A - Testament Vej‎ > ‎Salm‎ > ‎

Salm 148

148. Laudé Nosgnor! Laudé Nosgnor dai cej!

Ël poeta a ciama tuta la creassion a laudé 'l Signor pËrchè Chiel a l'é 'l Sovran Rè dël mond.


148:1 Laudé Nosgnor! Laudé Nosgnor dai cej! Laudelo ant j'auteur! 148:2 Laudelo, ò àngej tuti! Laudelo, ò armade tute dël cel! 148:3 Laudelo, ò lun-a e sol, ò voi tute stèile lusente! 148:4 Laudelo, ò cej dij cej! Laudelo, ò aque ch'a stan dzura dle nivole! 148:5 Che tute le còse creà a dago làuda al Signor, përch' a l'ha dàit un comand e lor a son vnùe a l'esistensa. 148:6 A l'ha fàile për duré e a-i saran për sèmper, ant l'eternità. Sò decret a sarà nen arvocà. 148:7 Laudé 'l Signor da la tèra, ò creature dël profondeur dij mar; 148:8 feu e tempesta, fiòca e nivole, vent ëd tempesta ch'a ubidìss ai sò òrdin; 148:9 montagne e tute le colin-e, èrbo da fruta e tùit ij sitron; 148:10 bestie sarvaje e animaj doméstich, serpent ch'a rabasto e osej ch'a volo; 148:11 ij rè dla tèra e tute le gent, ij prinsi e ij giudes dla tèra; 148:12 giovnòt e fije, j'ansian e le masnà. 148:13) Che tuti a làudo 'l nòm dël Signor, përché Sò nòm a l'é motobin àut. Soa glòria a tronègia [1] dzura la tèra e 'l cel! 148:14 Chiel a l'ha rendù fòrt Sò pòpol, a l'ha onorà coj ch'a-j son fedel - ël pòpol d'Israel ch'a l'é davzin a Chiel. Laudé 'l Signor!

Nòte

[1] O "dòmina"
Comments