A - Testament Vej‎ > ‎Isaia‎ > ‎

Isaia 40

Isaia

40

Nosgnor a consòla sò pòpol

1“Consolé, consolé mè pòpol” a dis vòst[1] Dé. 2“Parlé al cheur ëd Gerusalem e nunsieje che ij sò dì ëd servitù a son rivà a la fin, ch’a l’é staje përdonà soe colpe, ch’a l’ha arseivù da Nosgnor na retribussion dobia për tùit ij sò pëccà”. 3Scoté! A l’é quaidun ch’a crija: “Pronté ant ël desert la vìa che ‘l Signor a l’ha da passeje, ant la vàuda spianeje na stra a nòst Dé[2]4Aussé ‘l livel dj’avalament, sbassé ij mont e le colin-e; che ij terèn rudi a dvento na spianada, che ij vir dle stra a sio drissà. 5Antlora a sarà arvelà la glòria ‘d Nosgnor, e tuti ansema a vëdran che Nosgnor medésim a l’ha parlà”.

6Na vos a dis: “Fà na crìa!“. E n’àutra a rëspond: “Che crija hai-ne da fé?” . “Proclama che tuti a son mé d’èrba. Soa blëssa[3] ‘d lor a svaniss tòst tanme le flor ant ij camp. 7L’erba a sëcca e la fior a anfiapiss sota ‘l bof ëd Nosgnor. Pròpi parèj a l’é con la gent!” 8L’erba a sëcca e la fior a ‘nfiapiss, vera, ma la paròla ‘d nòstr Dé a dura për sèmper”.

9Monta an s’ na montagna bin àuta, ti ch’it pòrte ‘d bon-e neuve a Sion; àussa bin fòrta toa vos, ti ch’it pòrte ‘d bon-e neuve a Gerusalem. Crija, gnun-e tëmme! Dije a le sità ‘d Giuda: “Tò Dé a l’é ‘n camin ch’a riva!” . 10Nosgnor a riva con potensa, con la fòrsa ‘d sò brass chiel a dòmina sovran dzura tute le còse. A lo compagna ‘l frut ëd soa vitòria; a-j van danans ij sò trofé. 11Tanme ‘n bërgé chiel a pastura sò strop: A pija 'n brass j'agnej, a-j pòrta strèit al pét, a compagna con soen le feje ch'a dan ël làit..

Ël Creator, sovran dël mond

12Chi é-lo ch’a l’ha mai pijà le mzure dj’aque dë sto mond con la man? Chi é-lo ch’a l’é stàit bon a mzuré ‘l cél a branche? Chi d’àutri ch’a sapia col ch’a l’é ‘l pèis dla téra o ch’a l’abia peisà le montagne e le colin-e an sna balansa? 13Chi podrìa-lo consijé, lë Spirit ëd Nosgnor? Chi podrìa-lo deje ‘d sugeriment o mostreje a fé quaicòsa? 14Da chi podrìa-lo arsèive n’avis për savèj se magara a l’avèissa sbalià? Chi é-lo ch’a podrìa mostreje la sapiensa? Chi podrìa deje ‘d conossènsa? Chi é-lo ch’a-j farà vëdde ‘l sentè dla inteligensa?

15Gnun, përchè për chiel le nassion a son tanme na stissa d’eva ant un sigilin, a valo tanme ‘d granin ëd póer an sna balansa. Chiel a cheuj la tèra antrega coma s’a fussa ‘n granin ëd sabia. Vera, le isole a son tanme ‘d póer ch’a vola. 16Tut ël bòsch dle foreste dël Liban e tute le bestie dël Liban a sarìo nen pro për fé n’olocàust ch’a fussa degn ëd nòst Dé. 17Dëdnans a chiel tute le nassion ansema a valo pròpi gnente. Ai sò euj a conto men-o che gnente - ròbe veuide e gòle ‘d savon.

18A còsa podrìe comparisioné Nosgnor? Che sòrt d’imàgin podrìa-la rapresentelo? 19Podrìe fòrse comparisionelo a n’idol fondù, patinà d’òr e decorà con cadnin-e d’argent? 20Opura, se quaidun a l’é tròp póver për fesse fé ‘d ròba parèj, col-lì as podrìa almanch fesse fé na mistà ‘d bòsch ch’as guasta nen e cha staga bin an pé, scorpìa da ‘n brav artista.

21L’eve fòrse mai sentìlo? Capisse fòrse nen? Sevene fòrse ciòrgn a le paròle ‘d Nosgnor - le paròle che chiel a l’ha përnunsià anans che ‘l mond a fussa creà? Sevene fòrse ignorant an sla manera che chiela sustniss la tèra? 22Nosgnor a l’é astà dzura la vòlta dla tèra. Per chiel la gent là an bas a smijo a ‘d formije. A l’é chiel ch’a l’ha dëstèis ël cél coma na tèila fin-a e a n’é fasse na tenda për abitassion.

23A l’é chiel ch’a giùdica ij pòpoj potent dël mond e a-j fà dventé na ròba bin da pòch: 24A son pen-a piantà, pen-a sëmnà, pen-a a buto giù soe rèis, ch'a riva 'l vent, a-j fà arsëcchì e a-j pòrta via tanme 'd fil ëd paja.

25Ël Dé sant a dis: “A chi podrìe mai comparisioneme? Chi ch’a podrìa mai esse coma ch’i son mi?“. 26Vardé mach sù an cél. Chi é-lo ch’a l’ha creà tute le stèile? Chiel a-j fà seurte tanme n’armada, un-a apress ëd l’àutra, e a-j ciama tute për nòm. Për motiv ëd soa gran potensa e fòrsa sensa paragon, gnanca un-a ‘d lor a manca a sò apel.

27Pòpol ëd Giacòb, përchè parles-to parej? Përchè dises-to gent d'Israel che 'l Signor a ved nen lòn ch'av càpita, ch' ël Signor as anteressa pa 'd vòstra càusa? 28Seve lo nen? Eve nen mai sentilo? Nosgnor a l’é Dé për sèmper. A l’é chiel ch’a l’ha creà la tèra da ‘n càp a l’àutr. Chiel a së straca pa nen, chiel a faliss mai. Soa intelingensa as la peul nen sondé. 29A l’é chiel ch’a dà fòrse neuve a jë strach, ch’a ‘nrobustiss coj ch’a son fiach. 30Ij giovo a së straco e a dvento fiach; ij mej guerié as antrapo e a casco për tèra. 31Coj ch'a l'han fiusa an Nosgnor, nopà, a 'rtrovo le fòrse, as alvan sù coma s' a l'avèisso d'ale d'aghia, a marcio sensa vnì strach e a coro sensa perde le fòrse.

Nòte

  1. A chi ch’a l’é adressà costa paròla a l’é nen ciàir. A podria esse ‘l pòpol ëd Nosgnor, opura ij mëssagé ch’a son nen identificà.
  2. Ch’a l’ha castigaje doe vire.
  3. O "tute soe promësse".
Comments