Surtìa 17

 17

L'eva a Massa e a Merìba

17:1 L'antrega comunità dj'Israelita a l'ha viagià a tape dal Desert ëd Sin conforma le istrussion dël Signor e a l'han butà 'l camp a Refidim. Ansilà, nopà, ël pòpol a l'avia nen d'eva da bèive. 17:2 Për costa rason a l'han lamentass-ne con Mosè, e a l'han dit: "Dane d'eva da bèive!". Mosè a-j rispond: "Përchè lamenteve-ne con mi? Përché buteve-ne 'l Signor a la preuva?".

17:3 Ël pòpol a l'era ansilà, pressà da la sèj e as na lamentava con Mosè. A disìa: "Përché mai 't l'has fane seurte da l'Egit, parèj che noi, ij nòstr fieuj e 'l nòstr bestiam a meuira ëd sèj?". 17:4 Antlora Mosè a l'é butasse a crijé al Signor e a l'ha dit: "Còs' l'hai-ne da fé con sto pòpol? Ancora 'n po' e sti-sì am masso a prassà!".

17:5 Ël Signor a l'ha dit a Mosè: "Passa dëdnans al pòpol e pija con ti dj'ansian. Pija 'dcò ant la man la cana ch'it l'has dovrà për bate 'l Nil e va! 17:6 Mi 'm butraj dëdnans a ti an sla rochera d'Horeb. Ti 't batrà la rochera con toa cana e n'a seurtirà d'eva e 'l pòpol a na beivrà. Mosè a l'ha fàit parèj dëdnans a j'euj dj'ansian d'Israel.

17:7 Mosè a l'ha peuj ciamà col leugh Massa e Meriba për motiv dle lamente dj'Israelita e përchè a l'avìo butà a la preuva 'l Signor an disand: "Ël Signor é-lo o é-lo nen an mes a noi?".

La vitòria an sj'Amalechita

17:8 A l'é vnuie coj d'Amalech e a l'han atacà Israel a Refidim. 17:9 Anlora Mosè a l'ha dit a Giosuè: "Sern quejdun dij nòstri òm, seurt e combat Amalech. Doman im butëraj ansima la colin-a con la cana 'd De an man.

17:10 Antlora Giosuè a l'é 'ndàit a combate Amalech coma Mosè a l'avìa dije, e Mosè, Aaron e Hur a son andàit ansima la colin-a. 17:11 Quand che Mosè a aussava soe man, Israel a vnisìa pì fòrt, ma quand che Mosè a sbassava soe man1, Amalech a vnisìa pì fòrt.

17:12 Antlora, quand che Mosè a podìa pì nen ten-e le man an àut, a l'han ciapà na pera e a l'han butala sota 'd chiel përchè Mosè as setèissa e Aaron e Hur, un da na part e l'autr da l'autra, a-j sostnìo ij bras. A l'é stàit parèj che le man ëd Mosè a son stàite ferme fin-a al calé dël sol. 17:13 E Giosuè a l'ha 'nientà Amalech e soa armada con la spa.

17:14 Ël Signor a l'ha dit a Mosè: "Scriv ant un liber ëd lòn ch'a l'é capità përché as na conserva la memòria e fortìss a Giosuè che mi i scancelerà la memòria d'Amalech da sota 'l cel. 17:15 Mosè a l'ha peuj butà 'n pé na mongiòja e a l'ha ciamala: "Ël Signor a l'é mè drapò". 17:16) përché 'l Signor a l'avìa dit: "Përché na man a l'era levà anvers ël tròno 'd De, dagià che 'l Signor a sarà 'n guèra contra Amalech da generassion a generassion".

Nòte

1 Let. "a vnisìo grev" përché a l'era strach ëd tenje an àut.

Comments