2 Pé 1

1
Salut

1:1 Simon Pé, servitor e apòstol ëd Gesù Crist, a voi ch’i l’eve otnù na fej pressiosa tanme la nòstra1 për la giustissia ‘d nòstr Dé e Salvator Gesù Crist. 1:2 Che la grassia e la pas av sio dàite an abondansa për chërse sèmper ëd pì 'nt la pien-a conossensa ‘d De e ‘d nòstr Signor Gesù Crist.

La salvëssa dij chërdent e l’euvra ‘d Nosgnor

1:3 Soa divin-a potensa ha l’ha dane bondos tut lòn ch’a l’é necessari për la vita e la pietà për ël mojen dla pien-a conossensa ëd Col ch’a l’ha ciamane për sòa glòria e ecelensa2. 1:4 Për lòn3 Chiel ha l’ha dane bondose soe pressiose e magnifiche promësse, parèj che për ël mojen ëd lòn ch’a l’é stàit promëttù, voi i peusse pijé part a la natura divin-a, dòp esse scapà da la corussion ch’a regna an sto mond e ch’a l’é l’arzultà dla concupissensa4.

1:5 Për cost’istessa rason, fé tut lòn ch’i peude ëd gionté a vòstra fej l’ecelensa, a l’ecelensa la conossensa, 1:6 a la conossensa la padronansa ‘d vojàutri5, a la padronansa ‘d vojàutri la costansa6, a la costansa la pietà, 1:7 a la pietà l’afession da frej, a l’afession da frej, col amor ch’a l’é tut për j’àutri.

1:8 An efet, se coste còse as trovo an voi për dabon, i sareve mai nì ossios7 nì stèril8 ant la conossensa ‘d Nosgnor Gesù Crist. 1:9 Al rësguard ëd coj ch’a-j manca ‘d còse parìja, nopà, a son ëd bòrgno, visadì, a son curt ëd vista, përchè a l’han dësmentià ch’a j’ero stàit purgà dai pecà ch’a l’avìo fàit an passà9.

1:10 Donca, mè frej, fé minca sfòrs ëd confermé10 vòstra vocassion e vòstra elession11. S’i fareve parèj i antrapereve mai12 1:11 e i arseivreve ‘n caloros bin ëvnù13 'nt ël regn etern ëd Nosgnor e Salvator Gesù Crist.

La salvëssa an sël fondament ëd la Paròla ‘d Nosgnor

1:12 Për costa rason i chiteraj mai d'arciameve an ment cole còse, combin che già i le conòsse e ch’ i seve bin fondà an sla vrità ch’i l’eve arseivùa14. 1:13 I penso ch’a l’é motobin necessari15 che mi, antant ch’i son an sta tenda16, iv ten-a dësvijà con d’avertiment, 1:14 përchè i sai che prest i dovrai dëslogé: sòn a l’ha arvelame ciàir e net ël Signor Gesù Crist. 1:15 A l’é për lòn ch’i faraj minca sfòrs che, apress mia partensa, i l’abie na testimoniansa ‘d tute ste còse.

1:16 Përché quand ch’i l’oma dave a conòsse la potensa e l’artorn ëd Nosgnor Gesù Crist, i soma nen andàit dapress a ‘d fàule architetà da queidun, nò, nojàutri i soma stàit testimòni diret ëd soa grandeur, 1:17 Përchè Chiel a l’ha arseivù onor e glòria da Nosgnor ël Pare, quand ch’a l’ha adressaje da la glòria magnìfica sta vos: “Sto-sì a l’é mè Fieul, col ch’am dà tanta sodisfassion”. 1:18 I l’oma sentù pròpi con nòstre orije costa vos ch’a venìa dal cel quand ch’i j’ero con Chiel an sla montagna santa. 1:19 Ëd pì, i l’oma la paròla profètica ch’a l’é dël tut degna ‘d fiusa. I feve bin a dejla da ment coma ch’ i farìe con na lus ch’a fà ‘d ciàir ant un leugh scur, fin-a ch’a ven-a la primalba e la stèila matinera as leva an su vòsti cheur.

1:21 Dzortut, i feve bin a ‘rconòsse sos-sì: gnuna professìa dla Scritura a l’é mai vnùa da l’imaginassion dël profeta17, 1:22 përchè gnun-a professìa a l’é mai nassùa da la volontà uman-a, ma dj’òm a l’han parlà da part ëd Nosgnor dòp avèj arseivù l’impulsion ëd lë Spirit Sant.

Nòte

1Ugual an valor e onor.

2O “virtù”, “forsa”.

3O “ste còse” (Soa glòria e ecelensa).

4Anvìa, angordisia dle còse ‘d stò mond.

5O “temperansa”, “auto-control”, “moderassion”, la padronansa ‘d nòstra vita.

6O “përseveransa”.

7Plandron.

8“av rendran d’efet e frutos”.

9O “a l’ha dësmencià la purificassion dij sò pecà passà.

10O “d’esse sicur”.

11L’autor a dis nen che la virtù e la santità a fruto la salvëssa, ma che la virtà e la santità a son l’evidensa, la preuva dla salvëssa.

12O “Ël pecà mai av farà antrapé”.

13O “për col mojen av sarà dàita con abondansa l’intrada ant…”.

14Let. “ch’a l’é present an voi”.

15O “giust”.

16Vive an cost mond.

17O “antërpretassion”.


Comments