A - Testament Vej‎ > ‎Salm‎ > ‎

Salm 111

111. Con tut mè cheur i laudrai Nosgnor

Lë scritor a làuda Dé për Soe assion maravijose, dzortut për la manera ch'a l'ha 'd provëdde a Sò pòpol e liberelo dai sagrin. Es salm a l'é n'acròstich. Apress n'apel a la làuda ant l'introdussion, minca lìnea dël test original (22 an tut) a prinsìpia con le litre dl'alfabet ebraich, ant sò òrdin. Sòn a podoma nen rendlo an nòstra lenga.

111:1 Laudé Nosgnor! Con tut mè cheur i laudrai Nosgnor ant la radunansa 'd Sò pòpol, coj ch'a-j son divot. 111:2 Lòn ch' ël Signor a fà a l'é pròpi anciarmant! A son ëd còse ch'a merito d'esse bin peisà da coj ch'a l'han la gòj d'esse ij Sò amis. 111:3 An tut lòn ch'a fà, ël Signor a dà la dimostrassion ëd Soa glòria e majestà. 111:4 Soa giustissia a falìss mai1. Nosgnor a l'é misericordios e pien ëd compassion. A fà 'd còse ch' a saran sèmper ant la memòria. 111:5 A-j dà da mangé a coj ch'a-j van dapress2; as arcòrda sèmper d'esse gropà a lor da n'aleansa. 111:6 A Sò pòpol ël Signor a l'ha mostraje Soa gran' potensa an fasendje don ëd la tèra d'àutre nassion. 111:7 Tut lòn ch'a fà a l'é bon e giust e ij sò comandament a son degn ëd fiusa. A son ver e frem për sèmper; a l'han d'esse scotà coma ch'as dev e con diligensa3. 111:8 L'ubidiensa4 al Signor a l'é 'l fondament5 dla vera sapiensa6. 111:9 Tuti coj ch'a-j dan da ment a l'han ëd bon sens. 111:10 10Laudelo për sèmper!

Nòte

1O "Soa bontà a dura për sèmper".

2O "coj ch'a l'han tëmma (reverensial) ëd Chiel".

3O "integrità", "dritura".

4O "la tëmma".

5O "ël prinsipi fondamental".

6O "ëd na vita ch'a sia savia".



À à È è É é Ì ì Ò ò Ó ó Ù ù Ë ë

Comments