A - Testament Vej‎ > ‎Geremia‎ > ‎

Geremìa 1

Geremia

Antestassion

1:1 Paròle ch'a l'ha profetisà Geremìa, fieul ëd Chilchìa, un dij sacerdòt ch'a stan an Anatot ant ël teritòri dla tribù 'd Beniamin. 1:2 La paròla 'd Nosgnor a l'é stàita adrëssà a chiel, ant ij dì 'd Iosìa, fieul d'Amon rè 'd Giuda, ant l'an ch'a fa tredes ëd sò regn; 1:3 peuj ant ij dì 'd Gioachin, fieul ëd Iosìa, rè 'd Giuda, fin-a a la fin ëd l'ann ch'a fa óndes ëd Sedecia, fieul ëd Iosìa, rè 'd Giuda, fin-a a la deportassion ëd Gerusalem ant ël quint mèis.

La vocassion e 'l mandà 'd Geremìa

1:4 La paròla che Nosgnor a l'ha adressame a dis: 1:5 "Anans ëd formete ant le ventraje 'd toa mare, mi i l'hai sernute1; e fin-a anans che ti it fussa partorì, mi i l'hai consacrate; i l'hai stabilite profeta amvers le nassion". 1:6 E i l'hai dit: "Ah, Nosgnor! Dabon mi i sai pa parlé, përchè i son trop giovo"2. 1:7 Ma Nosgnor a l'ha rëspondù: "Dis nen 'Mi i son parèj ëd na masnà' përchè ti 't andras da tuti coj che mi it manderai, e tut lòn che mi it comanderai ti 't lo diras. 1:8 Gnune tëmme dëdnans ëd lor përchè mi i it darai mia protession", oracòl ëd Nosgnor. 1:9 Antlora Nosgnor a l'ha dëstendù la man e tocame la boca; e a l'ha dime: "Varda, i l'hai butà mie paròle an toa boca. 1:10 Pròpi ancheuj i l'hai stabilite an sle nassion e an sij regn për ranché e svërsé, për dësreisé e demolì, për costrùe e pianté".

Ëd vision ch'a confermo la vocassion e 'l mandà 'd Geremìa

1:11 La paròla 'd Nosgnor a l'é stàita adrëssà a mi an costa manera: "Lòn ch'it vëddes-to ti, Geremìa?". I l'hai rëspondù: "I vëddo un vengh d'amàndola". 1:12 Antlora Nosgnor a l'ha dit: "Ti 't l'has vëddù bin, përché mi vijo përchè mia paròla a sia compiìa". 1:13 Na sconda vira, la paròla 'd Nosgnor a l'é stàita adëssà a mi con costi termo: "Lòn ch'it vëddes-to?". I l'hai rësponduje: "Mi i vëddo na pèila che a branda: e ch'à l'è piegà da Tramontan-a vers Mesdì". 1:14 Antlora Nosgnor a l'ha dime: ""A l'é da nord ch'a va a svërsesse 'l maleur dzora 'd tutele gent dël pais. 1:15 Përchè varda, mi i vado a ciamé tute le famije dij ream ëd Tramontan-a". Oracol ëd Nosgnor. "Lor a vnirane mincaun a ciaprà sò tròno a l'intrada dle pòrte 'd Gerusalem, contra dij sò rampar, tut d'antorn, e contra tute le sità 'd Giuda. 1:16 I pronunsierai contra 'd lor ij mè giudissi për tute soe gramissie, përchè a l'han chitame, a l'han ancensà d'àutri dé, a son prostërnasse dë 'dnans ëd l'euvra 'd soe man. 1:17 Për lòn ch'at rësguarda, ti 't butras la s-cirpa a la vita, it alveras, it i-j diras tut lòn ch' it comanderai mi. Gnun-e tëmme dë 'dnans a lor, dësnò mi it darai na bon-a rason për tramblé an facia 'd lor. 1:18 Varda che mi, già d'ancheuj, i l'hai stabilite coma na sità fortificà, colòne 'd fer e rampar ëd bronz dë 'dnans a tut ël pais. 1:19 Lor at combatran, ma a podran gnente contra 'd ti, përché mi it sarai ansema", Oràcol ëd Nosgnor, "për liberete".

Nòte

1 O "i l'hai conossute".

2 O “i son parèj ëd na masnà!”.


À à È è É é Ì ì Ò ò Ó ó Ù ù Ë ë
Comments