A - Testament Vej‎ > ‎Giob‎ > ‎

Giòb 38

VI. Ij discors ëd Dé

Ël prim discors ëd Dé

Capìtol 38

38:1 Antlora 'l Signor a l'ha antërpelà Giòb da 'n mes dla tempesta e a l'ha dit: 38:2 "Chi ch'a l'é col-lì ch'as përmet ëd trové da dì 'd mie decision con paròle da gnorant? 38:3 Ch'a ven-a anans coma n'òm, përchè i l'hai 'd ròbe da ciameje e i veuj na rispòsta!"

Le maravije dl'univers

38:4 Andova ch'it j'ere ti quand che mi i pogiava le fondassion dla tèra? Famlo savèj, ti ch'it pretende 'd savèj tut! 38:5 Chi é-lo ch'a l'ha determinà soe dimension e ch'a l'ha tirà na còrda për mzurela? 38:6 Còs é-lo ch'a ten sù soe fondassion e chi é-lo ch'a l'ha pogià ij sò canton ëd pera 38:7 mentre che le stèile matinere a cantavo an còr e ij fieuj 'd Dé a crijavo 'd gòj? 38:8 Chi é-lo ch'a tenìa 'l mar ant ij sò confin quand ch'a sortìa coma na masnà dal vènter ëd soa mare 38:9 mentre mi i lo vestìa con ëd nivole e lo fassavo con ëd top ëspess? 38:10 I son stàit mi a sarelo tra 'd pòrte 'd fer e a buteje 'd limit. 38:11 I l'hai dije: "Ti 't peudes andé mach fin-a a sto pont sì e nen pì an là. Ambelessì toe onde poderose a deuvo fërmesse".

38:12 L'has-to mai comandà a la matin ëd seurte fòra e a l'alba ch'a vnèissa sù ant l'orient? 38:13 Has-to mai stendù la lus dël dì fin-a a la fin dla tèra e sopatane la coerta për gavene le bòje [1]? 38:14 Coma la lus as avzin-a, la tèra a ciapa soa fòrma tanme 'd creja pressà sota 'n cacèt; a l'é vestìa 'd color splendrient. 38:15 Coj ch'a son gram la lus a j'ambarassa e a fërma 'l brass ch'a l'era ausasse për patlé violent. 

38:16 Has-to mai esplorà le sorgiss dël mar o marcià ant le galerie ancreuse ch'a-i son al fond dla tèra? 38:17 Sas-to andova ch'a son le Pòrte dla mòrt o l'intrada dël pais dël top? 38:18 Has-to mai considerà vàire ch'a l'é l'amplëssa dla tèra? Dimlo s'it lo sas!

38:19 Da 'ndova ch'a ven la lus? Andova ch'as artira lë scur? 38:20 Peudes-to porteje ciaschëdun a soa ca? Sas-to coma riveje? 38:21 Ëd sicur tut sòn ti 't lo sas, përchè ti 't ses nassù prima che tut a fussa creà, e ti 't l'has tanta 'd cola esperiensa! Nen vera?

38:22 Ses--to intrà ant ij depòsit ëd la fiòca o vëddù ij magasin ëd la tempesta? 38:23 (Ij gran ëd la tempesta mi i-j guerno pr' ël temp dël castigh, pr' ij dì dle bataje e dla guèra). 38:24 Andova ch'a l'é 'l senté ch' a men-a a la sorgiss ëd la lus? Andova ch'a l'é la ca dël vent ëd levant? 38:25 Chi é-lo ch'a l'a creà 'l canal dij torent ëd la pieuva? Chi é-lo ch'a l'ha tracià 'l senté dla lòsna? 38:26 Chi é-lo ch'a fà pieuve ant ël desert, ant na tèra sëcca dov' a-i stà gnun? 38:27 Chi é-lo ch'a manda la pieuva për sodisfé 'l teren chërpà e fèje chërse d'erba ténera? 38:28 E chi é-lo 'l pare dla pieuva, o col ch'a génera la galaverna? 38:29 Cola ch'a l'é la mare dla giassa? Chi é-la ch'a fà nasse la brin-a dal cél? 38:30 Përché l'eva as cambia an giassa pì dura che la pera, e la superfice dl'eva a géila.

38:31 Peudes-to guidé 'l moviment dle stèile, o grupé ansema le Pléiadi, o dësblé le còrde d'Orion? 38:32 Peudes-to guidé la sequensa dle stagion o deje na diression al Gran Cher con le soe roe [2]. 38:33 Peudes-to regolé le lej dl'univers? Peudes-to dovreje për regolé la tèra? 38:34 Peudes-to deje na vos a le nivole parèj ch'a faso tombé la pieuva? 38:35 Peudes-to fé paruté lòa lòsna e fèjla campé giù pròpi andoa ch'it veule ti? 

38:36 Chi é-lo ch'a dà d'intuission [3] al cheur o ch'a dëspensa d'anteligensa a la ment? 38:37 Chi podrìa-lo mai conté 'l nùmer ëd le nivole? Chi é-lo che podrìa fé dëbordé ij vas dl'eva dël cél? 38:38 për fela tombé am sël terèn sëch e dur tanme 'd mon cheuit?

Le maravije dël mond dle bestie

38:39 Podries-to provëdde a la lionëssa soe pijàite, o sodisfé l'aptit dij lion giovo 38:40 quand ch'a son cogià ant soe tanere o ch'a speto cocià ant ij leugh andoa ch'a së stërmo? 38:41 Chi é-lo ch'a provëd da mangé ai cornajass quand ij sò polastrin a crijo a Dé ch'a l'han fam e as na van an gir a l'arserca 'd quejcosa da mangé? 


Nòte
  • [1] O "Ij malign", "ij gram", "për porté a la fin la gramìssia dla neuit".
  • [2] O "L'orsa con ij sò orsòt".
  • [3] O "ch'a dà sapiensa".


À à È è É é Ì ì Ò ò Ó ó Ù ù Ë ë
Comments