A - Testament Vej‎ > ‎Salm‎ > ‎

Salm 34

Salm 34

An ës càntich ëd arconossensa, l'autor a làuda Nosgnor për avèjlo liberà dai sò sagrin. A ancoragia d'àutri a la fidelità a Dé, a-j dis coma fé piasì a Dé, e a-j conferma ch' ël Signor a goerna ij sò sërvent. Cost Salm a l'é n'acròstich; ij vers 1-21 a comenso con le litre sucessive dl'abecé ebràich.  Ël vers final a séguita nen cost model. 

34:1 Scrivù da David, quand che chiel a l'ha fàit finta d'esse fòl dëdnans a Abimelech, che peui ël rè a l'ha falo mandé via. I laudrai Nosgnor an tùit ij temp; soe làude a saran sèmper an mia boca. 34:2 Mè vant a sarà mach Nosgnor; ch'as faso coragi j'ùmil quand ch'a lo sento. 34:3 Vnì, contoma a tuti dla grandëssa 'd Nosgnor; magnificoma tùit ansema sò Nòm! 

34:4 I l'hai pregà Nosgnor, e chiel a l'ha scotame; a l'ha liberame da tute le paure ch'i l'avìa. 34:5 Tuti coj ch'a lo serco pr' esse giutà a 'rtornaran con la facia anrajant ëd gòj; gnun-a ombra 'd vërgògna a rendrà scura soa facia. 

34:6 Quand ch'i j'ero dësperà, i l'hai pregà, e 'l Signor a l'ha scotame. Chiel a l'ha salvame da tùit ij mè sagrin. 34:7 Përché l'àngel dël Signor a l'é na vardia: a sta dantorn e dësfend tùit coj ch'a l'han timor ëd chiel. 

34:8 Tasté e vëdreve coma ch' a l'é bon ël Signor. A son beà coj ch'as buto a la sosta 'd chiel. 34:9 Àbie timor ëd chiel, vojàutri, ò pòpol sant, përchè coj ch'a lo rispeto a-j mancrà gnente. 34:10 Fin-a ij leoncin queivòlta a patisso la fam, ma coj ch'a l'han fiusa an Nosgnor a manco 'd gnente ch'a sia bon. 

34:11 Vnì, vojàutri, ij mè fieuj, scoté bin: iv mostrarai lòn ch'a l'é avèj timor ëd Dé. 34:12 J-lo queidun ch'a veul vive na vita longa e fosonanta? 34:13 Anlora ch'a tratnissa soa lenga da 'l dì 'd còse grame e ij sò làver da dì 'd busiardarie! 34:14 Volta la schina al mal e fà 'l bin. Serca lòn ch'a l'é për la pas e date da fé për mantnila. 

34:15 J'euj 'd Nosgnor a goerno coj ch'a fan lòn ch'a l'é giust; soe orije a stan atente ai sò crij d'agiùt. 34:16 Ma 'l Signor as volta contra ij malfasent; chiel a scancelërà la memòria 'd lor da la facia dla tèra. 

34:17  Nosgnor a scota sò pòpol quand che lor a-j ciamo d'agiut. A-j tira fòra da tùit ij sò maleur. 34:18 Nosgnor a l'é davzin a coj ch'a l'han ël cheur s-ciapà; a libera coj ch'a l'han lë spirit crasà. 

34:19 A son tanti ij sagrin ëd n'òm giust, ma Nosgnor sèmper a-j ven ancontra con sò agiùt. 34:20 Përchè 'l Signor a goerna j'òss dël giust: gnanca un ëd lor a sarà s-ciapà! 

34:21 Ëd sicur al malfasent la dësgrassia a-j tombrà a còl e coj ch'a l'han ël giust an ghignon a saran castigà. 34:21 Ma 'l Signor a riscata coj ch'a lo servo. Gnun ch'as buta a la sosta 'd chiel a sarà condanà. 


À à È è É é Ì ì Ò ò Ó ó Ù ù Ë ë
Comments