A - Testament Vej‎ > ‎Salm‎ > ‎

Salm 16

16. Nosgnor! Guern-me: i son ëvnù da ti për trovè d’arpar

Nosgnor a promët dë sté sèmper dacant ai sò fedej: gnanca la mòrt a-j fà tëmma.

16:1 Psalm ëd David. Nosgnor! Guern-me: i son ëvnù da ti për trovè d’arpar. 16:2 I diso a Nosgnor: It ses Ti mè Dé! A-i é gnun coma ti ch’am fasa autërtant content.

16:3 Ai sant ch’a j’é an sla tèra, gent fòrta, a va tut mè rispet e afet. 16:4 Tutun, ch’as multiplico ij sagrin ëd tuti coj ch’a-j van dapress a ‘d dio fàuss. I veuj nen fé part dij sò sacrifissi sagnos, e gnanca i veuj pronunsié ‘l nòm dij sò dio.

16:5 Nosgnor! Mia ardità it ses mach ti, It ses ti mia benedission. Ti ‘t guernes tut lòn ch’a l’é ‘l mè. 16:6 La part dl’ardità ch’a l’é tocame a l’é delissiosa. Che maravijosa ardità!

16:7 Ch’a sia benedì Nosgnor ch’am fà da guida: chiel am dà d’istrussion fin-a ‘d neuit. 16:8 I sai che Nosgnor a l'é sèmper ansem a mi. I tërmolerai mai da la tëmma përchè chiel am ëstà sèmper dacant.

16:9 Gnun-a surprèisa che mè cheur a sia sèmper giojos: im n’arlegro sèmper: mè còrp a arpòsa sèmper pacifich.

16:10 Ti’t m’abandonras mai an mesi ai mòrt, It lasseras mai che col ch’at t’é fedel as corumpa ant la tomba.

16:11 Ti’t ëm mostrerà ‘l senté dla vita an acordandme la gòj ëd toa presensa e ‘l piasì ‘d vive ansema a ti për sèmper.



À à È è É é Ì ì Ò ò Ó ó Ù ù Ë ë
Comments