A - Testament Vej‎ > ‎Isaia‎ > ‎

Isaia 64

Isaia 64
  • (1) Ò, se mach it squarsèisse ij cej e calèisse giù! Le montagne a tramblerìo dënars a Ti! 
  • (2) Coma ch'a fà ël feugh quand ch' a brusa 'l bòsch sèch o ch'a fà beuje l'eva, ch' ij tò aversari a sapio coma ch' it ses e che le nassion a tërmolo për motiv ëd Toa presensa.
  • (3) Quand che Ti 't l'avìe ciapane 'd surprèisa con ëd portent afros, Ti 't j'ere calà giù e le montagne a l'avìo tremblà dëdnans a Ti.
  • (4) Da quand ch'a l'é nà 'l mond gnun a l'avìa mai sentù o vëddù n'àutr Dé coma Ti, un Dé ch'a fasa 'd còse parèj për coj ch'a l'han fiusa an Chiel.
  • (5) Ti 't das ël bin ëvnù a coj ch'a l'han piasì a fé lòn ch'a l'é giust e ch'a scoto ij tò comandament. Varda, it j'ere anrabiate quand che noi con costansa i-j trasgredìo. Coma podrìa mai esse salvà 'd gent coma nojàutri? 
  • (6) I soma tùit anfetà e antamnà dal pecà. Fin-a i nòstri mej ësfòrs [1], dëdnans a Ti, a son gnent' àutr che 'd ëstrass [2] anfià 'd grass [3]. Parèj 'd feuje d'otogn, i vnoma sèch e crojoma, e ij nòstri pecà an porto vìa coma 'l vent.
  • (7) Pura gnun a invòca tò Nom, ni at suplica misericòrdia. A l'é për lòn ch' it ses slontanate da nojàutri [4] e 't has bandonane al podèj dij nòstri pecà [5].
  • (8) Contut, Nosgnor, Ti 't ses nòstr Pare. Nojàutri i soma la crèja e Ti 't ses ël vasé. Tùit nojàutri i soma 'l prodòt ëd Tò travaj [6].
  • (9) Sie nen tant anrabià con nojàutri! Guerna pa për sèmper la memòria ëd nòstri pecà. Vardene bin: tùit nojàutri i soma tò pòpol!
  • (10) Toe sità sante a son dventà 'n desert. Sion a l'é dventà na desolassion. A-i son mach ëd ruin-e a Gerusalem.
  • (11) Nòstr templ sant e fiamengh, ch'a l'era nòstr orgheuj e gòj, ël leugh anté nòstri vej at laudavo, a l'han daje feu e tute le ròbe 'd valor ch' a-i ero a son stàite portà via [7].
  • (12) Dëdnans a tut sòn, coma che peudes-to seguité a fé finta 'd gnente [8]? Seguitaras-tu a sté ciuto e a castighene?

Nòte
  • [1] O "nòstre euvre bon-e", "euvre 'd giustissia".
  • [2] O "na vestimenta".
  • [3] O "ëd sangh ëd mëstruassion", ëd spòrch ch'a ven nen vìa.
  • [4] O "It l'has stërmane tòa facia", "l'has virane le spale".
  • [5] "A le conseguense afrose 'd nòstri pecà".
  • [6] O "ëd toe man".
  • [7] O "distruvije".
  • [8] O "coma che peudes-to ancora arfudete 'd giutene?".


À à È è É é Ì ì Ò ò Ó ó Ù ù Ë ë
Comments