1 Tessalonicèis 1

1 Tessalonicèis

1

Salut

1:1 Pàul, Silvan e Timòt, a la cesa dij Tessalonicèis an Dé ël pare e an Nosgnor Gesù Crist; grassia e pas a voi!

Ringrassiament

1:2 I rendoma sèmper grassie a Dio për tuti vojàutri, an fasand mension ëd voi an nòstre orassion, 1:3 e arciamand sèmper a nòstra memòria l'euvra 'd vòstra fej, ël travaj 'd vòstr amor e la passiensa 'd vòstra speransa, an Nosgnor Gesù Crist, an prësensa 'd nòst Dé e Pare. 1:4 I savoma, frej e seur, che Nosgnor Dé av veul bin e ch'a l'ha sernuve1, 1:5 përchè nòstr Evangeli a l'é nen vnù a voi2 mach con ëd paròle, ma con potensa, con lë Spirit Sant e con na persuasion ancreusa - iv arcòrde 'd sicur ël caràter ch'i l'oma esternà quand ch'i soma vnù për deve n'agiùt. 1:6 I seve stàit imitator ëd nojàutri e dël Signor, quand ch'i l'eve arsèivù ël messagi3 con la gòj ch'a ven ëd lë Spirit Sant malgré la granda aflission ch'a l'ha compagnalo. 1:7 A l'é 'rsultane che vojàutri i seve dventà 'n model për tùit ij fidej4 dla Macedònia e dl'Acàia, 1;8 përchè da voi ël messagi a l'ha 'rsonà nen mach an Macedònia e ant l'Acàia, ma la neuva 'd vòstra fej an Nosgnor l'é spantiasse tant ch'a l'é pì nen necessari che nojàutri a na parla. 1:9 An efet, lor istèss a conto 'd la manera ch'i l'eve arseivune e coma ch'i seve stàit convertì da j'idol a Dé për serve 'l Dé viv e ver, 1:10 e coma ch'i speteve dai cej sò Fieul, ch'a l'ha 'rsussità dai mòrt e ch'an libera da l'ira 'd Dé ch'a l'ha da ven-e.

Nòte

1O "I savoma ... 'd vòstra elession".

2O "Përchè la predicassion ch'i l'oma fàita dl'Evangeli an mes a vojàutri".

3O "la Paròla".

4Ij chërdent, ij cristian.

Comments