B - Testament Neuv‎ > ‎Tito‎ > ‎

Tito 2

Capìtol 2

Na condòta ch'a quadra con la san-a dotrin-a

2:1 Ma ti, Tito, mostra na manera 'd vive ch'a quadra con la san-a dotrin-a. 2:2 Mostra a j'òm ch'a son d'età1 a controlesse, a esse degn ëd rispet2 e a vive da savi. A deuvo avèj na fej san-a e esse amorèivol e passient. 2:3 Fà l'istess a le fomne ch'a son d'età: mostraje 'd vive an manera da onoré Dé. A deuvo nen esse 'd malalenghe3 o 'd fomne ch'a-j pias ëd bèive tròp4. Al contrari, a deuvo mostré a j'àutri a fé 'l bin. 2:4 A l'é parèj che le fomne d'età a deuvo dressé cole ch'a son giovo a volèje bin ai sò marì e a soe masnà, 2:5 a vive 'n manera savia, a esse pure, pijesse soagn dla cà, fé 'l bin, e sté an somission ai sò marì. A l'é parèj ch'a porteran nen dëscrédit a la Paròla 'd Dé. 2:6 Fà l'istess a j'òm pì giovo: ciss-je a esse giudissios.

2:7 Ti medèsim it deuve essje d'esempi fasend d'ògni sòrt ëd bon-e euvre. Che tut lòn ch'it fas a rifleta l'integrità e la serietà 'd lòn ch'it mostre5. 2:8 Mostra la vrità parèj ch'a trovo nen da dì 'd toa dotrin-a. Antlora coj ch'an fan oposission a n'àbio vërgògna e a peusso dì gnente 'd mal ëd nojàutri.

2:9 Ij servitor a deuvo sèmper obedì ai sò padron e fé 'l mej ch'a peudo për contenteje e nen dëscontrarieje6. 2:10 Ch'a robo gnente, ma ch'a sio dël tut degn ëd fiusa e disponìbil7. A sarà antlora che dabon a faran onor a la dotrin-a 'd Dé, nòst Salvator.

2:11 Përché la grassia 'd Dé a l'é stàita 'rvelà për porté la salvëssa a d'ògni sòrt ëd gent. 2:12 La grassia an dressa a 'rnunsié a cola vita ch'a ten- an gnun cont Nosgnor e a le passion mondan-e, perch'i vivo an ësto mond gram con sapiensa, giustissia e devossion anvers a Nosgnor” 2:13 antramentre ch'i spetoma con speransa col dì maravijos quand ch'a sarà 'rvelà la glòria 'd nòst grand Dé e Salvator, Gesù Crist. 2:14 Chiel a l'ha dàit soa vita për liberene da ògni sòrt ëd pecà, për purifichene e per rendne 'n pòpol, ël Sò, dël tut angagia a fé 'd bon-e euvre.

2:15 A l'é tut sòn ch'it deuve fé, an cissand ij chërdent a fé autërtant. Ti 't l'has l'autorità për coregje quand ch'a l'é necessari. Për lòn, lassje nen meprisé lòn ch'it dise.

Nòte

1 Ansian.

2 O "rispetàbil".

3 O "maldisent".

4 Beivande alcòliche.

5 O "ëd toa dotrin-a".

6 O "arbëcché", "nen fé 'd polémiche".

7 O "bon".

8 O "impietà".

9 O "ai piasèj ch'a son ëd pecà".



http://saintebible.com/titus/2-1.htm
À à È è É é Ì ì Ò ò Ó ó Ù ù Ë ë
Comments