A - Testament Vej‎ > ‎Salm‎ > ‎

Salm 19

19. Ij céj a nunsio la glòria 'd Nosgnor

Ël poeta a lauda Nosgnor perché Chiel a l'ha 'rvelasse tant ant ij cej quant ant la Lej 'd Mosè. Peuj a na tira le some con na preghiera, anté ch'a ciama al Signor ëd guernelo dal pecà e d'aprové ij sò pensé e le soe paròle.

19:1 Për ël diretor dla musica. Salm ëd David. Ij céj a nunsio la glòria 'd Nosgnor, la vòlta del cel an fà conòsse l'euvra 'd soe man. 19:2 Un dì a fà passé 'd conossensa a l'àutr dì, e na neuit a 'rvela la grandëssa 'd Nosgnor a n'àutra neuit. 19:3 A l'é pa na lenga, a son pa 'd paròle ch'as peusso nen antende1. 19:4 Soa vos a 'rsona da part a part dla tèra, soe paròle a viagio fin-a a l'orisont pì lontan. Ant ël cel Dé a l'ha piantà na tenda për ël sol. 19:5 Tanme në spos, ël sol a seurt da soa stansia da let. A l'é tanme n'òm fòrt ch'a l'ha gòj 'd fé soa cursa. 19:6 Chiel a ven fòra da l'orisont ël pì lontan e a va da na part a l'àutra dël cel; a-i é gnente ch'a peussa scapé da sò calor.

19:7 La lej ëd Nosgnor a l'é përfeta e a guerna la vita 'd coj ch'a l'osservo. Dle régole che Nosgnor a l'ha stabilìe: as peul fidess-ne. A dan ëd sapiensa a coj ch'a l'han nen d'esperiensa. 19:8 Ij precet ëd Nosgnor a son giust e a dan ëd gòj al cheur. Ij comandament ëd Nosgnor a son pur e a 'nlumino j'euj. 19:9 Ij comand ëd tëmme Nosgnor a son giust e a duro për sèmper. Ij giudissi ch'a l'ha dàit Nosgnor a son degn ëd fiusa e dël tut giust. 19:10 A l'han un valor pi grand che l'òr, fin-a da na granda quantità d'òr. A son pì doss che l'amel, fin-a pì doss dl'amel ch'a ven diret da 'n cotel d'avije. 19:11A l'é pròpi vera: tò servitor a trova ambelelà na guida moral sicura. Coj ch'a-j scoto a trovo na grand' arcompensa.

19:12 Chi é-lo ch'a podrìa comprende tùit ij sò eror? Përdon-me ij pecà ch'i l'hai fàit për fala2. 19:13 Ëd pì, ten lontan tò servitor dal comëtte dij pecà 'd presunsion, parèj che la faso nen da padron an mia vita. Antlora i saraj sensa rimpròcc, nossent da trasgression grossere.

19:14 Che le paròle 'd mia bòca e la meditassion ëd mè cheur a sio agreàbil dëdnans a Ti, Nosgnor, mia fòrsa e mè Redentor!

Nòte

1O "dont le son as peussa nen antende".

2O "eror stërmà".

Comments