1 Tessalonicèis 3

3

3:1 Quand, donca, i l'oma pì nen soportà1, i l'oma decidù 'd resté a Atene. 3:2 I l'oma mandà Timòt, nòst frel, ministr ëd Nosgnor e nòst compagn d'euvra ant l'Evangeli 'd Crist, për podèj rinforseve e ancorageve ant la fej, 3:3 parèj che gnun a sìa stravirà da cole aflission. An efet, i lo seve bin ch'i soma destinà a lòn. 3:4 Përchè quand ch'i j'ero 'nsema a vojàutri, iv predisìo ch'i l'avrìo da patì d'aflission. Lòn a l'é pròpi rivaje, com'i lo save. 3:5 Antlora, quand ch'i l'hai podulo pì nen soporté, i l'hai mandà Timòt për conòsse lë stat ëd vòstra fej, për tëmma che 'l tentator a l'avèissa tentave an quej manera, e che nòst travaj a restèissa inùtil.

3:6 Ora Timòt, essend tornà poch temp fa da con vojàutri, a l'ha portame 'd neuve agreàbil ëd vòstra fej e 'd vòst amor. ch'av arcordeve sèmper ëd noi, desiderand motobin ëd vëd-ne, com ëdcò nojàutri i desideroma 'd vëd-ve. 3:7 An conseguensa 'd sòn, frej e seur, an mes ëd tute nòstre aflission e necessità, për vìa 'd vòstra fej, i seve stà-ne na gran' consolassion. 3:8 Ora i soma stàit arvivà përché voi i steve ferm ant ël Signor. 3:9 E che assion ëd grassie i l'om-ne nen da rende a Dé a càusa 'd voi, për tut ël piasì ch'i arsèivoma da voi dëdnans a Nosgnor? 3:10 I pregoma 'd cheur, neuit e dì, ëd podèj torna vëd-ve për completé lòn ch'a manca a vòstra fej. 3:11 Ora, ch'a peussa nòst Dé e Pare, e Nosgnor Gesù Crist, deurbe-ne la strà për andé da vojàutri, 3:12 e 'l Signor av fassa chërse e abondé sèmper ëd pì l'amor ch'i l'eve l'un anvers j'àutri e anvers tùit, pròpi com' i l'oma anvers a vojàutri, 3:13 për confermé vòstri cheur përch' a sio sensa rimpròcc an santità dëdnans a Dé, ch'a l'é nòst Pare, a la vënùa 'd Nosgnor Gesù Crist, an compagnìa 'd tùit ij Sò sant.

Nòte

1La mancansa 'd vòstre neuve.

Comments