1 Tessalonicèis 4

4

Na vita ch'a pias a Nosgnor

4:1 Del rest, mè frej e seur, iv pregoma donca, e iv suplicoma, për ël Signor Gesù Crist, che, com' i l'eve amprendù da noi la manera ch'as deuv comportesse e piasèj a Dé (e i lo feve già), i lo fase sèmper ëd pì1. 4:2 Përchè i seve, an efet, lòn ch'i l'oma comandave për part dël Signor Gesù. 4:3 Lòn che Nosgnor a veul a l'é ch'i vive an manera santa2; a l'é ch'i steve lontan da la saloparìa3; 4:4 a l'é che ognidun a sàpia esse padron ëd sò còrp4 ant la santità e l'onor, 4:5 nen lassandse andé a le passion libidinose5 dla gent ch'a conòss nen Nosgnor6. 4:6 An st' afé-sì, che gnun a fasa 'd violassion dij drit ëd sò frel o ch'a na profita, përchè Nosgnor, an tute ste còse, a l'é 'n vendicator - com' i l'oma già dive e i l'oma butave an sl'avis: a son ëd ròbe sèrie. 4:7 Dé, an efet, a l'ha nen ciamave a la saloparia, ma a la santità.

4:8 Për conseguensa, col ch'a 'rfuda sossì, a 'rfuda7 nen ël consej d'un òm8, ma Dé medèsim, Col ch'av dà Sò Spirit Sant. 4:9 An sël tema dël volèisse bin coma 'd frej, i l'eve nen da manca ch'iv na scriva, përché i l'eve già 'mprendù da Dé a volèive bin l'un l'àutr. 4:10 Sensa dubi già i lo feve anvers ij vòstri frej e seur dla Macedonia, ma noi iv esòrtoma, frej e seur, a felo 'ncora 'd pì. 4:11 Aplicheve 'd vive an manera chieta, a ocupeve 'd vòstri afé e 'd travajé 'd vòstre man com' i l'oma comandavlo. 4:12 A l'é parèj ch' i podreve vive sensa rimprocc dëdnans a coj ch'a fan nen part ëd vòstra comunità9 e i sareve nen ëd pèis a gnun10.

Ël Signor a 'rtorna për sò pòpol

4:13 Noi i voloma pa, frej e seur, ch'i sie ant l'ignoransa al rësguard ëd coj ch'a deurmo ant la mòrt, a fin ch'i sie nen crussià parèj 'd coj ch'a l'han gnuna speransa. 4:14 Përché s'i credoma che Gesù a l'é mòrt e ch'a l'é arsussità, për l'istèss, ëdcò coj ch'a son andormisse an Gesù11, Dé a-j menerà con Chiel. 4:15 I disoma sossì për la paròla dël Signor: noi ch'i vivoma e ch'i saroma sì a la vnùa dël Signor, a l'é sicur ch' i androma nen danans a coj ch'a deurmo ant la mòrt12, 4:16 përché 'l Signor, Chiel istèss, con un crij 'd comand, na vos d'arcàngel e con la tromba 'd Dé, a calerà giù dal Cel, e coj ch'a son mòrt an Crist a 'rsussiteran prima; 4:17 peuj noi ch'i vivroma e ch'i saroma sì, i saroma 'dcò tut sùbit trasportà tùit ansema con lor sù ant le nìvole, për ancontré 'l Signor ant l'aria. Parèj i saroma për sèmper con ël Signor. 4:18 Consoleve, donca, l'un l'àutr con ste paròle-sì.

Nòte

1O "fé 'd progres".

2O "vòstra santificassion".

3O "fornicassion", "lussuria", "imoralità dël sess".

4Let. "vas".

5O "salòpe", "crin-e", "ai desideri dla concupissensa".

6O "dij Gentij che...", "dij pagan che...".

7O "dëspressia".

8O "n'autorità uman-a".

9O "coj ëd fòra".

10 O "i l'avreve da manca 'd gnente".

11Coj ch'a son mòrt com' ëd cristian.

12 Coj ch'a son mòrt

Comments