A - Testament Vej‎ > ‎Genesi‎ > ‎

Genesi 14

 14

La benedission ëd la vitòria pr' ël pòpol ëd Dé

14:1 An col temp-là ij pòpoj 'd cola region a l'han comensà a fesse guèra. Ël rè Amrafel ëd Babilonia, ël rè Arioch ëd Ellasar, Chedorlaomer rè 'd Elam, e Tidal re 'd Gòlim, 14:2 a l'han combatù contra 'l rè Bera 'd Sòdoma, ël rè Birsha 'd Gomorra, Shina rè d'Adma, rè Shemeber rè 'd Zebojim e 'l rè 'd Bela (ciamà 'dcò Zoar). 14:3 Cost scond grup ëd rè a l'ha gionzù soe fòrse ant la val ëd Siddim (visadì 'l Mar Salà). 14:4 A l'ero stàit an sogession a Chedorlaomer për dodes agn, ma ant l'ann ch'a fà tërdes a son arvoltasse contra chiel. 14:5 N'ann pì tard, Chedorlaomer e ij sò aleà a son rivà e a l'han batù ij Refaita at Ashteroth-karnaim, ij Zuzita a Ham, j'Emita a Shaveh-kiriathaim, 14:6 e j'Horita a Mont ëd Seir, fin-a a El-paran a la seuja dël desert. 14:7 Peuj a son tornà 'ndré e rivà a En-mishpat (ciamà 'ncheuj Kadesh) e a l'han conquistà tut ël teritori dj'Amalekita, e fin-a j'Amorita ch'a vivo an Hazazon-tamar. 14:8 Peuj ij rè ch'a l'ero arvoltasse, visadì ël rè 'd Sòdoma, Gomora, Admah, Zeboiim, e Bela (ciamà 'dcò Zoar) a son preparasse për la bataja ant la val dël Mar Mòrt. 14:9 A l'han combatù contra 'l rè Chedorlaomer ëd Elam, ël rè Tidal ëd Gojim, ël rè Amrafel ëd Babilonia, e 'l rè Arioch ëd Ellasar— quatr rè contra sinch. 14:10 Ora la val dël Mar Mòrt a l'era pien-a 'd tampe 'd biom. Antant che l'armea dij rè 'd Sòdoma e Gomora a batìa l'artreta, vàire 'd lor a son tombà ant le tampe 'd biom, mentre lòn ch'a-i restava a son scapà an sle montagne. 14:10 J'invasor vitorios peuj a l'han butà a sach Sòdoma, Gomorra e, a la fin, a son tornass-ne a cà, an portand vìa con lor tute le spoje 'd guèra e le proviande dla ròba da mangé.

14:12 A l'han ëdcò ciapà Lòt - ël novod ëd Abram ch'a vivìa a Sòdoma, portandse apress tut lòn che chiel a l'avìa. 14:13 Tutun, un ëd la gent ëd Lòt a l'ha riessù a scapé e a l'ha contà a Abram, l'ebreo, lòn ch'a l'era rivaje. Abram a vivìa dacant al bòsch ëd ro ch'a l'era 'd Mamré, l'Amorìta. Mamré e ij sò parent, Eshcol e Aner, a l'ero d'alià d'Abram.

14:14 Quand che Abram a l'ha savù che 'l novod Lòt a l'era stàit ciapà përzoné, a l'ha mobilità tërzent e disdeut òm dressà ch'a l'ero nà ant soa famija. Peuj a l'ha staje dapress a l'armada 'd Chedorlaomer fin-a a Dan. 14:15 Ambelelà a l'ha dividù le fòrse d'arme ch'a l'avìa e a l'ha atacà antant ch'a l'era neuit. L'armada 'd Chedarlaomer a l'é scapà, ma Abram a l'ha daje dapress fin-a a Hoba, a nòrd ëd Damasco. 14:16 Abram a l'é riussì a 'rcuperé tùit ij beni ch'a l'ero stàit robà e a l'ha portà 'ndré sò novod Lòt con lòn chr chiel a l'avìa, tute le fomne e j'àutri përzoné.

14:17 Apress d’esse 'rtornà da soa vitòria su Chedorlaomer e s' ij sò aleà, ël rè 'd Sòdoma a l'é 'ndaje 'ncontra ant la val ëd Shavé (visadì la Val dël rè). 14:18 E Melchisedech, rè 'd Salem e sacerdòt dël Dé pì-àut, a l'é sortì an portand pan e vin. 14:19 Melchisedech a l'ha benedì Abram con së paròle: "Che Dé l' pì-àut, Creator dël cel e dla tèra, a benedìssa Abram, 14:20 e sia benedet Dé 'l pì àut ch'a l'ha batù për ti ij tò nemis"; Antlora Abram a l'ha daje un décim ëd tùit ij bin ch'a l'avìa 'rcuperà.

14:21 Ël rè 'd Sòdoma a l'ha dit a Abram: "Dame andré mia gent ch'a l'era stàita ciapà përzoné, ma ten për ti tùit ij bin ch'it l'has arcuperà". 14:22 Abram a l'ha replicà al rè 'd Sòdoma: "I faso 'n giurament sacrà dë 'dnans al Signor, ël Dé pì-àut, Creator dël cel e dla tèra, 14:23 che mi i ciaprà gnanca 'n fil o na liassa 'd sàndola 'd lòn ch'a l'é tò. Sedësnò ti 't podries dì d'esse stàit ti a fé vnì sgnor Abram. 14:24 I acetrà mach lòn che ij mè giovo guerié a l'han già mangià. Pì 'd lòn, it faso l'arcesta che ij mé alià: Aner, Eshcol, e Mamre, a arsèivo lòn ch'a l'é giust".


À à È è É é Ì ì Ò ò Ó ó Ù ù Ë ë
Comments