A - Testament Vej‎ > ‎Salm‎ > ‎

Salm 29

29. Rende onor a Nosgnor

Ant cost imn ëd làuda, l'autor a ciama la ciambrèja dël cel a rendje onor a la magnificensa real ëd Nosgnor. A fa na descrission ëd Soa potensa devastant coma ch'a l'é arvelà ant ij temporal, e a fortiss che 'l Signor a manifesta costa potensa afrosa a benefissi 'd Sò pòpol. Ël contest original ëd cost Salm a l'era na coragiosa polémica contra la divinità cananita pagan-a 'd Baal, dio dle tempeste. A fortiss ch'a l'é 'l Signor, ël ver Dé, ch'a l'é rè e ch'a sta 'n control dj'element ëd la tempesta, nen lòn ch'a diso ij pagan.

29:1 Rende onor a Nosgnor, voi ch'i seve ij sò fieuj1, rende onor a Nosgnor për Soa glòria e fòrsa! 29:2 Rende onor a Nosgnor për la glòria 'd Sò Nòm! Rende a Nosgnor l'adorassion për la magnificensa 'd Soa santità!

29:3 La vos ëd Nosgnor a 'rson-a dzura ij mar. Ël Dé dla glòria a tron-a. Nosgnor a tron-a dzura la fòrsa dël mar. 29:4 La vos ëd Nosgnor a l'é poderosa! La vos ëd Nosgnor a l'é majestosa! 29:5 La vos ëd Nosgnor a s-ciapa ij sitron poderos. Nosgnor a s-ciapa ij sitron dël Lìban.

24:6 A l'é Chiel ch'a fà sauté le montagne dël Lìban tanme 'd vailèt; a l'é Chiel ch'a fà sauté 'l Mont Hermon tanme 'n bocin sarvaj. 29:7 La vos ëd Nosgnor a colpiss tanme la lòsna. 29:8 La vos ëd Nosgnor a fà tramblé 'l desert; Nosgnorr a socrola 'l desert ëd Kadesh. 29:9 La vos ëd Nosgnor a stòrz ij roj potent e a dëspòja le foreste. Tut, ant Sò templ, a crija: Glòria! 29:10 A l'é Nosgnor ch'a dòmina ans j'aque dl’inondassion. Nosgnor a regna coma 'n rè për sèmper.

29:11 A l'é Nosgnor ch'a dà la fòrsa a Sò pòpol. Nosgnor a lo benedìss con la pas.

Nòta

1A fà riferiment dzurtur a j'esse dël cel, j'àngej, la cort ëd Nosgnor.

Comments