A - Testament Vej‎ > ‎Salm‎ > ‎

Salm 27

27. Nosgnor am anlùmina e am salva

27:1 Un salm ëd David. Nosgnor am anlùmina e am salva: chi podria-lo feme tëmma? Nosgnor a l’é tanme na muraja ch’a guerna mia vita: chi podrìa-lo sbaruveme? 27:2 Quand che ‘d gent grama am ven ancontra për feme ‘d mal1, quand ch’ij mè nemis e rivaj am dan l’atach, a son lor a antrapesse e a casché a gambe drite! 27:3 Bele se n’armada poderosa a s’acampèissa tut d’antorn a mi për feme la guèra, mè cheur a l’avrìa gnun-a tëmma; bele s’am dèisso l’atach, im sentirìa al sicur. 27:4 Na ròba sola i l’hai ciamaje a Nosgnor, e mach ëd cola-lì i l’hai anvìa: ëd podèj vive ant la ca ‘d Nosgnor tùit ij dì ‘d mia vita për gòde ‘d soa blëssa2 e vijé an meditassion ant sò Templ. 27:5 A l’é chiel ch’am buta a la sosta quand ch’ij sagrin a rivo; chiel am stërma ant sò santuari; am pòrta an sn’àuta ròca andova gnun a podrìa mai riveje. 27:6 A l’é parèj ch’i peudo aussé la testa fier dëdnans ai mè nemis. Ant sò santuari i-j smon-o ‘d sacrifissi ‘d vitòria, làude e cantich an onor ëd Nosgnor. 27:7 Scota, Signor, scota mia preghiera; sie misericordios e rëspondme. 27:8 Mà cheur a l’ha sentì ch’it disìe: “Ven e parla con mi”, e mè cheur a rëspond: “Signor, varda ch’i ven-o”. 27:9 Virme nen le spale. Manda nen vìa tò sërvent quand ch’it ‘t ses anrabià con mi. Ti ‘t l’has sèmper giutame. Chitme pa adess, bandon-me pa, ò mè Dé, mè salvator. 27:10 Contut, i n’hai la certëssa: mè pare e mia mare a podrìo bin bandoneme, ma ti nò, ti ‘t m’abandonras mai, ti ‘t më staras sèmper dacant. 27:11 Mostrame coma vive3, menme arlongh ël senté giust, da leugn dai mè nemis4. 27:12 Lass-me nen tombé ant soe man: lor am acuso ‘d ròbe ch’i l’hai mai fàit5; a më mnasso ‘d violensa con ògni respir ch’a fan. 27:13 Epura i l’hai fiusa: i vëdrai la bontà ‘d Nosgnor antramentre ch’i son sì an sla tèra dij viv. 27:14 Spera an Nosgnor; sie fòrt, che tò cheur a vegna nen a manché. Èh, spera an Nosgnor, chiel at tradirà mai.

Nòte

1Let. “Për angorgioneme tut antregh”

2O “përfession”.

3O “tò senté”.

4O “përchè ij mè nemis a më speto”.

5O “a tiro fòra ‘d fàuss testimoni contra ‘d mi”.

Comments