A - Testament Vej‎ > ‎Genesi‎ > ‎

Genesi 7

7

7:1 Na vòlta che tut a l'é stàit pront, Nosgnor a l'ha dit a Noè: "Intra ant l'arca, ti con tuta toa famija, përchè an costa generassion i l'hai trovà che d'òm giust a l'é mach pì restajne un: ti1. 7:2 Porta con ti set cobie - mas-cc e fumela - ëd minca animal che mi i ten-o d'esse pur2 e na cobia 'd minca dj'àutri. 7:3 Pija 'dcò set cobie 'd ògni sòrt ëd j'osej. A-i deuv esse un mas-cc e na fumela an minca pàira, parèj ch'as na conserva la specie an sla tèra. 7:4 Da sì a set dì i farai pieuve durant quaranta dì e quaranta neuit, fin-a a tant ch'i l'avrai fàit dësparì da la tèra tute le creature vive ch'i l'hai fàit.

7:5 A l'é parèj che Noè a l'ha compì tut lòn che Nosgnor a l'avìa daje da fé. 7:6 Noè a l’avìa ses-sent agn quand che 'l diluvi a l'avìa inondà la tèra. 7:7 Antlora Noè a l'é intrà ant l'arca, chiel e ij sò fieuj, soa fumna e soe nòre, për guernesse da j'aque dël diluvi. 7:8 Con lor a j'ero 'dcò le bestie che Nosgnor a-j considera pur e coj ch'a lo son nen, ansema a tùjt j'osej e ij bestjin ch'a coro për la tera. 7:9 A son intrà 'nt l'arca a cobie, mas-cc e fumela, tal coma Nosgnor a l'avìa ordinà a Noè.

7:10 Dòp ses dì, a son vnùe j'aque dël diluvi e a l'han inondà la tèra. 7:11 Noè a l'avìa ses-sent agn quand che j'aque ch'a j'ero sota la tèra a son sortìje fòra e a son dovertasse le ciuse dël cel ch'a l'han ëdcò campà giù 'd torent d'aqua. A l'era 'l dì dissèt dël second mèis. 7:12 La pieuva a l'é seguità a tombé për quaranta dì e quaranta neuit. 7:13 An col medésim dì Noè a l'era intrà ant l'arca, chiel e ij sò fieuj Sem, Cam e Jàfet, soa fomna e le tre nòre. 7:14 Con lor ant l'arca a-i ero 'd cobie d'ògni sòrt ëd bestie - domestie e servaje, cite e grande - ansema a dj'osej d'ògni sòrt. 7:15 Antlora, donca, a son vnù da Noè e a son intrà 'nt l'arca na cobia 'd tùit j'animaj ch'a vivo e fiatisso, 7:16 un mas-cc e na fumela 'd minca specie, tal coma Nosgnor a l'avìa ordinà a Noè. Peuj Nosgnor a l'ha sarà la pòrta daré 'd lor.

7:17 Ël diluvi a l'é seguità a tombé an sla tèra durant quaranta dì. L'aqua a l'era sèmper pì àuta, tant che l'arca l'era aussasse bin ansim' a la tèra e a la portava. 7:18 J'aque a vnisìo sèmper pì àute an sla tèra e l'arca a na stasìa a gala. 7:19 A la fin j'aque a l'han quatà fin-a le montagne pì àute dla tèra 7:20 e a son rivà a squasi a set méter dzora le sime pì àute. 7:21 A l'han fàit meuire nià tute le creature ch'as meuvo dzora la tèra: osej, animaj domesti e servaj, tùit j'animaj ch'a rabasto për tèra, ansema a tuta la gent ch'a-i era. 7:22 Tuti coj ch'a fiativo e vivìo an sla tèra frema a son mòrt.

7:23 Nosgnor a l'ha fàit dësparì tute le creature dla tèra, da j'òm fin-a a le bestie, da cole ch'a rabasto për tèra fin-a a tùit j'osej: tuti a son dësparù da la tèra. A son survivù mach Noè e coj ch'a l'ero con chiel andrinta a l'arca. 7:24 Le aque dël diluvi a l'han quatà la tèra për sent e sinquanta dì.

Nòte

1 O "It ses restaje mach ti".

2 D'animaj che Nosgnor a l'ha dit ch'i podoma mangene e fene 'd sacrifissi.


À à È è É é Ì ì Ò ò Ó ó Ù ù Ë ë
Comments