A - Testament Vej‎ > ‎Genesi‎ > ‎

Genesi 1

Génesi

1

La creassion dël mond

1:1 Ant ël prinsìpi dla creassion, quand che Nosgnor1 a l'ha fàit i cej e la tèra, 1:2 la tèra a l'era sensa forma e veuida e a-i era 'd top an sla superfice dl'abiss, ma lë Spìrit ëd Dé as meuvìa2 an sla superfice dle aque. 1:3 Nosgnor a l'ha dit: "Ch'a sìa la lus" e a l'é fasse lus. 1:4 Nosgnor a l'ha vëddù che la lus a l'era bon-a. A l'é parèj che Nosgnor a l'ha separà la lus dal top. 1:5 Nosgnor a l'ha ciamà la lus "dì" e 'l top "neuit". Antlor' a l'é stàita na sèira e a l'é stàita na matin. Sto-sì a l'era 'l prim dì.

1:6 Nosgnor a l'ha dit: "Ch'a sia na vòlta3 ant ël mes dle aque e ch'a separa le aque da le aque". 1:7 Antlora Nosgnor a l'ha fàit la vòlta e a l'ha separà le aque sòta la vòlta da le aque dzura la vòlta, e a s'é fasse parèj. 1:8 Nosgnor a l'ha ciamà la vòlta "cel". Antlor' a l'é stàita na sèira e a l'é stàita na matin. Sto-sì a l'era 'l scond dì.

1:9 Nosgnor a l'ha dit: "Che le aque sota 'l cel as buto ansema ant un sol pòst e ch'a comparissa ël teren sùit. E a s'é fasse parèj. 1:10 Nosgnor a l'ha ciamà 'l teren sùit: "Tèra" e le acque ch'a l'ero butasse 'nsema: ij "mar". De a l'ha vëddù che tut sòn a l'era bon.

1:11 Nosgnor a l'ha dit: "Ch'a la tèra a prodùa 'd vegetassion, ëd piante ch'a porto 'd smens conforma le sò specie, e dj'erbo ch'a porto an lor dla smens conforma le sò specie. E a s'é fasse parèj. 1:12 La tèra a l'ha prodùit ëd vegetassion - ëd piante ch'a portavo 'd smens conforma le sò specie, e dj'erbo ch'a portavo an lor dla smens conforma le sò specie. De a l'ha vëddù che tut sòn a l'era bon. 1:13 A l'é stàita na sèira e a l'é stàita na matin. Sto-sì a l'era 'l ters dì.

1:14 Nosgnor a l'ha dit: "Ch'a-i sio dle lus ant la vòlta dël cel për separé 'l dì da la neuit, e ch' a sio 'd segn për indiché djë stagion, dij dì e dj'agn, 1:15 e ch'a servo da lus ant la vòlta dël cel për anluminé la tèra". E a s'é fasse parèj. 1:16 Nosgnor a l'ha fàit doi gran' lus - la lus pì granda për governé 'l dì e na lus pì cita për governé la neuit. A l'ha fàit ëdcò le stèile. 1:17 Nosgnor a l'ha butà le lus ant la vòlta dël cel për bërlusé an sla tèra, 1:18 për governé 'l dì e la neuit e për separé la lus dal top. Nosgnor a l'ha vëddù che tut sòn a l'era bon. 1:19 A l'é stàita na sèira e a l'é stàita na matin. Sto-sì a l'era 'l dì ch'a fà quatr.

1:20 Nosgnor a l'ha dit: "Che le aque a formiolo d'un formiolament ëd creature vive e che dj'osej a volo an sla tèra vers la vòlta dël cel". 1:21 Nosgnor a l'ha creà ij pèss grand e tute le bestie vive ch'as meuvo e ch'a formiolo ant le aque, conforma le sò specie. A l'ha creà 'dcò minca osel ch'a l'ha dj'ale, conforma le sò specie. De a l'ha vëddù che tut sòn a l'era bon. 1:22 Nosgnor a l'ha benedije e a l'ha dit: "Sie fosonant. multipliché e ampinì le aque dij mar, e che j'osej as multiplico an sla tèra". 1:23 A l'é stàita na sèira e a l'é stàita na matin. Sto-sì a l'era 'l dì ch'a fà sinch.

1:24 Nosgnor a l'ha dit: "Che la tèra a prodùa creature vive conforma le sò specie: ëd bestiam, dij serpent4 e 'd bestie sarvaje, conforma le sò specie, e a s'é fasse parèj. 1:25 Nosgnor a l'ha fàit le bestie sarvaje conforma le sò specie, ëd bestiam conforma le sò specie, e tute le creature ch'a strusio an sla tèra conforma le sò specie. Nosgnor a l'ha vëddù che tut sòn a l'era bon. 1:26 Antlora Nosgnor a l'ha dit: "Fasoma l'òm a nòstra imàgine, conforma nòstra smijansa, parèj ch'a peussa dominé ij pess dël mar, j'osej dl'aria, ël bestiam e tuta la tèra, e tute le creature ch'as meuvo5 an sla tèra. 1:27 Nosgnor a l'ha creà l'òm6 a Soa imàgine, a l'ha crealo a l'imàgine 'd De, a l'ha crealo mas-cc e fumela. 1:28 Nosgnor a l'ha benedije e a l'ha dije: "Sie fosonant7, multipliché, ampinì la tèra e sogetela! Dominé ij pess dël mar, j'osej dl'aria e minca creatura8 ch'as meuv an sla tèra 1:29 Peuj Nosgnor a l'ha dit: "Adèss iv dago minca pianta ch'a pòrta 'd smens ch'a l'é an sla superfice 'd tuta la tèra e tùit j'erbo ch'a l'han ëd frut ch'a pòrta 'd smens: tut lòn sarà vòstra noritura. 1:30 E a tute le bestie dla tèra, e a minca osel dël cel, e a tute le creature ch'as meuvo an sla tèra - tut lòn ch'a l'ha an sé medésim ël sofi9 dla vita, i-j dago tute le vërdure10 për noritura, e a s'é fasse parèj. 1:31 Nosgnor a l'ha vëddù tut lòn ch'a l'avìa fàit e a l'era pròpi bon! A l'é stàita na sèira e a l'é stàita na matin. Sto-sì a l'era 'l dì ch'a fà ses.


Nòte

1 Conforma la tradission, i voltoma coma "Nosgnor" ël nòm ebraich ch'a l'é dovrà ambelessì (אֱלֹהִים,’elohim), na fòrma plural. Quand ch'as trata del ùnich ver Dé, ël verb a l'é sèmper al singular. La fòrma plural dinota majestà. Cost nòm a buta an evidensa la sovranità 'd Dé e ch'as peul nen comparesse con gnun d'àutri. Chiel a l'é "ëd Dé dij dé".

2 A la létera: "a planava".

3 O "firmament", "cel".

4 O "bestie ch'a strusio", "reptij".

5 O "a strusio".

6 Ant ël sens coletiv, ch'a comprend mas-cc e fumela.

7 O "fecond".

8 O "creatura viva", "bestie".

9 O "ël respir".

10 O "erba verda".

Comments