A - Testament Vej‎ > ‎Salm‎ > ‎

Salm 17

17. Nosgnor!! Considera mia giusta càusa

Ël poeta a ciama De ch'a 'nterven-a an sò favor përché soa vita a l'é mnassà da nemis arzigos. A fà apel a la giustissia divin-a, përchè a l'é cert ëd soa nossensa. Pròpi përchè a l'é nossent, chiel as aspeta d'ancontré Nosgnor e arsèive na paròla ëd consolassion.

17:1 Orassion ëd David. Nosgnor!! Considera mia giusta càusa. Fà atension a mè crij d'agiut. Scota la preghiera ch'it smon-o s-cet. 17:2 Fà na giusta decision an mè favor! Delibera lòn ch'a l'é giust! 17:3 Ti 't l'has guardà da bin le motivassion ëd mè cheur. It l'has esaminame ant ël mentre ch'i dormìa. It l'has fane na valutassion e 't l'has trovà ch'i l'avìa gnun pecà. I l'hai ferm la determinassion ëd dì gnente ch'a peussa disse ‘n pëccà. 17:4 I l'hai nen seguità lòn che 'l mond a fà. Giusta coma ti 't l'has comandà, i l'hai nen seguità le pianà 'd coj ch'a son dij violent. 17:5 I seguito diligent la via ch'it l'has mostrame. I na ciapo gnun-a deviassion. 17:6 Nosgnor! It t'invoco përchè it ëm scotraj. Scotame! Scota lòn ch'i diso! 17:7 Fedel coma ch’it ses, fa vëdde a tuti le maravije ch'it fas, ti ch'it libere coj ch'a vardo a ti për trové 'd protession dai sò nemis. 17:8 Guern-me tanme ti 't guerneissa ël luminèt dël tò euj! Stërmëme a l'ombra 'd toe ale! 17:9 Guern-me da coj òm gram ch'am ataco. Ij mè nemis am stan d'antorn mach për massé. 17:10 A l'han ëd cheur ëd pera, a parlo con arogansa. 17:11 Am ataco, adèss lor am stan d'antorn. A l'han l'intension ëd campeme a tèra. 17:12 Ël mè nemis a l'é tanme 'n leon ch'a veul fé a tòch soa preda, tanme 'n leon giovo ch'as quacia an dij leugh stërmà. 17:13 Seurt fòra, Signor! Pija posission dëdnans a chiel! Butlo an gionojon! Dovra Toa spa për libereme da stj'òm gram! 17:14 Dovra Toa potensa për libereme da sti sasin, dai sasin dë sto mond! Soa prosperità ‘d lor a-j rend arogant. Ti 't l'has daje abondansa 'd beni, tut lòn ch'a vorio. A l'han tante masnà e a lor a-j lasseran le soe richësse. 17:15 Për lòn ch'am rësguarda, përch' i son nossent, i vëddrai Tò visagi. Quand che mi 'm dësvijaraj, I godraj 'd Toa revelassion.

Comments