A - Testament Vej‎ > ‎Salm‎ > ‎

Salm 26

26. Nosgnor! Aferma mia nossensa

L'autor a invita Nosgnor a buté a la preuva soa dritura, a fortiss soa nossensa e a diciara soa fidelità a Dé.

26:1 As arfà a David. Nosgnor, mé Dé, aferma mia nossensa1, përché i l'hai portame bin2; i l'hai avù fiusa ant ti sensa avèj un qualsëssìa dubi3. 26:2 Vardme bin, butme a la preuva, fà l'esam ëd mie motivassion e 'd mè cheur. 

26:3 I l'hai la certëssa4 che tò amor fidel am vnirà mai a manché e i l'hai vivù conforma toa vrità. 26:4 Ij busiard a son mai stàit ij mè compagn e i son mai andàit ansema a 'd gent fàussa5. 26:5 I l'hai an ghignon coj ch'as buto ansema mach për tramé lòn ch'a l'é mal e i arfuso 'd fé società con le canaje.

26:6 Nosgnor! Im lavo le man për diciaré mìa nossensa e i ven-o a tò autar. 26:7 cantand a àuta vos mia arconossensa e nunsiand toe maravije. 26:8 Nosgnor! I veuj bin a la ca anté ch'it stas, ël leugh andoa toa gloriosa presensa a l'ha fasse n'abitassion.

26:9 Contme nen an tra ij pecator, tra coj ch'a comëtto 'd crìmen ëd sangh; 26:10 Soe man a son anflà d'intension grame; ciapé 'l bocon6 a l'é lòn ch'a-j pias ëd pì.

26:11 I son nen parèj ëd lor; mi i vivo con onestà. Àbie misericòrdia 'd mi e riscatme. 26:12 I j mè pè a marcio an sla stra drita. Ant la granda ciambrèa 'd tò pòpol i laudrai Nosgnor!

Nòte

1O "Fame giustissia".

2O "i l'hai marcià an sla stra drita".

3O "sensa balaucé".

4O "la cossiensa".

5O "ipòcrita".

6O "corumpe".

Comments