A - Testament Vej‎ > ‎Salm‎ > ‎

Salm 145

145

Lë scritor a làuda Nosgnor përchè ch’a l’é un rè giust e misericordios ch’as pija soen ëd sò pòpol.

145:1 Àlef. I t’esaltrai, Ti ch’it ses mè Dé e mé Rè. I benedirai Tò Nòm për sèmper. 145:2 Bet. it benedirai tùit ij dì. Vera, mi i laudrai Tò Nòm për sèmper. 145:3 Ghimel. Nosgnor a l’é grand e sèmper degn d’esse laudà. A Soa grandëssa a-i é gnun confin . 145:4 Dàlet. Che tute le generassion at làudo për lòn ch’it l’has fàit, ch’a nunsio Toa vajansa. 145:5 He. Ch’a proclamo lë splendrior glorios ëd Toa majestà. Ij prodis ch’it l’has fàit a son l’oget ëd mia meditassion. 145:6 Vàu. Ch’a parlo ‘d toa potensa da tëmme e i contarà a tuti ‘d Toa grandëssa. 145:7 Zàin. Ch’a faso conòsse daspërtut la memòria ‘d Toa gran bontà e ch’a clamo ij Tò favor.

145:8 Het. Nosgnor a l’é compassionos e benign, pasi ant ij castigh e grand ant l’amor. 145:9 Tet. Nosgnor a l’é bon anvers a tuti e a dà ‘d cheur a tute soe creature. 145:10 Iòd. Che Toe creature t’esalto. Nosgnor: che ij Tò fedej at benedisso. 145:11 Caf. Ch’a proclamo la glòria ‘d Tò regn e ch’a parlo ‘d Toa vajansa. 145:12 Làmed. Ch’a faso conòsse a tuti Toe imprèise, lë splendrior glorios ëd Tò regn. 145:13 Mem. Tò regn a s’estend për tùit ij sécoj, Tò imperi a tute le generassion. Nun. Le paròle ‘d Nosgnor a son degne ‘d fidansa, soe euvre a son euvre d’amor. 145:14 Sàmech. Nosgnor a sosten coj ch’a son lì lì për tombé e a riàussa coj ch’a son dobià sota sò càrich.

145:15 Àin. J’euj ëd tuti at vardo con ësperansa; ti ‘t jë das da mangé quand ch’an n’han da manca. 145:16 Pe. Quand ti ‘t deurbe toa man, ti ‘t pasie la fam e la sèj ëd tùit ij vivent. 145:17 Sade. A son ëd senté ‘d bontà coj ëd Nosgnor, soe euvre a son d’euvre d’amor. 145:18 Còf. Nosgnor a sta dacant acoj ch’a l’invòco, a coj ch’a l’invàco con sincerità. 145:19 Res. A conced ij desideri ‘d coj ch’a l’han timor ëd chiel; a scota soe supliche e a-j salva. 145:20 Sin. Nosgnor a goerna coj ch’a-j veulo bin, ma farà dësperde coj ch’a son nen giust. 145:21 Tàu. Che ij mè làver à làudo Nosgnor; che tuti a benedisso sò Nòm sant për ij sécoj dij sécoj.



À à È è É é Ì ì Ò ò Ó ó Ù ù Ë ë
Comments