A - Testament Vej‎ > ‎Isaia‎ > ‎

Isaia 61

Isaia 61

Ël Signor a farà ardiventé giovo Sò pòpol

61:1 Lë Spirit dël sovran Signor a l'é 'n sù mi, përché Nosgnor a l'ha sernume [1]. A l'ha dame la comission ëd fé coragi [2] ai pòver, ëd giuté coj ch'a l'han ël cheur crasà, ëd proclamé la liberassion dij përzoné e ch'a vëdran torna la lus coj ch'a son an caden-e; 61:2 ëd proclamé l'ann ëd grassia 'd Nosgnor, ël di che nòstr Dé a farà giustissia, e 'd consolé tùit coj ch'a son sagrinà [3]. 61:3 A tuti coj ch'a porto 'l deul për Sion Chiel a-j darà na coron-a [4] an leu 'd sënner, ël përfum dla festa [5] an leu dla pior dël deul, ëd ròbe 'd trionf [6] an leu dël dëscorament. An la giustissia ch'a 'rseivran, lor a saran coma le gran' rol ch' ël Signor a l'ha piantà pr' arvelé Sò splendor. 61:4 Lor a 'rcostruvran le ruin-e antiche e restaureran le sità devastà, abandonà ant la desolassion tant temp fà. 61:5 Dij foresté a soagneran vòstri strop, dij foresté a travajeran vòstri camp e vòstre vigne. 61:6 I sareve ciamà: "Ij sacerdòt dël Signor, ij minister ëd nòstr Dé". I godreve le richesse dle nassion e iv gloriereve 'd tùit ij bin ch'i arseivreve da lor. 61:6 An leugh ëd vërgògna i arseivreve na dobia porsion. An leugh ëd umiliassion as arlegraran ëd la tèra ch'a 'rseivran. Ëh, lor a arseivran na dobia porsion an soa tèra e a saran sodisfàit për sèmper. 61:8 Përchè mi, ël Signor, i dai 'n gran' valor a la giustissia e i l'hai 'n ghignon l'ingiustissia e la rapin-a. I arcompenserai mè pòpol perch 'i son fedel. I farai con lor un pat ch'a dura për sèmper. 61:9 Ij sò dissendent a saran famos an tra le nassion, ij sò fieuj an tra ij pòpoj. Tuti coj ch' a-j vëdran a arconosseran che 'l Signor a l'ha benedije. 

61:10 I sarai pien ëd goj për Nosgnor, mè Dé, përché Chiel a l'ha 'rvestime con la vestimenta dla salvëssa e festonà con ël mantel dla giustissia. I smijo a në spos con soa vestimenta 'd nòsse [7], i smijo a na sposa ch'a porta sòa giòia. 61:11 Nosgnor Dé a mostrerà soa giustissia a le nassion dël mond. Tuti a lo laudran! Soa giustissia a sarà coma 'n giardin ant ël temp dle flor con ëd piante ch'a chërso daspërtut!


Nòte
  • [1] O "unsion" > "onzù", ch'a sta a l'origin dël tèrmin "Messia" e "Crist".
  • [2] O "porté la bon-a neuva".
  • [3] O "ch'a l'han ël magon".
  • [4] O "un diadema".
  • [5] O "l'euli dla gòj".
  • [6] O "làude".
  • [7] O "quand ch'a porta un turban coma 'n sacerdot".

À à È è É é Ì ì Ò ò Ó ó Ù ù Ë ë
Comments