A - Testament Vej‎ > ‎Salm‎ > ‎

Salm 48

48. A l'é grand Nosgnor

Cost Salm a l'é ciamà "ël Càntich ëd Sion e a celebra la grandëssa e la glòria dël leugh andoa Nosgnur a l'ha sernù coma soa ca, Gerusalem. Soa presensa ant la sità a la eleva dzura ògni àutra sità e a-j sicura soa protession.

48:1 Un càntich dij fieuj 'd Corè. A l'é grand Nosgnor, e degn ëd ògni làude ant la sità 'd nòst Dé an sò mont sant. 48:2 sima magnìfica, gòj dla tèra antrega. Ël mont Sìon a smija a le sime 'd Sàfon, ma a l'é chila la sità dël gran' Rè. 48:3 Nosgnor medésim a l'é ant le tor ëd Gerusalem, ch'as arvela coma sò difensor. 48:4 Ij rè dla tèra a l'ero aleàsse për atachela tùit ansema, 48:5 ma quand ch'a l'han vëddula a son scapà dëstornà. 48:6 A son ëstàit ciapà da lë sparm e a son dobiasse dal dolor tanme na fomna ch'a l'é press a partorì. 48:7 Ti 't l'has dëstruvije tanme le gran' nav ëd Tarsis fracassà da 'l poderos vent d'orient.

48:8 Nojàutri i l'avìio sentì a dì 'd la glòria 'd cola sità, ma adess i l'oma vëddula con nòstri euj - la sità dël Signor ëd l'univers. Nosgnor a la mantniss stabil për sèmper. [Interludi].

48:9 Quand ch'i soma an tò Tempi che t'adoroma, i pensoma a tò amor ch'a na ven mai a manch. 48:10 Nosgnor! Tò nòm a lo merita pròpi, ti 't saras laudà d'un cap a l'àutr dla tèra. Toa man a l'é pien-a 'd salvëssa.

48:11 Ch'as arlegra 'l pòpol an sël mont ëd Sìon. Che tute le sità 'd Giuda a faso festa për motiv ëd toa giustissia. 48:12 Andé a përcore la sità 'd Gerusalem; fé 'n gir dantorn a soe muraje, conté le tor ch'a-i son. 48:13 Pijé nòta 'd tute soe fortificassion. Passé a l'arvista soe sitadele, parèj ch'i podreve parlene a le generassion ch'a vniran. 48:14 Parèj a l'é nòst Dé. Chiel a l'é e sarà nòst Rè për sèmper. A sarà Chiel nòstra guida fin-a a tant ch'i saroma 'n vita.

Comments