A - Testament Vej‎ > ‎Neemìa‎ > ‎

Neemìa 8

Neemìa

8

Letura pùblica dla Lej

Tùit j’israelita a j’ero giumai stabilisse ant soe sità e, quand ch’a l’é rivà ‘l mèis ch’a fà set ëd l’ann 1tut ël pòpol a l’é congregasse unànim[1] ant la piassa ch’a-i é giusta dëdnans a la Porta dle Aque. A l’han ciamaje a Esdra, ël magìster dla Lej[2]ch’a portèissa ‘l lìber dla Lej ëd Mosè che Nosgnor a l’avìa dàit a Israel. 2Parèj ël sacerdòt Esdra a l’ha portà ‘l lìber dla Lej dëdnans al pòpol congregà. A-i era j’òm, le fomne e tùit ij cit ch’a podìo comprende. 3A l’era ‘l prim dì dël mèis ch’a fà set[3]. Ambelelà, ant la piassa ch’a stà dëdnans a la Pòrta dle Aque, da l’alba fin-a a mesdì, Esdra a l’ha lesù ‘l liber ëd la Lej ëd Mosè a j’òm, a le fomne e ai cit ch’a podìo comprende. Tut ël pòpol a fasìa motobin d’atension a la letura. 4Esdra, ël magìster dla Lej, a stava drit an pé dzura na tribun-a ‘d bòsch ch’a l’avìo prontajla për l’ocasion. Dacant a chiel, a soa drita, a-i era Matitià, Siema, Anajà, Urià, Hilchìa e Maasejà, e a soa mancin-a Pedajà, Misiael, Malchià, Hasium, Asbaddana, Zacarìa e Mesiullam. 5Esdra, ch’a stasìa an bela vista dëdnans al pòpol, a l’ha dovertà ‘l lìber dëdnans a tuti. Quand ch’a l’han vëddù ch’a dovertava ‘l lìber, tùit a son alvasse an pé. 16Esdra a l’ha benedì Nosgnor, ël gran Dé, e tut ël pòpol a l’ha aussà le man e a l’ha rësponduje: “Amen! Amen!”. Peui a son prosternasse fin-a a toché la tèra con la front pr’ adoré Nosgnor. 7Antramentre che ‘l pòpol a stava drit a sò pòst, quej Levita a-j dëspiegavo la Lej. A j’ero Giosuè, Bani, Sierebìja, Giamin, Acub, Siabetai, Odavià, Maaseià, Chelita, Azarìa, Giosabad, Hanan e Pelajà. 8A lesìo ‘d manera ciàira ël lìber ëd la Lej ëd Nosgnor e a na dëspiegavo ‘l sens. Parèj a giutavo ‘l pòpol a comprend-ne ‘l test. 9Tut ël pòpol a l’era motobin comòss a sente le paròle dla Lej. Për lòn Neemìa, ch’a l’era ‘l governator, Esdra, ël sacerdòt e magìster dla Lej, e ij Levita ch’a na dëspiegavo ‘l test a la gent, a l’han dije: “Ël dì d’ancheuj a l’é ‘n dì sant, dedicà a Nosgnor, vòst Dé. Àbie nen ëd magon e pioré nen!”. 10Esdra a l’ha giontà: “Andé e fé festa: mangé ‘d ròba bon-a e bèive bin. Fene part con coj ch’a l’han gnente ‘d pront, përchè ‘l dì d’ancheuj a l’é ‘n dì sant, dedicà a Nosgnor. Sie nen trist: che la goj ch’a ven da Nosgnor a sìa vòstra fòrsa!”. 11Ëdcò ij Levita a sercavo d’achieté la gent. A disìo: “Pioré pì nen, che ancheuj a l’é ‘n dì sant. Sìe nen trist!”. 12Antlora tut ël pòpol a l’é andass-ne a mangé e a bèive. A l’han fane part con tuti e a l’han fàit na gran festa përchè a l’avìo scotà le paròle ‘d Nosgnor e a l’avìo comprendù ‘l sens dle còse ch’a l’avìo mostraje.

Celebrassion dla Festa dle Caban-e

13L’indoman, ij cap ëd le famije ‘d tut ël pòpol a son riunisse con ij sacerdòt, ij Levìta e con Esdra, ël magìster dla Lej, pr’ ëstudié an detaj la dotrin-a dla Lej. 14Ant la Lej che Nosgnor a l’avìa prescrivù pr’ ël mojen ëd Mosè, a l’han trovà scrit che j’israelita a l’avìo da sté drinta ‘d caban-e durant tùit ij dì dla festa dël mèis ch’a fà set, 15e che a l’avìo da spantié për Gerusalem e për tute le sità sta crija-sì: “Seurte a le colin-e për ciapé ‘d branche d’ulivé, d’ulivé sarvaj, ëd mortela, ëd palma e d’àutre frasche, e fene ‘d caban-e, tal com a stà scrit ant la Lej”. 16Antlora ël pòpol a l’é ‘ndàit a serché ‘l brancage e a l’han fasse ‘d caban-e ch’a l’han butaje an sle trasse ‘d soe ca, ant le cort, d’àutre an sj’andron dël templ ëd Dé, o ant la piassa dla Pòrta dle Aque, o ant la piassa dla Pòrta d’Efraim. 17Parèj, tuti coj ch’a j’ero tornà da la deportassion a l’han fasse ‘d caban-e e a son ëstaje ‘ndrinta durant la festa. A l’era la prima vira che j’israelita a j’ero torna ancaminasse a felo dal temp ëd Giosuè, fieul ëd Nun. La gòj ch’a n’avìo a l’era sensa mzura. 18Minca dì, dal prim dì dla festa fin-a a l’ùltim, Esdra a lesìa un tòch dël lìber dla Lej ëd Nosgnor. La festa a l’é durà set dì e, ant ël dì ch’a fà eut, a son congregasse con solenità, coma ch’a la Lej a dis ëd fé.

Nòte
  1. Lét. “tanme ‘n sol òm”.
  2. O “lë scriba”.
  3. Ël dì 8 d’Otòber.
Comments