March 4

4

La paràbola dël sëmneur

4:1 Peui Gesù a l'é torna butasse a mostré davzin al mar e a s'ambaronava tanta ëd cola gent tut dantorn a chiel che Gesù a l'é montà sna barchëtta an sl'eva e da là, astà, a parlava a la gent ch'a stasìa an sla riva. 4:2 A-j mostrava motobin ëd còse con ëd paràbole e a-j disìa ant ël sò amaestrament: 4:3 "Scoté: un sëmneur a l'é surtì a sëmné 4:4 e a l'é capitaje che na part ëd la smens a l'é croà1 longh la stra, e a-i é vnuje dj'osej dël ciel ch'a l'han mangiajla tuta. 4:5 N'àutra part a l'é croà 'nt un leu pien ëd pere doa ch'a-i era nen vàire 'd tèra e a l'é chërsùa sùbit përchè a-i era nen ëd teren ancreus. 4:6 Ma quand ch'a l'é surtije 'l sol, a l'é restà brusà e dal moment ch'a l'avìa nen ëd rèis, a l'é restà sëcca. 4:7 N'àutra part a l'é cascà antrames a dle spin-e e le spin-e a son chërsùe e a l'han stenzula e a l'ha frutà gnente. 4:8 E n'àutra part a l'é croà 'nt na tèra bon-a e a l'ha frutà, vnisend sù e chërsend ëd tal manera che un gran a l'ha portane apopré tranta, n'àutr sessanta, n'autr sent". 4:9 E a-j disìa: "Col ch'a l'ha d'orije për sente, ch'a comprenda".

Ël motiv dle paràbole

4:10 Quand ch'a l'é restà da sol, coj ch'a j'ero dantorn a chiel, con ij dódes, a l'han anterogalo a propòsit ëd cola paràbola. 4:11 chiel a l'ha dije: a vojàutri a l'é përmëtù ëd conòsse ël segret dël regn ëd Nosgnor; ma a coj ch'a na son fòra tute le còse as trato con ëd paràbole. 4:12 Përchè an vëdend a vëddo e ch'a s-ciàiro nen; e che scotand a scoto e ch'a capisso nen; për nen ch'as converto e che ij sò pecà a sio përdonà.

Gesù a spiega la paràbola dël sëmneur

4:13 Peui a l'ha dije: I-é-lo chi ch'a capiss nen costa paràbola? Com é-lo donca ch'i capireve tute le paràbole? 4:14 Col ch'a sëmna, a l'é col ch'a sëmna la Paròla. 4:15 E valà, coj ch'a arsèivo la smens arlongh la stra, a son coj ch'a-j sëmno andrinta la paròla; ma dòp ch'a l'han ëscotala, Sàtana a riva dun-a e a pòrta via la paròla sëmna ant ij sò cheur. 4:16 L’istess, coj ch'a arsèivo la smens ant dij leu andoa a-i é 'd pere a son coj che avend sentì la paròla a l'arsèivo tòst con piasì. 4:17 Ma a l'han pa 'd rèis an lor-midem, e a duro mach un temp, ëd manera che an rivandje dij sagrin e la përsecussion për via dla Paròla, a son dun-a scandalisà. 4:18 E coj ch'a arsèivo la smens an mes a le spin-e, a son coj ch'a sento la paròla. 4:19 Ma ij crussi d'ës mond e l'angann dle richësse, e l'angordisia dj'àutre ròbe, essend intrà ant ij sò spìrit, a strenzo la Paròla, e chila a resta sensa frut. 4:20 Ma coj ch'a l'han arseivù la smens an na tèra bon-a, a son coi ch'a scoto la paròla, e che a la arsèivo e ch'a pòrt 'd frut; un tranta, e l'àutr sessanta, e l'àutr sent.

Ël lum sota 'n sigilin

4:21 A disìa ëdcò: As pòrt-lo ël ciàir për butelo sota ‘n sigilin o sota 'n let? É-lo nen për butelo an sël candlé? 4:22 Përchè a-i é gnente ëd segret ch'a vnirà nen a savèisse, e a-i é gnente dë stërmà ch'a ven-a nen al dëscuvert. 4:23 Se cheicadun a l'ha dj'orije për sente, ch'a scota.

4:24 A l'ha ancor dije: Pijé varda ‘d lòn ch'i sente; dl'istessa mzura ch'i mzurëreve, a vë mzurëran ëdcò; ma a vojàutri ch'i scote, av sarà giontà. 4:25 Përchè a col ch'a l'ha, a-j sarà dàit; e a col ch'a l'ha gnente, a-j gavran ëdcò lòn ch'a l'ha.

La paràbola dla smens ch'a chërs

4:26 A disìa ëdcò: "Ël Regn ëd Nosgnor a l'é coma quand n'òm a sëmna 'd smens ant la tèra. 4:27 Tant s'a deurm o ch'a sia dësvij, ëd neuit e 'd dì, la smens a gica e a chërs sensa che chiel a sapia coma. 4:28 La tèra a produv daspërchila prima l'erba, e peui lë spi e peui, a la fin, ël forment ant lë spi. 4:29 Quand che 'l gran a l'é mur, col òm a-i buta dlongh l'amsòira, përchè 'l temp dl'amson a l'é rivà.

La paràbola dla smens ëd senëvra

4:30 A disìa ancora: A còsa podrium-ne comparisioné ël regn ëd Nosgnor, o con che paragon podriom-ne arpresentelo? 4:31 A l'é parèj dël gran ëd senëvra che, cand as sëmna an la tèra, a l'é la pì cita ëd tute le smens ch'as campo ant la tèra. 4:32 Ma apress ch'a l'é sëmnà, a chërs e a ven pì grand che tute j'àutre piante, e a buta fòra ëd grand branch, tant che j'osej dël cél a peulo fé ij sò ni sota soa ombra.

Coma Gesù a deuvra le paràbole

4:33 Parèj, con vàire paràbole ëd costa sòrt, a-j nunsiava la paròla ëd Nosgnor, coma ch'a podìo capila. 4:34 A-j parlava nen sensa parabòle; ma an privà a spiegava tut ai sò dissìpoj.

Gesù a pasia na burasca

4:35 Peui ant l'istess di, vnùa ch'a l'era la sèira, Gesù a l'ha dije: "Passoma dëdlà dël lagh". 4:36 E chitand la furfa, a l'han ëmnalo ansema a lor, chiel essenda già ant la barca. A-i era ëdcò d'àutre cite barche ansema a lor. 4:37 A l'é aussasse un turbij ëd vent tant fòrt, che j'onde as campavo ant la barchëtta, an manera ch'a ancaminava già a ampinisse. 4:38 Ma chiel a l'era a la popa, ch'a durmìa an s'un cussin. Antlora a l'han dësvijalo, e a l'han dije: “Signor, at n'a fa gnente ch'i meuiroma?". 4:39 Ma chiel, dësvijandse, a l'ha crijaje al vent e a l'ha dit al mar: "Stà chièt, sta ferm"; e 'l vent a l'ha chità e tut a l'é stàit chiet. 4:40 Peui a l'ha dije: "Përchè eve-ne tanta pàu? Com é-lo ch'i l'eve nen ëd fej?". 4:41 E lor as son sentisse adòss na gran tëmma e as disìo l'un l'àutr: "Ma chi é-lo chiel-sì, che fin-a ël vent e ël mar a-j dan da ment?".

Nòta

1O "cascà".

Comments