa.

77:10 I sclamo: “A l’é për lòn che adess i patisso tant: la man dël Pì-Àut a agiss pì nen coma ch’a fasìa anans. 77:11 Contut am ven bin an ment tut lòn ch’it l’has fàit, Nosgnor. I m’arcòrdo dij prodis ch’it fasìe tant temp fà. 77:12 A son sèmper dëdnans a mi përchè i-j penso; i peudo nen chité ‘d pensé ‘d lòn ch’it fasìe ant ël temp passa: përché ancheuj a l’é pì nen parèj? 77:13 Nosgnor! Tut lòn ch’it fase a l’é sant e bon. A-i é gnun d’àutri ch’a sìa tanme ti. 77:14 Ti ‘t ses ël Dé dle grande maravije! Ti ‘t fase conòsse a le nassion forèste tò podèj ëspetacolos. 77:15 A l’é për tò bras fòrt ch’it l’has riscatà tò pòpol, ij dissendent ëd Giacòb e ‘d Giusèp. Pàusa.

77:16 Quand che ‘l Mar Ross a l’ha vëddute, ò Nosgnor, soe aque a l’han vardà e tërmolà! Ël mar a l’é butasse a tërmolé fin-a da soe profondità. 77:17 Le nivole a son butasse a campé giù d’eva; ël tron a stronìa dal cél; toe lòsne a sajëttavo tut dantorn. 77:18 Tò tron a stronìa da j’orissi; le losne a anluminavo ‘l mond! La tèra a l’é butasse a tërmolé e a tramblé. 77:19 Ij tò senté an mnavo a travers dël mar, tò violet a traver dle onde poderose: a l’é dovertasse là na strà che gnun a conossìa d’anans! 77:20 Ti tl’has mnà tò pòpol për cola strà tanme në stròp ëd feje, e Mosé e Aron a j’ero ij sò bërgé.



À à È è É é Ì ì Ò ò Ó ó Ù ù Ë ë
Comments