A - Testament Vej‎ > ‎Esechiel‎ > ‎

Ezechiel 37

37

La val dj'òss sèch

37:1 Un dì Nosgnor a l'ha ambrancame con la forsa 'd Sò Spirit1 e a l'ha fame seurte fòra an mes a na val ch'a l'era tuta coatà d'òss ëd mòrt. 37:2 A l'ha fame marcé an trames a coj òss e i son visame che ant cola val a-i ero pròpe tanti òss e ch'a l'ero motobin sèch. 37:3 Chiel a l'ha dime: "Fieul d'òm, a podrìo-ne coj òss-là arvive?", e i l'hai rësponduje: "Mach Ti 't lo sas, sovran Signor!". 37:4 Antlora a l'ha dime: "Profetisa rësguard2 a costi òss e dijë: "Vojàutri, òss sèch, scoté la paròla ëd Nosgnor. 37:5 Coste-sì a son le paròle che ël sovran Signor a nunsia a sti òss-sì: 'Vardé-sì, i son an camìn ëd anfonde lë spirit an vojàutri, e i vivré torna. 37:6 I butrai an vojàutri dij téndin, i-j farai chërse la carn3, iv arvestirà 'd pel, i-j anfondrà lë spìrit4 e i vivré torna. Antlora i savreve ch'i son Mi ël Signor". 37:7 Parèj i l'hai profetisà conforma lòn ch'a l'avia comandame. Quand ch'i profetisava i l'hai sentù n'armor, e j'òss a son butasse ansema, òss a òss. 37:8 I vardava e i vëddìa che an sj'òss as formavo ëd tèndin e 'dcò a-i chërsìa la carn, e dla pel a l'era 'n camìn ëd coateje da l'àut. Tutun, a l'avìo 'ncora nen lë spirit dla vita5.

37:9 Chiel antlora a l'ha dime: "Profetisa a lë spirit - profetisa, ò fieul d'òm, e disje: 'Costa a l'é la paròla dël sovran Signor: 'Ven daj quatr vent, ò spìrit, e sofia dzora sti mòrt-sì, ëd manera ch'a vivo torna. 37:10 Parèj i l'hai profetisà conform a lòn ch'a l'avia comandame, e lë spirit a l'é intraje 'ndrinta, tant che a l'han arcomensà a vive, a son ausasse 'n pé e a-i ero coma na grand' armada. 37:11 Antlora a l'ha dime: "Fieul d'òm, sti òss-sì a son tut ël pòpol d'Israel. Varda, lor a diso: 'Nòstri òss a son sèch, nòstra speransa a l'è mòrta, i soma stàit bandonà. 37:12 Per lòn, profetisa e dije da mè part: 'Coste-sì a son le paròle dël sovran Signor: 'Vardé-sì, i son an camìn ëd duverté vòstre tombe e iv faraj arsussité da vòstre tombe, ò mè pòpol. Iv faraj artorné a la tèra d'Israel. 37:13 Antlora, o mè pòpol, i savreve ch'i son Mi ël Signor, quand che mi i duvertraj vòste tombe e iv faraj arsussitè da vòstre tombe. 37:14 Mi i butrà mè spirit an vojàutri e i vivreve torna; iv daraj arpòs pròpi an vòstra tèra. Antlora i savreve ch'i son Mi ël Signor. I l'hai parlà e im daraj da fé coma ch'i l'hai dit.

Israel e Giuda: un sol regn

37:15 Nosgnor a l'ha torna parlame e a l'ha dime: 37:16 "Ciapa 'n tòch ëd bòsch e gravane ste paròle-sì: 'A rapresenta Giuda e j'israelita ch'a son giontasse a chiel'. Peuj ciapa n'àutr tòch ëd bòsch e gravane ste paròle-sì: "A rapresenta Efraim e le tribù ch'a stan a nòrd d'Israel". 37:17 Gionta 'nsema coj doi tòch an toa man coma s'a fusso un sol tòch ëd bòsch. 37:18 Quand che toa gent at ciama: "Dane na spiegassion ëd lòn ch'it l'has fàit", 37:18 dije: 'Sossì a l'é lòn che Nosgnor,' ël sovran, a dis: 'I ciaprai Efraim e le tribù dël nòrd e a lo giontrai con Giuda. I-j farai coma s'a fusso 'n sol tòch ëd bòsch an mia man'. 37:20 Antlora ten an àut coj doi tòch ëd bòsch ch'it l'has gravà, parèj che tuti a-j vëddo, 37:21 peuj dije: 'Sossì a l'é lòn ch'a dis Mosgnor, ël sovran: I ciaprai j'israelita d'an tra le nassion anté ch'a son andàit. I-j farai torné a ca an sò pais dai leugh anté ch'a son dësbergiarasse. 37:22 Ambelelà, an sle montagne d'Israel, ëd lor a-j na farai 'n sol pòpol, e a l'avran un sol rè. A formaran pa pì doi pòpoj. A saran pa pì separà an doi regn. 37:23 A saran pì nen anflà d'orìbij mistà pagan-e ch'a fan mach ëscheur, né da soe infedeltà 'd lor. I-j delivrai da sò pecà d'apostasìa e a-j nëttierai. Antlora lor a saran mè pòpol përdabon e Mi i sarai sò Dé 'd lor. 37:24 Mè sërvent David a regnerà dzora 'd lur e tuti a l'avran mach un sol Bërgè. A daran da ment ai mè precet e a-j butran an pràtica. 37:25 A staran ant ël pais ch'i l'hai dàit a mè sërvent Giacòb. ij sò fieuj e ij fiej dij sò fieuj a staran për sèmper anté ch'a vivìo ij sò antich e mè sërvent David a sarà për sèmper sò prinsi 'd lor. 37:26 I farai con lor n'aleansa 'd pas, ch'a sarà sensa fin. I darai a lor soa tèra e a-j farai chërse 'd nùmer. I butrai për sèmper an tra 'd lor mè santuari. 37:27 I vivrai pròpi là 'nsema a lor. I sarai Mi sò Dé e lor a saran mè pòpol. 37:28 Quand che mè santuari a sarà an tra 'd lor për sèmper, tute le nassion a savran che Mi, ël Signor, a l'é Col ch'a l'ha rendù Israel na nassion santa e special.

Nòte

1O "an ëspirit".

2O "dzora".

3O "ij muscoj".

4O "I butrà 'l respir an vojàutri".

5O "a-i era gnun respir".

Comments