A - Testament Vej‎ > ‎Salm‎ > ‎

Salm 43

43

43:1 Rendme giustissia1, o Dé, dësfend mìa càusa contra na nassion ch'at conòss nen2, liberame da gent ëd fràuda e 'd malissia, 43:2 përchè Ti 't ses ël Dé ch'am dësfend e a guerna. Përché adess, nopà, më slontanes-to da Ti? Përchè l'avrij-ne da marcé coma s'i portèissa 'l deul a càusa dij mè nemis ch'am gavo 'l fià? 43:3 Arvela Toa lus e Toa fidelità! A saran cole mia guida! A saran cole ch'am faran da scòrta fin-a ch'i 'rtòrna a Toa santa montagna, al leugh anté ch' it ëstas. 43:4 Antlora i andrai a l'autar ëd Nosgnor, al Dé ch'am rend argiojissant, parèj ch'i manifesta mia arconossensa a Ti, ò Dé, mè Dé, con ël son dl'arpa. 43:5 Përchè ses-to tant dëscoragià, ànima mìa? Përchè ses-to tant sagrinà? Spera an Nosgnor! Përchè ancora i rendrai grassie a mè Dé ch'a l'é 'nteressasse a feme salv!

Nòte

1 O "fame vendeta".

2 O "nen fedel", "pagan".

Comments