A - Testament Vej‎ > ‎Salm‎ > ‎

Salm 63

Salm 63

Lë scritor an fà conòsse soa granda anvìa dë sté a la presensa ‘d Nosgnor e a fortiss con fiusa che Dé a farà giustissia dij sò nemis.

63:1 Salm ëd David, cand ch’a l’era artirasse ant ël desert ëd Giuda. Nosgnor, ti ‘t ses mè Dé, a l’alba i son a l’arserca ‘d ti. Mia ànima a l’ha sèj ëd ti; tut mè còrp a l’ha anvìa ‘d ti an costa tèra brusà dal sol anté ch’a-i é nen d’eva. 63:2 I l’hai vëddute al santuari e i son ëstàit testimòni ëd tò podèj e splendrior1. 63:3 Èh, përchè fé l’esperiensa ‘d tò amor fedel a l’é mej che la vita midema; për lòn ij mè làver at laudran. 63:4 It rendrai làude për tuta mia vita an alvand mie man anvers a ti an preghiera. 63:5 Le sodisfassion ch’it ëm das a son motobin ëd pì che pijé part a ‘d festin pien ëd ròba bon-a da mangé. It darai làude con ëd cant ëd gòj. 63:6 I stago dësvij durant le ore dla neuit mach për pensete, 63:7 përchè it ses ëstàit ti mè agiut e i son content ëd sté a l’ombra ‘d toe ale. 63:8 Im ten-o strèit a ti: toa man fòrta am ten e i peudo sté sicur. 63:9 Ma coj ch’a complòto për masseme a saran lor ch’a ‘ndran an ruin-a. A saran lor a calé giù ant ël profondeur dla tèra. 63:10 A tombran vìtime dla spa e a vniran ëd mangé pr’ ij siacal. 63:11 Ma ‘l rè a s’arlegrerà an Dé. Tuti coj ch’a giuro ‘d dì la vrità at laudran, ma ij busiard a saran fàit sté ciuto.

Nòta

1 O “glòria”.



À à È è É é Ì ì Ò ò Ó ó Ù ù Ë ë
Comments