A - Testament Vej‎ > ‎Salm‎ > ‎

Salm 25

25. Nosgnor! Con mia preghiera i ven-o dëdnans a Ti

L'autor a prega Dé për soa protession, guida e përdon e a conferma ch'a veul essje fedel e ch'a l'ha fiusa an Chiel. Cost Salm a l'é n'acrostich, mica vers a comensa con na letra dl'alfabèt ebraich an sucession. L'ultim vers a seurt fòra da cost òrdin.

25:1 Un salm ëd David. Nosgnor! Con mia preghiera i ven-o dëdnans a Ti1. 25:2 Ò mè Dé, i l'hai fiusa 'n Ti, lass-me nen esse umilià, lassa nen ch'ij mè nemis as arlegro 'd mia dëròta. 25:3 Gnun ch'as confida 'n Ti a sarà mai dësvërgognà, m' a saran ësvergognà coj ch'a monto 'd trapole për fé drocheje 'ndrintra d'àutri. 25:4 Nosgnor! Fa che mi i conòssa col ch'a l'é 'l giust senté; mostrame la strà ch'i l'hai da seguité. 25:5 Menme an toa vrità e mostrame, përché Ti 't ses ël Dé ch'am salva. A-i é mai 'n moment sol ch'i buta nen mia speransa 'n Ti. 25:6 Dësmentiete nen, ò Signor, d'esse compassionèivol e fedel, përché ti 't ses sèmper stàit parèj. 25:7 Dësmentiete pitòst dij pecà ch'i l'hai fàit quand ch'i j'era giovo. Arcòrdëte 'd mi për tò amor, për toa bontà, ò Signor. 25:8 Nosgnor a l'é bon e a fà lòn ch'a l'é giust, Chiel a mostra 'l senté giust ai pecator. 25:9 A 'ncamin-a j'ùmil a fé lòn ch'a l'é giust e a-j mostra la strà ch'a l'han da ciapé. 25:10 Ël Signor a men-a sèmper con amor e fidelità coj ch'a rispeto le disposission ëd Sò pat d'aleansa. 25:11 Nosgnor! Për l'onor ëd Tò nòm përdon-a ij mè pecà, përch' a son tanti. 25:12 Chi ch'a son coj ch'a l'han timor ëd ël Signor? Chiel a-j mostrerà 'l senté ch'a l'han da pjé. 25:13 Minca neuit a 'rposeran content2 e ij sò dissendent a 'rditran la tèra. 25:14 Nosgnor a l'é n'amis për coj ch'a lo rispeto3 e a-j mostra l'importansa 'd essje gropà da n'Aleansa. 25:15 Ij mè euj a vardo sèmper vers Nosgnor, përché Chiel am salva da le tràpole ch'am buto dëdnans ij mè nemis. 25:16 Virete anvers a mi e abie 'd compassion përch' im trovo sol e a-i é gnun ch'am giuta. 25:17 Ij mè problema a son pes che pes: pòrtme fòra da tùit ij mè sagrin! 25:18 Varda coma ch'i son, maluros e dësgrassià: përdon-a tùit ij mè pecà. 25:19 Varda quanti ch'a son ij mè nemis, quant ch'a son gram e ch'a l'han-me 'n ghignon. 25:20 Guerna mè vita e liberame. Lassa nen ch'i sia dësvërgognà, përché Ti't ses mè rifugi. 25:21 La dritura e l'onestà am guerneran, përché mach an Ti i trovo mia speransa. 25:21 Nosgnor! Rriscata Israel da tuit ij mal ch'a lo sagrin-o.

Nòte

1O "A Ti i levo mia ànima".

2O "a fara l'esperiensa 'd Sò favor".

3O "ch'a l'han timor reverensial për Chiel".

Comments