A - Testament Vej‎ > ‎Salm‎ > ‎

Salm 1

1. Bonuros coj ch'a séguito nen ij consèj dla gent empia

Ant cost Salm sapiensial, l'autor a consija sò auditòri d’arfudé lë stil ëd vita ëd coj ch'a l'han gnun-a religion e d’esse fidej a Nosgnor. Lë scritor a buta 'n confront la sòrt ëd coj ch'a l'han gnun-a religion con cola dij giust. A arleva coma ij prim a la fin a saran ruinà, antant ch'ij giust a fiorisso përchè Nosgnor a-j soagna e a-j dà Soa protession.

1:1 Bonuros coj ch'a séguito nen ij consèj dla gent empia1, coj ch'a marcio nen an sla strà dij pecator, e ch'as seto nen an compagnìa djë sbefios2. 1:2 Bonuros a son coj ch’a pijo piasì ant la lej ëd Nosgnor, e ch'a la médito dì e neuit. 1:3 Coj-lì a saran tanme d'erbo piantà arlongh la sponda 'd na rivera e ch'a dan sò frut an soa stagion. Soe feuje a ven-o mai sëcche e soa produssion a l'é sèmper fosonanta. 1:4 A sarà nen cola-lì a sòrt dla gent empia: lor-lì a saran tanme 'd lola3 bofà dal vent. 1:5 Dëdnans al giudissi a savran nen còsa rësponde. Ij pecador a trovran gnun pòst dacant a coj che a Nosgno a-j veulo bin. 1:6 Nosgnor a vija an sël sënté dij giust e a-j guerna, ma 'l senté dla gent empia a men-a mach a la perdission.

Nòte

1O "coj ch'a son nen giust", "j'ingiust". An ebràich ël tèrmin רְשָׁעִים (rÿsha’im, “ingiust”) a dëscriv ëd gent ch'a l'é superba, che an pràtica a l'é sensa Dé (Salm 10:2,4,11), ch'a l'ha an òdio ij comandament ëd Dé, ch'a fà lòn ch'a l'é pecà, ch'a dis ëd busiardarie e 'd maldicense (Salm 50:16-20), e ch'a ambreuja j'àutri (Salm 37:21).

2O “schernitor”.

3O “paja”.

Comments